探熱針
3間海外公司掃樓 楊千嬅搬半億新屋
2012年12月27日楊千嬅丁子高結婚三年多，由初期與奶奶同住，到後來每月以 15萬租住陽明山莊單位過二人世界，但寶貝仔 Torres出世後，兩公婆決定另覓新天地，並趕在新年前搬入聯名購入、在舊居樓上的二千多呎新屋。
原來早在一○年開始，丁生丁太已聯名成立三間 BVI海外公司，雙方各持一半股權，用以秘密買屋，包括以 4,350萬購入即將入夥的陽明山莊高層單位。
近日單位已裝修完工，為了囝囝將來有更多活動空間，千嬅將 300呎 BB房豪裝如兒童樂園，而近日經常飛北京工作的她，只要人在香港，都會親自湊仔，做廿四孝媽咪。
開始執屋
產後復工未幾，新任媽咪楊千嬅工作排山倒海，近月更要每星期飛北京擔任慈善節目《夢想合唱團》隊長，湊仔已經無時間，還要為搬屋費神。
「其實新屋已經裝修咗半年，最近先啱啱完工，執埋少少手尾就隨時搬得，除咗湊仔，千嬅一得閒就開始執定嘢，唔會假手於人。今次搬屋只係樓下搬樓上，仲係同一座，部分執好咗嘅嘢可以搬上去先，比起平時搬屋方便好多！」千嬅身邊人說。
豪裝仔仔房
早於兩年前，楊千嬅丁子高聯名成立了三間 BVI海外公司，各持一半股權，主要用來買賣物業。由於海外公司對股東及董事資料保密，公眾無法查閱，兩公婆毋須擔心外洩。至於以四千三百五十萬買入的二千四百呎陽明山莊高層單位，也是以其中一間 BVI公司持有。
「千嬅租緊間屋仲有死約，所以買咗之後校啱時間先開始裝修，佢兩公婆亦專登設計咗一間三百呎 BB房俾 Torres，仲布置到成個兒童樂園咁。」
○九年八月，楊千嬅與丁子高在拉斯維加斯秘密結婚，婚後不久，她便搬進老公位於陽明山莊寓所，與奶奶同住，婆媳關係融洽。
「同丁生結婚無耐，千嬅就搬咗去奶奶買嘅陽明山莊屋企，始終奶奶得丁生一個仔，千嬅都想一齊住方便照顧老人家，但後來丁生想過二人世界，佢哋先搬去隔籬座，大家住埋一個屋苑，丁生都好放心，千嬅同老公又可以成日去奶奶嗰邊食飯，婆媳相處完全無隔膜。」
全力湊仔
連日來，本刊發現千嬅只要人在香港，都會留在家中湊仔。今個月初（十二月六日），千嬅剛由北京返港後便足不出戶，由早到晚在家湊仔，餵奶換片親力親為。雖然有陪月及工人幫手，但千嬅經常抱住肥嘟嘟的 Torres，由飯廳行到客廳，來來回回，完全沒有因為抱 B搞到一度患上肩周炎而擔心。
揸 磚頭
03年，正值事業高峰期的千嬅，斥資 3,000萬買入富豪海灣 4,200呎單位，與父母同住；至 09年，以 6,380萬賣出，勁賺 3千多萬。近年她再接再厲，不斷買磚頭保值，物業遍布上海、澳門等地。為保障私隱，千嬅與丁子高婚後成立了海外公司買賣物業，當中包括陽明山莊愛巢。
第二日，千嬅要外出工作，於是安排媽咪接力湊孫。傍晚六時，陪月加工人照顧 Torres到餐枱開餐，半歲的 Torres除了飲人奶，亦開始食糊仔，營養十足，半歲已經有三十磅重，手仔腳仔脹蔔蔔。據千嬅身邊人指， Torres極少扭計大喊，非常好湊。
「以前千嬅好鍾意約朋友出去食飯，大住肚都唔黐家，但生咗個仔後，朋友約佢都要度期，佢話要爭取多啲時間留喺屋企陪個仔。」
拒絕出埠
但上月開始，公司安排千嬅定期飛北京參與《夢想合唱團》演出，每星期要飛北京錄影三日，緊張媽咪，試過掛仔掛到喊。
「千嬅根本唔想離開香港多過一日，今次佢肯接呢個 job，主要因為做善事，幫助內地殘障兒童。經過今次之後，佢更加肯定自己已經唔同咗，而家只係想陪個仔度過成長每一刻，所以一月底完曬成個節目，千嬅講明暫時唔會接出埠多過一日嘅 job，連拍戲亦推遲到四月。」千嬅身邊人說。
北上開公司
09年，丁子高被揭家底，父親丁永方是上海大地主，有三間製衣廠及一間紙廠，身家以億計，但丁子高無意繼承家族生意，寧願做打工仔。 02年加入 IPS公關公司做 PR，後得老闆 Peter Wong賞識，力邀他入股，拍住上搵錢。
一直想自立門戶的丁子高，與千嬅結婚後決定坐言起行， 11年辭職，自己開公司做老闆。新公司更以他與千嬅的英文名 Real& Miriam縮寫名為 RM，公司成立一年多，丁子高加上千嬅的人脈關係，生意漸上軌道，並會在上海及北京等地開分公司，生意愈做愈大。
.[壹週刊]3間海外公司掃樓 楊千嬅搬半億新屋
http://veryy8.blogspot.com/2012/12/3.html.[壹週刊]3間海外公司掃樓 楊千嬅搬半億新屋
http://veryy8.blogspot.com/2012/12/3.html
