娛頭
搞散胡杏兒元兇 姣神徐子珊侵食急色黃宗澤
2012年11月01日黃宗澤胡杏兒分手後，男方一直高調擺出想復合姿態，但口是心非，死性不改，繼續雜食。上星期五（ 26/10）到上海出席「壹基金」賽車，遇著 TVB姣神徐子珊，被撇後扮頹的黃宗澤，立即生猛。
姣神遇急色男，兩人在夜場內形影不離，態度親暱，徐子珊不避嫌拖實黃宗澤唔放，關係曖昧。第二日在賽車場上，姣神再出擊，主動向黃宗澤又挨又黐，比賽完落車，二人第一個反應，是來個深情擁抱。
黃宗澤同徐子珊有景轟，亦非近期之事。早在去年兩人合作《潛行狙擊》期間，親熱場面假戲真做，徐子珊更曾公然向胡杏兒示威，成為「澤兒戀」分手關鍵元兇。
上海速食
憑住一對銷雲眼，再加兩片永遠合唔埋的含春唇，徐子珊被網友封為 TVB新一代姣神，連同早年在電台節目高談闊論自己喜歡的做愛姿勢，洩漏 open本性，「性女」當之無愧！
再加《雷霆掃毒》內的一秒輪姦戲，徐子珊有機會同楊怡爭「視後」之餘，近期人氣持續盛勢。
性格開放的徐子珊，入行以來身邊緋聞男款色不同樣樣齊！適逢最近與眼科醫生謝偉業玩完，碰上同樣失戀的黃宗澤，姣神遇著雜食王，啱曬胃口，兩人食過翻尋味，唔好嘥。上星期五（十月二十六日），徐子珊與黃宗澤飛上海出席李連傑拉頭纜的「壹基金慈善明星賽」，落場比賽。到賽車場試車，現場耳目多，兩人沒有太多交流，黃宗澤大部分時間同錢嘉樂、吳家樂傾偈，但偶然亦會撩嚇徐子珊，十分體貼。
陰濕拖手
晚上，二人獲邀出席《 Elle Style頒獎禮》，徐子珊同黃宗澤以情侶姿態行紅地氈，上行「架生」，低胸吊帶裙加高叉露腿的她，一埋黃宗澤身主動就繑，雜食黃宗澤當然唔嘥，繑到對方實一實十分受落。
入到室內 VIP區，由於場地燈光昏暗，加上記者止步，兩人開始放低防範，全程更加黐到實；即使唔使再擺 pose影相，兩人都繼續繑實唔放，態度親暱。
兩杯香檳落肚後，黃宗澤更與徐子珊頭貼頭咬耳仔，但礙於場內有不少人要求他們影合照，阻頭阻勢，黃宗澤索性拖住徐子珊轉到另一個貴賓房，免再被掃興。
逗留兩個小時，徐子珊因為要出席 fans聚會，所以先行離開，但個多小時後，她已極速返抵同黃宗澤一同下榻的酒店，整晚再沒外出。
風騷送抱
第二朝一早，二人同步離開酒店，坐大會安排車輛到賽車場。兩人並肩而行，毫不避忌。到正式落場賽車，兩人同樣搏命，結果黃宗澤在男子組中得亞軍，揸車同人一樣戰鬥格的徐子珊，更成為女子組冠軍。
賽果公布後，徐子珊興奮到跑到車手堆中，目標清晰地對黃宗澤伸出雙手，箍實對方唔放，表情冧到爆。比賽完，二人隨即出發去機場，一齊搭機返香港。
一齊失蹤
據了解，黃宗澤同徐子珊搞埋，並非第一次。去年合作《潛行狙擊》時，兩人已經暗交散玩，劇中有多場大膽激烈親熱戲，其實是他們主動要求監製加插，假戲真做。
「嗰陣佢哋都好揚，喺廠都匿埋一邊密斟，最初以為佢哋對戲，但愈睇愈唔對路，對戲唔會有咁多身體接觸；子珊仲成日要啲人叫佢做 Co嫂（劇中名），即係 Bosco（黃宗澤）嫂，擺明當正印 Bo嫂胡杏兒無到。」
兩人明目張膽，有人睇唔過眼，於是向正印胡杏兒打報告。
「有次 Bosco同子珊拍完戲後一齊唔見咗人，杏兒收到風，同 Bosco炒過一鑊大嘢，件事仲嘈到去 Bosco媽咪度，老人家話會睇實個仔，唔會俾佢亂嚟，叫杏兒算數，兩個冷戰咗一輪先冇事！」黃宗澤身邊人說。
急住搬走
到今年四月，黃宗澤同徐子珊合作電影《神獸巴打》，兩人日對夜對，同時間胡杏兒又長期留在大陸拍劇，鞭長莫及，令二人有機可乘再撻著，由於胡杏兒一早心裡有數，搵定線眼 𥄫實，結果又再斷正，加埋其他雜食往績，胡杏兒終於忍無可忍一刀切，徐子珊亦成為二人分手元兇。
即使前度口口聲聲想復合，深受「狼來了」教訓的胡杏兒不為所動，早前更於郝德傑道買入一個單位住近家人，即使火炭晉名峰單位租約要到明年才滿，但為免同前度撞口撞面眼寃，胡杏兒多番要求裝修工人趕工，急住十二月初，拍完《衝上雲霄 2》外景返港後，搬離傷心地。
唔認攬拖
星期一晚，徐子珊從馬來西亞返港，被問到與黃宗澤撻著，她十分緊張，否認又拖又攬，更拖埋林峯落水，分散視線。
壹：你喺上海同 Bosco又拖又攬喎？
徐：（神情慌張）嚇……乜嘢呀？邊度有呀？
壹：喺 Elle個場影到拖手，賽車場就攬！
徐：冇喎，一定冇，你哋唔好亂咁講，你哋又想寫乜？
