http://hk8news-d.blogspot.com/2012/08/eason_30.html.
同你吟一吟
Eason追落後大把貨
2012年08月30日上星期五（八月二十四日），陳奕迅喺亞洲國際博覽館開 show，只做三場， Eason一樣 high，曬腩自摸，公開同男 dancer嘴嘴講鹹嘢，又跳又瞓，尾場仲大贈送唱多四十分鐘，完全冇將未好番嘅左膝傷患放喺心上。
Eason台上自娛，台下睇 show支持嘅老婆徐濠縈，同老豆陳裘大，同樣興奮到企曬起身。
尾場第二日星期一（二十七日）， Eason又要起程飛杭州繼續做巡迴演唱會，荷包腫脹發過豬頭，但佢就話比起張學友一年半巡迴百幾場，自己只係得六十幾場差好遠，仲嗌大家唔好再話佢係對方接班人。「我唔係接班，而係同佢（學友）一齊上班啫。」
嘩， Eason，咁謙呀？有錢齊齊搵係啱，但話曬學友大閣下十三年，你大把貨（時間）追落後啦！
