探熱針
過關被扣問話三小時 林小明辣㷫前妻再爆鑊
2012年10月04日林小明趙雪英離婚訴訟拉鋸多時，近日忽然爆出強迫李彩華提供性服務風波。引爆今次醜聞的導火線，純因林小明將在離婚協議上，本供前妻使用的一個中港車牌突然失效，導致當日身在內地的趙雪英，駕車過關時被公安扣查三小時。被前夫暗跣，趙雪英激動說：「四五個人撲埋嚟拍我架車，當時揸車嗰個仲係我，唔知乜事，點會唔驚！」為討回公道，趙雪英決定將事件訴諸法庭。
驚到揸唔到車
在林小明趙雪英離婚多項協議中，包括一架歸趙雪英所有的七人車及中港車牌，但去年一月，林小明失驚無神 cut掉中港車牌，令當時正駕駛七人車返國內睇樓的趙雪英，回港過海關時，被公安扣查入房三小時。
「嗰日朝早我揸車返內地睇樓都無事，到夜晚返落嚟，過海關先出問題，當時四五個公安撲埋嚟拍我架車，話我哋係『非法』，我嗰陣好驚，因為根本唔知乜事。當時仲有幾個朋友一齊喺車度，公安要我扭番架車出嚟，但我驚到扭極都扭唔到，過關嗰度成條車龍，啲人個個望實我，真係好尷尬，好瘀！」趙雪英說。
當時已是淩晨十二時，天氣又凍兼下雨，趙雪英即時致電律師，偏偏又聯絡不上。
「啲嘢係咁，愈心急想搵嗰個人就搵唔到，佢哋扣咗我哋入房問話，因為電腦無曬我啲資料，佢哋以為係偷車，你話點會唔驚。好彩我啲朋友一個喺內地開珠寶公司，一個係地產經紀，佢哋幫我解釋，話我唔係咁嘅人，我哋啱啱先喺內地睇過樓，俾咭片叫佢哋查番。天氣又凍，我又係咁咳，搞咗成三粒鐘先走到！」
當日趙雪英駕駛圖中的白色七人車遭內地扣查，該車現停泊在趙雪英九龍塘寓所。
贏官司捐錢
據了解，在離婚協議書上，訂明這架一直是趙雪英用開的七人車連同中港車牌，都歸趙雪英，假若林小明收回該車，便要付一百萬給前妻，唔願俾錢的林小明，卻一聲不響停了七人車的中港車牌，才辣㷫前妻，將事件訴上法庭。由於離婚協議與阿 Rain解約書是一併簽，解約原因亦得呈上法庭。
「離婚協議書寫明架車同個中港牌係俾我，佢都可以無端端 cut走個牌，可以咁唔講理，我先入稟告佢，連之前佢 cut我有薪假期，都係因為咁告埋佢，我只係想攞番個公道，有薪假期單 case我贏咗官司，攞番嗰四十幾萬，我都全部捐曬出去。」
Rain媽難過
至於被法官形容為受害人的李彩華，爆出被迫做「合約以外工作」，現正在橫店拍攝內地劇《和尚連》，連中秋節亦要開工。
陪住女兒工作兼任經理人的 Rain媽，就林小明於○八年瞞住林太趙雪英，要求阿 Rain做「合約以外工作」，親口承認有此事。
「係嘅！件事係咁樣，當時我個女喺寰宇，係林太一手幫我，林太喺度嗰陣，一切好順利，點知有一日個女喊住同我講，話林生要佢做合約以外，無關演藝工作嘅嘢，佢唔肯，就俾人雪藏！嗰時我唔知林太俾人『架空』咗，咁無嘢做，即是無飯開，即係『聽』死！
「到後來先知佢哋搞緊離婚，我就去搵林太講呢件事。嗰時真係好難過，阿 Rain已經俾人雪咗，無曬收入。當日簽約，我喺林生林太面前講明我個女係唔做任何嗰啲嘢，將來唔好因為呢啲嘢反面，點知最後真係因為呢啲嘢反面！」 Rain媽氣憤說。
錢作怪
林小明與趙雪英○八年爆出離婚，有指導火線是男方暗中轉移女方所有身家，之後再背住老婆，與公司旗下藝人江若琳有「景轟」，二人關係持續惡化。
搭上江若琳
林小明被指與寰宇旗下力捧藝人江若琳關係曖昧，事後林太高調承認離婚，更發表「引蛇入室」論，暗指江若琳是狐狸精。數月後，林小明正式搬離九龍塘大宅，與老婆分居，一對子女則跟隨林太。
侵吞身家
早年投資蛇舌草沖劑生意失敗的林小明，要靠太太趙雪英典當首飾還債，後來二人聯手成立寰宇，東山再起。○五年，趙雪英發現早於九七年辦移民手續時，林小明安排她簽署的文件當中，有一項將趙雪英擁有的所有資產，轉移到一個基金持有，而基金持有人是林小明，受益人是林小明母親何耀莊，未有趙雪英名字。之後二人就離婚分家打官司，雙方最終在一○年三月二十六日，簽訂離婚協議書，連同李彩華解約書一併簽署。
.[壹週刊]過關被扣問話三小時 林小明辣㷫前妻再爆鑊
http://hk8news-d.blogspot.com/2012/10/blog-post_2241.html
