名氣街
社交圈靚人特別多，要高招搶鏡，個個花盡心思。一年一度的「莎莎婦女銀袋日」於周日（16日）舉行，城中名人傾巢而出，大玩帽子戲法，位位變身淑女紳士，一味鬥靚鬥搶。出名玩得喪的九巴後人雷禮權與太太利蘊珍，每次出動都整色整水，今次以印第安造型出場，搶曬收視。著名形象設計師黃欐堯Celia說：「戴帽唔係求其放上頭，要襯過先得。咪以為戴帽唔使整頭，一樣要整得乾淨企理先見得人。」一班ball場扮嘢達人請接招。
雷禮權伉儷 紅番上身
利孝和夫人女兒利蘊珍同老公雷禮權（William），扮嘢夠出位於社交圈無人不曉，由衣服到飾物都標奇立異，鬼咁合拍。兩人今次以印第安造型出場，齊戴七彩羽毛上頭，sharp盡全場。William話︰「頂帽喺南美洲土著部落用幾百蚊美金買，唔重㗎，羽毛重咪飛唔起。」攞完「最合襯衣着大獎」，William笑笑口︰「年年都好客氣㗎。其實屋企買定好多帽，不過都唔敢影相放上facebook，因為怕俾人偷曬嚟登。」
Ana. R 風騷淑女
Ana. R以時裝表演監製現身馬場，狀態fit爆，提到舊愛周立璟結婚，她亦不甘示弱，自爆有人追，「佢係奧地利籍，叫Mr. R。佢今晚會煮飯俾我食，我哋仲係朋友關係，有叫佢小心狗仔隊。相處咗兩個星期，佢對我好好，令我心花怒放！」
龐郭秀雲 紫紅芭比
鋼鐵大王新抱郭秀雲，近排忙住搞保護動物活動，甚少以lady look見人的她，一襲紫色短裙露出雙腿示人，「我覺得呢個活動每年都似Halloween，好似今日我就成個barbie咁。我平時冇可能咁樣出街，搵槍指住我都唔會咁着。」今次難得着到行撐場，夠曬俾面。
蔡李惠莉 英倫氣派
玩具大王蔡志明太太蔡李惠莉，每次出動都打扮到行，今次亦唔例外。因蔡生與囝囝加讚出國公幹，她單拖撐場，由頭到腳襯埋全套棗紅色示人，「今日頂帽係搵人訂做 。」
唐尤淑圻 紅衣當旺
唐英年母親唐尤淑圻活躍社交圈，紅噹噹現身馬場，支持愛駒「雙辣」，全程走來走去滿場飛。最後愛駒奪得冠軍，拉完頭馬的唐太，風騷過人，笑住口話︰「我都好幾年冇拉頭馬喇！」未知是否怕老人家講多錯多影響個仔，唐太未講完，身邊人已將她拉走。
郭詩慧 孕味少婦
莎莎太子女郭詩慧（Melody）08年尾下嫁威威洗衣粉太子爺陳振邦。穿上Tsumori Chisato鬆身裙的Melody，甜到漏宣布喜事，「依家ＢＢ就嚟4個月，口味亦冇大轉變，魚生、大閘蟹我都照食。早餐就比較豐富，有一茶匙燕窩，生合桃3粒、嘉美蛋2隻、焗芝士多士一塊同熱鮮奶一杯。」上流社會生活大概如此。
Celia Profile
著名形象設計師黃欐堯Celia，曾任陳慧琳、謝安琪、孫耀威、江若琳等藝人的形象設計，參與不少唱片封套形象設計及演唱會形象指導。出過書教人扮靚襯衫，近年主力負責美容指導及個人形象。 ####
Celia評︰「呢個紅番look幾得意。雷太襯咗條民族feel嘅裙好特別；雷生用西裝襯呢頂帽，做出mix & match嘅感覺。兩位連袋都襯埋一致，好夾。」
印第安造型標奇立異，一班名人爭相潮拜。
這個印第安造型其實一早見街，但咪理，獎照攞。
雷太去年在化妝舞會扮過阿凡達，驚艷社交界。
去年同一活動，雷氏伉儷就玩巨型雞冠帽，奪得「最佳頭飾獎」。
52歲的雷禮權乜都夠膽試，早前就試過戴上bling bling閃石牙套出街。
Celia評︰「Ana呢個打扮好lady，好做番佢自己 look，裙同帽好夾，girlish得嚟又唔會好過火。不過冇件冷衫仔會好好多，依家怪怪哋。」
舊愛周立璟上周六（15日）在君悅酒店擺酒，迎娶巴西女模。
Celia評︰「佢揀嘅顏色好靚、紅撞紫好sharp，不過頂帽誇張咗少少，同條裙唔太balance，視覺上成個人會巨大咗啲，襯長裙可能會靚啲。」
Celia評︰「蔡太成身都好sharp，呢個棗紅色tone好好睇，感覺貴氣，做到英國有氣派嘅淑女味。」
Celia評︰「唐太件紅色上衣同整個look都唔襯，個cutting又怪怪 ，顯得佢肥 ，有啲九唔搭八，好過氣。如果襯成身黑白會比較好。」
Celia評︰「Melody個粉紅淑女look好順眼，感覺舒服，頂帽同條裙簡直係絕配。」
847期
