http://hk8news-d.blogspot.com/2012/08/blog-post_5133.html.
冇數講
上限三天 日做六小時 李嘉欣鐵規不二
2012年08月30日李嘉欣做了媽咪之後，選擇性接 job身價有升無跌，今年她以 1,800萬續約為 Shiseido亞洲區代言人，並先後於年初及七月飛到日本，開記者會拍廣告，嚴守行程三日制，以免同囝囝小 JM分開時間太長。日前兒子因出疹發高燒多日不退，靚媽嘉欣擔心到晚晚唔敢瞓，並自嘲如此緊張，好易變抑鬱。
千八萬續約
產後工作量不多的李嘉欣，凡事以兒子考慮為優先，價錢條件其次。
「有咗小 JM之後，嘉欣真係推咗好多 job，又堅持親自帶囝囝返 playgroup，一個星期三日，另外仲要陪囝囝去遊水，雖然冇曬自己時間，但佢話要分享兒子成長每一刻，所以好多 job佢都唔接，搵佢做嘢，有錢俾都無用。」嘉欣身邊人說。
今年初，李嘉欣以一千八百萬續約合作多時的 Shiseido，她之所以願意繼續為品牌代言，也是因為對方配合，訂明出埠工作，絕不多於三日。
「佢同 Shiseido日本總公司約法三章，合約註明每個 job出埠唔可以多過三日，今年一月嗰次去日本拍廣告，廣告公司都專登改 plan，由原先四日行程縮減成三日兩夜，每日工作亦唔可以多過六小時。」
收工有早冇遲
雖然要同寶貝仔分開幾日，但對同日本工作人員合作，李嘉欣亦讚不絕口。
「日本人做嘢好嚴謹同細心，好早就喺嗰邊安排好曬，成個拍攝隊有五十人，分工好仔細，我喺 studio化妝、食嘢、休息全部分開房，絕對唔會混亂，事前準備做得好，所以每日都會比原定時間早收工，仲有時間可以去行街。」嘉欣說。
每次出埠工作，嘉欣說小 JM都會守在一旁，看著她執行李，亦會親自送媽咪出門口，而且從不扭計。
「佢好獨立，唔似一般小朋友見到媽咪出街，會扭計喊曬，唔俾媽咪走。通常我會同佢講話媽咪去做嘢，佢會好乖咁同我 say goodbye，之後自己就繼續玩！我都覺得好神奇，佢只係得歲半大，但就好懂事。」嘉欣表示反而是自己唔捨得，見少一日，都心掛掛！
出疹唔退燒
日前，小 JM因為出疹，已經連續幾日發高燒，緊張媽咪嘉欣即使明白這是小朋友必經階段，依然行不安，坐不樂。
「每次出埠，嘉欣每日都會同個仔 facetime幾次，否則，佢會無辦法集中精神做嘢。
早幾日，小 JM出疹唔退燒，嘉欣擔心到唔敢瞓，情緒好低落，佢老公安慰佢唔使擔心，話有醫生睇住，但都冇乜用；原本我哋有啲工作會議要開，但嘉欣都無心情，話唔想離開屋企，要陪住個仔，好彩之後退咗燒，佢先放鬆到。嘉欣仲講笑話，擔心自己太緊張個仔，會有抑鬱！」知情者說。
親子樂
自從誕下兒子許建彤（ Jayden Max）後，李嘉欣專心做廿四孝媽咪，她的微博盡是兒子生活近況。
2012年 14/8 帶住歲半的 JM到海港城參觀叮噹展覽，小 JM見到巨型叮噹，表現興奮。
17/7 在 BB床上著住背心睡衣的 JM唔俾媽咪拍照，十分得意。
8/6 李嘉欣上載與 JM行沙灘的溫馨相，並留言：美好的黃昏， JM很快樂。
25/2 許晉亨生日，李嘉欣為老公舉行生日派對，並上載了一張 JM眼仔碌碌的近照。
11/2 剛剛一歲的小 JM學行路，李嘉欣興奮留言：不要扶我，跌倒又如何？
2011年 25/12 去年聖誕節，李嘉欣與子齊齊穿上紅色聖誕裝。
11/2 剛剛誕下小 JM的李嘉欣，未出院已急不及待在微博上載兒子的照片，熟睡的 JM只露出側面。
