2012年10月6日星期六

李雪瑩外闖Love HK

李雪瑩外闖Love HK

選港姐進身娛樂圈的李雪瑩，因一句「我愛香港」毅然獨自來港發展，可見她並非一般溫室小花。原來她自小已被父母訓練有素，練成獨立性格，隨時隨地拎起個篋，便可隻身走天涯！

不知從何時起，「選美後拍劇」已變成自然定律，除了美貌與智慧，演技同樣講究。今年正值公仔箱的女新人輩出，華姐冠軍「香香公主」岑麗香近日更是極速上位，而早前與另一選美女神苟芸慧合演劇集《怒火街頭2》、飾演律師的李雪瑩（Crystal），同樣開始備受注意。

最上鏡「怕醜妹」

Crystal於2010年參選港姐，最終挾「最上鏡小姐」之名闖娛圈，但自認「怕醜妹」的她自言當初沒打算參賽，只是「天時地利人和」的驅使：「讀完大學就喺律師樓做嘢，記得嗰陣喺3月底辭職，當時嘅港姐海外招募截止就喺四月頭，所以嗰一個禮拜個心變得十五十六！」雖然Crystal深知機會難求，但笑言若當日沒有別人推動，至今她可能仍是甘於淡泊的上班族：「其實有個Auntie每年都叫我選美，但我次次都用唔同藉口去推，後來媽咪都鼓勵我參加，當係攞經驗，唔好在乎輸贏，同埋可以免費旅行，所以最後都參加咗！」

即使緣盡三甲，Crystal亦把握機會踏足娛樂圈，原因只為「I love Hong Kong」，她說：「以前暑假同新年都會返嚟香港探親，我不嬲都好鍾意香港，加上鍾意城市多過靜嘅生活，所以香港真係幾適合我！」決定入行後，Crystal心口掛一個「勇」字、孑然一身來港生活，如此果斷，因她自小已養成「向外闖」的心態：「由細到大都比較獨立，讀大學其中一年係喺羅馬留學，當時真係一個人拖住個篋就過去！細個時父母做生意，都唔係好多時間陪我，有時放暑假，媽咪就會問：『不如Send你去美國阿姨度玩？』跟住佢就極速買一張機票送我同妹妹過去！」

亮相節目父母捧場

雖然Crystal恍似經常被家人「外放」，事實上她與家人關係甚佳，即使父母不在身邊，亦能感到他們對自己的支持：「由細到大，屋企人都畀好大嘅自由空間我做想做嘅事。讀大學時主修外語，嗰邊好少中國嘅小朋友會讀呢科，通常會揀讀醫、法律、會計或者理科，但係爸爸媽媽對於我揀科完全冇反對，佢哋會覺得你係鍾意呢樣嘢，就畀心機去讀好佢。正如入行一樣，佢哋無限量支持我，仲緊張到有任何我出鏡的節目，都會諗辦法追去睇。」

英國土生土長

早前播出《怒火街頭2》時，劇中演員金剛、岑麗香、賈曉晨及苟芸慧都被指廣東話發音不準，反而在英國土生土長的Crystal卻有幸未受「批評」，但卻因此惹來誤會：「好多同事都會問：『你幾大個過去英國讀書？』通常佢哋會以為我係大學先過去，不過當我同佢哋講我喺英國出世、成長，佢哋都會覺得好驚訝！」問到有何語言升級秘方？她笑說：「我同父母用中文溝通，6歲到18歲喺英國都有讀中文學校，所以寫同睇中文大致都冇問題，加上我對語言都有少少天分，喺大學係主修外語，細個好有興趣學中文，父母都成日訂中文報紙同雜誌，一睇到唔識嘅字我就會Mark低，就係咁累積咗識好多生字！」

後記：難得一粒「鄉音」

Crystal拍劇冇「鄉音」，在港發展語言零障礙，但卻因一次不小心「講歪音」而笑爆全場：「選完港姐去新加坡做一個親善訪問，同行嘅有王浩信、蕭正楠同幾位得獎港姐，有一次食飯唔知點解唔小心將芋條個『條』字講咗普通話音，佢哋成班就笑我有鄉音，笑足成個Trip！」

李雪瑩談吐得體，除了綜合節目，亦參與劇集演出，形象更加「入屋」。

就因為沒有「鄉音」，李雪瑩不時被「懷疑」，令她啼笑皆非。