http://hk8news-d.blogspot.com/2012/08/mark-jj.html.
探熱針
Mark實 JJ 親友爆前妻三宗罪 樊少皇：佢趕我阿媽出街
2012年08月30日樊少皇被踢搭上 JJ（賈曉晨）後，再被揭有個一起廿年的「前妻」阿霞，二人並育兩名子女，背上拋妻棄子罪名的樊少皇，隨即發聲明，力撐 JJ不是小三，又澄清他與「前妻」早已分開四年，並稱表示多年來將大部分收入予母子三人作為補償。
樊少皇表妹阿婉亦睇唔過眼，大爆二人分開導火線是阿霞刻薄樊母，經常無理取鬧，連老人家的養老金都要搾乾，樊少皇難忍母親受苦，才決心結束跟阿霞一段拖泥帶水關係。
「佢趕我阿媽出街！」樊少皇說。
姊弟戀
據樊少皇表妹阿婉表示，樊少皇比同居女友阿霞細七年，二人由朋友介紹認識，其後阿霞意外懷孕，不過一直未有正式註冊結婚，而管教嚴厲、希望兒子能成為偶像藝人，反對他拍拖的父親樊梅生知道後，喊打喊殺，並稱樊少皇一生就此玩完，兩父子關係惡劣至今。至於一直夾在中間的樊母，見父子決裂，亦只能逆來順受。
「少皇同阿霞 嘅關係一直都唔算好，佢哋成日嗌交。每次少皇提出分開，阿霞都會攞啲細路年紀細做理由拒絕，直至佢媽咪○七年出事，少皇先堅決要分開。
「當時少皇媽咪因為唔想再同老公個二奶一齊住，打算投靠少皇，嗰時佢已經經常喺內地拍劇，但阿霞唔肯俾少皇媽咪搬嚟住，就算老人家話瞓沙發都得，阿霞都堅持趕佢走，好彩之後有親戚肯收留。」
同居女友阿霞跟樊少皇分開四年，但卻以自己名開了微博轉載他所有新聞，刻意令人誤會二人關係未結束。
謀咗二十萬
拒與樊母同住的阿霞，偏偏謀住對方的積蓄。
「阿霞知道少皇媽咪賣咗層舊樓，有幾十萬養老金喺手後，竟然問佢攞錢，唔俾就冇得見啲孫，又要脅話要自殺，最終係攞咗二十萬。我都叫咗佢唔好聽阿霞電話，事關次次都俾阿霞鬧，不過少皇媽咪怕係啲孫打嚟，所以每次都會接。
「其實少皇好多時會一嚿錢過俾阿霞，其中包括佢俾媽咪嘅使用，但每次少皇媽咪去攞，都好似乞咁，老人家好難受。少皇呢幾年喺內地好少返香港，偶然返嚟探仔女同媽咪都係留一兩日，但佢一直有照顧兩個仔女，近排仲俾咗二百萬阿霞。」阿婉大數阿霞刻薄老人家。
律師處理
記者致電身在青島拍劇的樊少皇，他承認：「佢係趕媽咪走，唔俾媽咪住喺屋企。」
壹：當時點解唔制止？
樊：我就係咁嘅人，到而家都好內疚。
壹：佢問你媽咪攞咗二十萬？
樊：其實係佢叫我問媽咪攞嘅，可能佢覺得媽咪嘅錢即係我嘅錢。先後兩次，一共攞咗二十萬，我同媽咪都頂唔順。
壹：你當時搵唔到錢？
樊：我搵得唔多。
壹：阿霞一直冇做嘢？
樊：係我一直做嘢賺錢養佢哋。
壹：○七年分開之後呢？
樊：衣食住行我都會供應俾佢哋。
壹：聽講你近排俾咗二百萬阿霞，點解要一次過俾咁多錢？
樊：我舊年拍劇賺到多啲錢，所以俾多啲，其實係舊年到今年嘅生活費，我自己好少使錢，希望盡量俾小朋友好啲嘅生活。
壹：係咪搵咗律師處理你同阿霞之間嘅事？
樊：呢啲唔講住。總之，○七年正式分開之後，我同一個內地女仔拍過拖，我有同阿霞講，佢知道亦都接受，所以 JJ絕對唔係小三，我今次拍拖冇刻意同佢講，因為我哋分開咗四年，已經好少聯絡，每次返香港都只係見 啲仔女，所以我覺得唔需要同佢交代，話我哋舊年一齊睇戲更加唔係事實。我後生做錯決定，仲要一錯再錯；分開之後，我唯有盡力補償，盡我嘅責任，小朋友係無辜，我會一直照顧佢哋。
會有將來
樊少皇開腔公告跟阿霞早已結束關係，一直力撐男友的 JJ對樊少皇更加堅定不移。
「我一直都信佢，只要佢企出嚟搞清楚件事，我同佢係有將來嘅。（你知佢曾經有個杭州女友？）佢同我講過，係年幾兩年前嘅事，佢哋一早分咗手，希望啲人唔好混淆視聽。（你而家係咪放心同佢發展？）由拍拖到而家，我哋係冇嘢唔見得光。」
越愛越勇
由被指誤做小三，到男友開腔解畫， JJ一直表現得比樊少皇勇敢，死心塌地，勇！
22/8 心亂期
「我接受唔到！」
上星期樊少皇「前妻」對本刊開腔表態後，被指誤做小三的 JJ情緒崩潰，哽咽回應：「件事唔係咁簡單，所以我好辛苦，如果佢（樊少皇）搞得清清楚楚，我可能會接受番，但呢一刻我接受唔到，所以等佢搞清楚先算。」
23/8 包容期
「愛他的話要勇敢！」
經過一天冷靜，強調自己並非第三者的 JJ，勇敢維護男友。「如果真係愛呢個男人，就要去包容，要勇敢，事情唔係大家想像中咁樣，由始至終佢無呃我！」
25/8 堅定期
「愛得辛苦也堅持！」
樊少皇面對千夫所指， JJ堅定投男友信任一票。「我唔會因為男友往事對佢大打折扣，我拍拖希望有將來，愛得辛苦也堅持，我係佢光明正大 嘅女朋友……到依家冇分過手。」
26/8 勇敢期
「我拿出所有勇氣！」
「樊太」繼續背後發功，以四張戲票「證明」去年仍一家四口去睇戲，與樊少皇無分開。 JJ在微博有感而發：「我不勇敢！我已拿出了我能夠拿出的所有勇氣！」