壹：其實胡杏兒同黃宗澤分手，當時主要原因係妳介入？
徐：嘩……你哋咁樣傳，傳傳嚇咪傳埋我同林峯。可能係佢（黃宗澤）當我係兄弟，成日捉住我隻手玩。
壹：你都當佢係兄弟？
徐：梗係唔係，我係女仔嚟㗎，我當佢係好朋友囉！
至於已成局外人的胡杏兒，堅拒重提傷心事。
「呢啲嘢我唔會回應，過咗去嘅嘢我唔會再講！」之後記者俾黃、徐拖手攬住的相給她看，杏兒亦立即擰轉頭走，冇眼睇！
乜人都啱
有「姣神」之稱的徐子珊， 05年入行後身邊男伴類別繁多，天王、億萬富豪、醫生，連道具佬都唔放過，口味百變。
溫迪倫
入行初期與從事話劇的溫迪倫拍拖，徐子珊參選「華裔小姐」期間，男方在網上留言鼓勵，令戀情曝光，後傳因黎明介入分手。
黎明
05年擔任無綫《娛樂大搜查》客席主持專訪黎明，即被天王睇中，力邀徐子珊做「 3」電訊公司廣告女主角，有指二人秘密行埋兩個多月，黎明更送了一部 Mini Cooper給她做禮物。
道具男
在拍《跟蹤》時與杜琪峰愛將遊乃海撻著，同居海怡半島，但隨後與一名無綫道具組猛男「大隻麒」（圖）拍拖，二人更齊齊到葡萄牙度假。
陳國強
10年，被踢爆與殼王陳國強來往，更有人目擊二人在中環國金軒晚飯，態度親暱。同一時間，徐子珊忽然富貴，進駐用一千萬買入的貝沙灣。
吳卓羲
去年與吳卓羲合作拍攝《法證先鋒 3》飾演情侶，有指二人不時在片場黐實傾偈，又齊齊戴住情侶紅繩開工。
牙醫謝偉業
今年中，眼科醫生謝偉業被拍得一連四日在徐子珊貝沙灣寓所過夜，但戀情見光死，最近已宣告玩完。
圍插輪姦
為爭視後，在《雷霆掃毒》以殘樣扮吸毒者的徐子珊，又打鑼打鼓稱豁出去拍了一場超激輪姦戲，又指為這場姦戲做了很多準備，令一班網友及高登仔十分期待，以為他們心目中的「含 X嘴」子珊有幾大膽演出！點知姦戲只得一秒交代，徐子珊被黑幫大佬李家鼎打白粉針後昏迷地上，緊接出現四名大漢笑騎騎說：「幾時到我呀？」只穿著黑色背心的大頭子珊保持暈倒地上姿態，一秒完事，令原本引頸以待的觀眾，大失所望。
網友炮轟姦戲言過其實，零施暴鏡頭，更看不到被輪姦的痛苦表情，直斥無 綫詐騙。當事人徐子珊為息網友不滿，自嘲說：「我除衫都唔係咁好睇 㗎咋！」
你追我躲
七月尾，爆出胡杏兒黃宗澤八年情因第三者介入告終，三個月來 Bosco扮曬慘，又出口術公開箍煲，只是女方去意已決，堅拒復合。
22/10 認錯
在台灣為《護花危情》接受當地傳媒訪問， Bosco暗地認錯：「感情上肯定無法像許 sir那樣踏實、可靠，無法給女友太多的安全感，結果女友常會抱怨。」
6/9 扮慘
一副愁爆樣的 Bosco，被記者問到情傷好番未？卻被行過的許紹雄踢爆：「我攬過 Bosco，佢冇瘦過，冇事喎！」劇組二五更爆料：「 Bosco開工同平時一樣，攬頭攬頸玩到癲，又同周麗淇講曬笑話！」
4/9 短訊求復合
在戚美珍主持的《珍情品味》任嘉賓，被問是否發過百訊息求復合。「唔係傳（訊息）好多，只係問候，復合呢 啲等天安排，我唔係好想講。」
27/7 認喊
爆分手後首度現身機場，講起曾視杏兒為結婚對象，他眼濕濕扁嘴表示不想再講，只否認有第三者介入；說到樂易玲想他們復合，又指他為分手痛哭！他說：「（復合）希望，遲啲再講，分手喊好正常。」
16/10 拒撐
被問到舊愛 Bosco可有機會憑《護花危情》奪今年視帝，胡杏兒只願說睇好《 On Call 36小時》的馬國明，封口不提舊愛。
19/9 怨多緋聞
回復單身拍《衝上雲霄 2》，在三亞拍外景時被指與大孖周志文傳緋聞。杏兒表示已叫大孖跟女友解釋清楚：「我唔想亂寫 嘅故事令人女友唔開心，我以前都試過，所以一定要澄清。」暗示跟 Bosco拍拖時，受對方的緋聞所困。
25/8 踢爆
傳舊愛狂發短訊箍煲，又跪地認錯，送五卡鑽戒求婚，為情暴瘦二十磅。至於可有復合機會？她斬釘截鐵說：「唔會啦，佢係唔會做 啲咁 嘅 嘢。」
26/7 唔肯講大話
問到分手原因是否男方有第三者時，她說：「我唔可以代表佢講 嘢，只可以代表自己，我就冇第三者！」據稱 Bosco曾要求女方否認他有第三者以保形象，但遭拒絕。
.[壹週刊]搞散胡杏兒元兇 姣神徐子珊侵食急色黃宗澤
http://hk8news-e.blogspot.com/2012/11/blog-post_8391.html
