滾熱辣
林峯捧蛋頹爆 三屆視帝寸嘴：原來我 fans多過佢！
2012年12月21日
周一舉行的《萬千星輝頒獎典禮 2012》，由民意主導，賽果依然惹人質疑。賽前《雷霆掃毒》的「 Happy Sir」林峯成為視帝及「最喜愛男角色」獎的頂頭大熱，最後居然一個豬肉獎都分不到，跌到一地眼鏡碎，無綫及通訊局更合共收到 200宗投訴，指無綫賽果不公及沒有公開票數。
捧蛋一刻，林峯在鏡頭前難掩失望之情，同晚更陪伴失落視後的徐子珊食消夜，兩個輸家併埋一齊灰上加灰。不過有人歡喜有人愁，再三封帝的黎耀祥就寸寸貢話：「呵呵呵，原來我 fans多過佢（林峯）！」夠曬贈「㷫」。
今年無綫頒獎禮突然轉制，安排全民投票選視帝、視後及最佳劇集三個大獎。賽前外間一致認為 fans多的林峯會坐定粒六奪視帝，就連黎耀祥亦講到明打定輸數睇好林峯，話自己攞視帝仲難過中六合彩。
賽前準備橫額
據知，近日在內地趕拍新劇《紫釵奇緣》的林峯，回港出席宣傳活動期間，曾叮囑 fans在頒獎禮當天帶定「最受歡迎男角色」橫額，似乎對獎項志在必得。當時林峯表示：「我喺內地趕緊劇，如果收到通知就要返嚟。應該有機嘅！」
祥仔出蠱惑
誰知賽前大熱的他離奇墮馬，黎耀祥卻當上三連霸視帝，唔少人認為賽果爆冷。但私底下，視帝祥其實早已勝券在握。早前他便漏口風表示與無綫加簽了兩年合約，順理成章有籌碼傾獎。本刊更收到消息，無綫早有意搵黎耀祥 15歲囝囝黎正橋入娛樂圈。知情人說：「公司好多爸爸輩藝人走咗，都想搵番啲父子檔上陣，所以睇中祥仔一家三口咁溫馨。之前公司同祥仔傾過，佢猛咁推話個仔要讀書冇時間，但上次續約再提呢件事，祥仔竟然話若夾到時間，可以叫個仔上嚇綜藝節目試水溫。」黎耀祥咁順攤續約，無綫亦識做，造就他第三度封帝，平羅嘉良紀錄。
強唧笑容
可憐與無綫還有三年合約的林峯，被蒙在鼓裏，輸了視帝獎給祥仔，連馬國明都騎住他，奪得「最受歡迎男角色」獎。難怪頒獎禮後，林峯一支箭衝出一廠。記者問他輸給馬國明有何回應，他即收起笑容說：「咁同事攞獎，唔會唔開心嘅！」刻意強調與馬明只是同事，話中有骨。
林峯成晚坐冷板櫈，表現相當失落，眾高層亦識做𠱁番林峯。當晚，他與隸屬同一經理人的「最受歡迎女角色」獎得主徐子珊到灣仔串燒店消夜，無綫高層樂易玲、梁家樹及監製潘嘉德亦齊齊到場安慰兩個輸家。不過林峯全晚心情麻麻，當眾人到門外影大合照時，監製潘嘉德大叫他出來影相都冇反應，要樂小姐連嗌多次：「阿峯，阿峯喺邊？出嚟影相呀！」隔多一陣，林峯才慢慢行出來。
林峯失落，視帝祥卻火上加油，本刊記者問到爆冷得獎時，他說：「呵呵呵！真係我攞，原來我啲 fans多過佢（指林峯），真係冇諗過！」表現寸嘴。
徐子珊：好多人唔鍾意我
視帝爆冷，視後卻鬥得難分難解，最後徐子珊奪豬肉獎，楊怡則捧走視後。雖然賽果塵埃落定，但徐子珊就唔多忿氣，扁扁嘴說失獎只因自己人緣差。「我係有失望，亦知有好多人唔鍾意我。其實都好好啦，可以攞嚿嘢（獎座）返屋企，最失望嘅反而係 fans同朋友。」至於事業愛情同樣得意的楊怡，當晚攬實個視後獎，早早返歸，與男友羅仲謙過二人世界。
蘇基簽親生仔
除了視帝視後爭崩頭，今年「男配角」同樣競爭劇烈。據知古明華今次奪獎，關鍵是他在無綫的人緣不俗，故取得不少同事支持投票俾佢。相反同是演藝出身的陳國邦，由於經常教人做戲，不少藝員對他早有微言。有幕後透露：「阿邦有時太過嚴肅，教同事做戲。好多人背後叫佢做『邦老師』，話佢當正自己係阿 sir。」
陳國邦得不到同事力撐，在票數上自然落後古明華一截，加上在頒獎禮前夕，古明華原來已落實轉簽經理人合約（親生仔）。古明華亦直認將會簽約：「係有同公司傾，但呢一刻我仲未落筆簽。」而嗅到𤓓味的陳國邦雖不是味兒，仍表現出風度地說：「你問我，我梗係恨攞男配角獎，不過佢（古明華）條路難行過我。呢個獎對佢嚟講好重要。」
《忽周》選舉
賽果大不同
無 綫頒獎禮話就話視帝、視後和最佳劇集則是全民投票，仍有唔少人話賽果不公。睇番《忽周》讀者投票結果，唔少獎項得主又確實同無 綫有出入：視帝由林峯奪得，女配角江美儀揮低胡定欣，與無 綫賽果明顯有出入。
三奶爭贏
黑絲襪江美儀在無綫女配角獎中，連兩強都入唔到，但在《忽周》選舉中，三奶卻大比數拋離其他對手。
《 On Call》成大贏家
在《忽周》選舉中，《 On Call》在最佳劇集中，竟然由頭帶到落尾，撼贏神劇《天與地》，同時羅仲謙亦憑此劇奪得《忽周》「最佳男配角」選舉，而楊怡除了《名媛》攞視後外，亦憑《 On Call》擸埋「女角色」獎，因此在《忽周》選舉中，《 On Call》爆冷成大贏家。
羅蘭壓場
無綫頒獎禮，向來對甘草演員唔多重視，因此《忽周》特設資深演員獎，結果眾望所歸由《天梯》羅蘭姐大比數拋離對手勝出。薑果然愈老愈辣。
.[忽然1周]林峯捧蛋頹爆 三屆視帝寸嘴：原來我 fans多過佢！
http://veryy8.blogspot.com/2012/12/1-fans.html.[忽然1周]林峯捧蛋頹爆 三屆視帝寸嘴：原來我 fans多過佢！
http://veryy8.blogspot.com/2012/12/1-fans.html
