現場直擊
何超蓮絕種好豹
2012年10月04日一向謝絕訪問的賭王至索千金、三房細女何超蓮，為了瀕臨絕種的動物，竟然先斬後奏瞞住阿媽，支持化妝師好友 Annie G.和 Charmonde總裁胡敏珊，與其他五位名人，由攝影師 Sunny Lau操刀，為「無盡慈懷慈善協會」的慈善相片展籌款扮美洲豹；剛從北京落機回家抖抖，就趕來 studio拍照的超蓮啜住麥精話：「我真心想做義工，不過我喺香港做就會有成隊 crew跟住，又有好啲待遇，我唔係要呢啲！」
企街賣旗
上週三晚九時，無助手零化妝，孭住背囊儼如學生妹的何超蓮，一到影樓，即跟為她化妝近五年的 Annie G研究自己的豹妝， Annie說：「妹知道為慈善就一口答應，妹反應好快，好適合扮豹。」超蓮聽罷打趣說：「即係話我百厭啦，咁我又真係恃住小聰明搵捷徑，將歪理變真理。」她會走精面，明知三太不准做的事情，都預先向賭王拿免死金牌，「他是 yes man，一定得，不過呢次慈善兩個都不知情，得啦，阿媽只係話我患感冒仲出街，無事啦。」
廿一歲的超蓮，自小受三太嚴厲管教，甚少跟同學出街，試過學校要學生上街賣旗，三太都怕雜阻止，「佢換咗好多銀仔入滿旗袋，等我唔使去賣旗，其實失去意義。後來我求咗好耐，佢知道係喺中環賣旗才批准，阿爸先俾一千打底，住中環的阿姨又到場支持五百元，幾小時籌滿三個旗袋。」
活在象牙塔內，忽然可以走入人群，既新鮮又興奮，「企到攰就搵地方坐，仲要大聲叫先有人應我，我唔怕醜，仲好有成功感。」初中時的超蓮已有不少路人認出，以為有名氣會事半功倍，誰知她說：「有師奶寸我：『何小姐都要賣旗？自己出錢就得啦，使乜出來企。』我都只能笑笑口。」
三太是東華副主席，跟她一起做義工，肯定無口臭友吧？「都係探老人家、派禮物後就走，即係無成效，其實係我陪佢（三太）囉。」千金小姐自言捱得，是實幹型，無奈狗仔隊全天候跟到實，令做義工淪為真人騷，所以她想衝出香港，例如到四川或日本幫手做地震救災工作，「每次阿媽總會 ban，話我捱唔住病倒更麻煩，但我又唔想參加 Unicef，因為似做騷，要我在鏡頭前喊俾大家睇，我估我喊唔出。」所以她只做小型慈善機構，試過帶五歲以下的孤兒去她都未去過的尖東科學館，「一人帶兩個梗係無問題，去乜嘢館？我唔記得邊區，總之有科學展覽。」
軍訓
辣椒仔一名，喜歡跟三太鬥氣，恃住小聰明不讀書，更刻意考試捧蛋，難怪當年三太說過教仔女十分激氣，「我就係要你知我唔要俾人逼，但阿爸知道後話送我返深圳俾共產黨教，接受軍訓，他即場打電話俾國內一位校長， oh my god！你知佢真有能力講得出做得到，我即時怯一怯。」
童年在澳洲長大的超蓮，在嘉諾撒聖心讀中學時始被傳媒關注，「初時俾記者影的感覺好得意，依家就覺得影響我識朋友。」因為名氣大，三太便安排司機、保鑣及保母陪返學，到中四時她跟母親約法三章，不去品流複雜的地區才沒保鑣跟身。後來轉到英國升學，超蓮才能過平民式生活，「去英國後自己揸車、買餸，只租學校附近嘅屋住，阿媽想派保鑣，但我唔想讀書讀到好似出巡，大家都係學生，我唔想有 privilege。」
戴妮廷赤裸老虎
人人影大頭相，唯獨扮白老虎的攝影師戴妮廷（ Eydie）最搏，將身體扭成脆麻花遮住三點，營造赤裸疑雲。雖則她不介意性感，但今勻要剝淨肉色內衣褲，故她在拍攝時要求清場。
一向寓工作於娛樂的她，這晚卻是有苦自己知，事關她最近因工弄傷腰部，要箍腰封定位，但聽到自己被人讚靚，在鏡頭前要扮嚴肅都忍不住大笑搭訕：「我性格可能似老虎咁熱情，不過我是隻不吃肉的老虎，你知我每餐要食好多蔬菜。」
Eydie永遠相機不離手極愛自拍，她連做善事都是與攝影有關。幾個月前她跟契妹、 KEE Club太子女龍殿兒（ Mara）一起到印尼峇里島旅遊，順便為當地的婦女組織拍一輯女人生仔過程， Mara負責訪問，面對血淋淋的嬰兒，她直言影到想嘔，「事前我講明不影過程，最後變成一日影幾個女人生仔； Mara知我不想影就請纓，我哋係用菲林機，影得不好係嘥時間，不如自己頂硬上。」
好多女人見到小朋友都會母性大發，三十八歲仍是單身的 Eydie卻享受獨處時間，「每日工作到八、九點，用個半鐘喺浴室保養身體，然後上 facebook同朋友 chitchat到淩晨三點，三個月來連睇 DVD都無時間，邊有時間拍拖？我不會成世人都單身，感情事隨緣啦。」
胡敏珊閃令銀龍
今次慈善活動的主要搞手胡敏珊（ Christie），裸肩搽油扮風水魚銀龍（龍吐珠），「個個都想揀啲靚嘅動物扮，咁咪由我扮條龍吐珠。其實龍吐珠適應能力好低，人唔應該為咗風水養佢哋，等佢哋可以喺大自然環境繁殖；風水有好多嘢可以擺，如果買條龍吐珠死咗，即係殺生，咁仲衰啦！」
雖然今次主要是想喚起人留意瀕臨絕種動物，但 Christie說其實所有生命都要尊重，「依家啲人有太多嘢食，所以食嘢可以人道啲，因為佢哋都係生命，冇必要令佢哋受無謂嘅痛苦；有次我喺大陸嘅食肆見到張枱中間有個窿，原來係用嚟食猴子腦，真係好唔人道，我淨係聽到都受唔住。」
價高者得
○九年成立的「無盡慈懷慈善協會」，宣揚以仁道宰殺牲畜，是次活動「 Compassion Say It Loud」主要喚醒關注瀕臨絕種動物，由胡敏珊和其他六位名人明星化妝成七種瀕臨絕種動物，以慈善相展形式，在十月一日至七日在銅鑼灣世貿中心展覽，有心人可到場填表作 silent auction競投，結果將於十月七日公布。
.[壹週刊]何超蓮絕種好豹
http://hk8news-e.blogspot.com/2012/10/blog-post_3275.html
