媽咪姐手帳
呢幾日LINE呢個smart phone 新app真係搞到滿城風雨！上星期四（13日）開始，有唔少人已喺facebook勁推LINE呢個新app，而媽咪姐都喺班靚太朋友熱烈鼓勵下，裝咗！然後大家就互send啲cute爆嘅貼紙，跟住仲有陌生人喺LINE上同媽咪姐say hi！嘩，都真係有啲驚㗎！但本住唔理佢就無事嘅心態繼續用，點知星期六晚（15日）開始傳言四起，一時話每句訊息都當SMS咁收費。
跟住TVB新聞有報道，話用LINE會外洩手機資料。於是人人自危，瘋狂剷走LINE，又不斷透過facebook、whatsapp叫家人親戚朋友一齊「大逃亡」！之不過，一日之後，LINE嘅日本發行商就發聲明話唔會濫收費，私隱亦都有保障。噓……於是好多人剷完又裝番；亦有人選擇觀望。有人形容今次好似盲搶鹽事件，話香港人好無知。但講真句，依家乜都用smart phone，大家好多時打字多過對話，個個裝新app，你唔裝？實俾人笑你out！同一道理，好似阮兆祥所講，一晚有幾十個朋友whatsapp你，叫你要剷走！你唔剷？係咪唔信朋友先？
唉，媽咪姐實際啲，只知道一走入網絡世界，其實等同透明人間。莫講話facebook同whatsapp唔係十足保障到私隱，就算只係用iPhone，報紙頭條都話可用特定程式去追蹤！
不過，都係嗰句，任何app同程式都係死物，而人係生嘅！做乜之前，都諗清楚可能出現嘅後果。OK咯！咪go ahead。呢次，其實係一個警示，教大家點樣做人，實際過乜嘢2012末日預告囉！ ####
老公，今次你勇過我喎！（設計對白）
丁太楊千嬅喺微博見到傳言，即刻驚到delete，但做開PR嘅丁生無有怕。
仲用緊呀！有noise先好玩！
希望花開富貴啦！（設計對白）
思琦妹戀上空心老倌，要自食其力勤接job，幾驚都要同外界聯繫！最多唔擺樣，攞支花做icon囉。
我delete咗嘞！乜你仲見我咩？（真實對白）
阮兆祥好有heart，用張靚靚graphic相做icon，仲有金句！但幾日前跟大隊，剷走LINE，諗住睇定啲等多人用時，先再裝。
有陌生人send嘢俾我呀！有時間都可以傾兩句！（真實對白）
莊思敏最勇！話用LINE當微博咁玩。唔同嘅電話號碼，仲用唔同嘅相做icon㖭！
丁生無有怕，另一天後老公張繼聰亦勇字當頭，而且有樣有真相。
型呀！
童星出身嘅王書麒，依然童心未泯，用超人做icon。
我最cute！
「宅男女神」趙碩之呢次無騷胸，嘟嘴冧fans。宅男都應該buy啩！
847期
