娛一叮
33歲的林嘉欣（Karena）上年與廣告導演袁劍偉（Steve）在溫哥華閃婚，同年誕下女兒Kayla。今年六月，嘉欣低調回流返港，唔使老公加港兩邊走。眨吓眼Kayla已經1歲，嘉欣貫徹低調作風，唔似黎姿幫孖女在半島大搞超豪生日，上周二（11日），選擇在淺水灣一間餐廳，為囡囡搞生日會。生日會只有嘉欣一家三口加個外傭，雖然蚊型但溫馨搭夠，嘉欣話唔想女兒太過物質主義：「我唔想個女有公主病，簡簡單單慶祝就夠。」她當日親手為女兒做了個少甜香蕉蛋糕，記者雖然冇份食，但睇到都覺得好甜。
林嘉欣去年暫別影圈，飛去溫哥華秘密結婚與安胎，女兒Kayla出世後一直做全職媽媽，而丈夫袁劍偉則香港、加國兩邊走。今年8月，林嘉欣被影到秘密返港入住赤柱獨立屋。
即場教英文
轉眼間囡囡Kayla已1歲，上周二(11日)，嘉欣在淺水灣的「Spices Restaurant」餐廳為囡囡開了一個生日會。當晚7時左右，嘉欣抱住Kayla，與袁劍偉及外傭到達餐廳。囡囡雖然有BB櫈坐，但她很快就表現得不耐煩。食飯期間Kayla突然扭計，嘉欣即抱起囡囡外出散步，絕不假手於工人。兩母女在餐廳外已關門的店舖window shopping，嘉欣即興充當老師，用英語同囡囡逐一講解櫥窗內的物件，Kayla就上了一課親子英語堂。其實嘉欣早一個月已為女兒籌備這晚的小型生日會。據餐廳職員透露：「林小姐好早就book咗張細枱，原先預定坐露天位置，不過當日落雨冇辦法，要坐番入室內。佢訂位時已講會拎個自製蛋糕嚟 ，仲叮囑我哋幫佢餐後整番熱先上 。」記者事後致電給林嘉欣，她表示女兒的正日生日是在10月15日，因當日老公袁劍偉要工作，故提前慶祝。嘉欣說：「要就爸爸做嘢 ，所以提前同囡囡慶祝。（點解唔大搞？）我想Kayla做個普通嘅快樂小朋友，唔想佢自細就咁物質，亦唔想佢有公主病。我嘅生活都好平凡，我會用身教去教囡囡，希望佢知足。一家人慶祝已經好開心啦！我仲親手焗咗個少甜嘅香蕉蛋糕俾Kayla，佢都有份食 ！」
復出夥拍子華
當晚所見，嘉欣的確消瘦了不少，她直認為復出作好準備：「Steve（袁劍偉）話只要工作同家庭生活都安排得好，拍戲冇問題。不過囡囡快要上學前班，我想親自陪佢上堂。依家我喺屋企都日日教佢英文同認字，呢個階段對佢成長好重要，所以就算復出都有條件㗎！咩都要以個女為先。(係咪會客串黃子華嗰套舞台劇《野豬》？)係呀！已經綵排緊。不過詳情你問番主辦單位啦！」據知嘉欣今次肯為舞台劇客串，全因俾面恩師詹瑞文。知情者透露：「原先嘉欣打算等Kayla三歲後先復工，但甄小姐（詹瑞文太太甄詠蓓）開到聲，即時挑起佢條戲癮。梗係啦，甄小姐為嘉欣特設彈性綵排時間，星期六、日唔使綵排，平日綵排唔超過4個鐘。嘉欣可以過戲癮之餘，又有時間湊女，點會唔應承喎！聽聞嘉欣仲唔收分毫幫手 ！」唔收錢復出，睇嚟呢位影後戲癮真係好大喎！
嘉欣低調人生
95年進軍娛圈的林嘉欣，雖然已屢次做過電影女主角，但除了宣傳，嘉欣從不高調，戀情更做足保密功夫，與張洪量、陳輝揚和現任老公袁劍偉拍拖都好神秘。去年秘密在加拿大結婚、生女，嘉欣都盡量低調。就算上周二為囡囡慶祝生日，冇發相、冇大事宣揚，繼續過其低調人生，相比起經常抱B高調出巡的其他女星，嘉欣深得民心好多！ ####
溫馨拆禮物一家三口帶埋工人到淺水灣一間餐廳為Kayla慶祝1歲生日，雖然人少少，不過場面勁溫馨！
扭計即抱囡囡扭眼瞓，嘉欣即抱起她呵番，嘉欣個樣好慈母喎！
企定唔走小朋友都係坐唔定，11個月大時已識行的Kayla走出餐廳到商場睇玩具，仲睇到眼甘甘唔願走。
老竇出手只有一歲的小Kayla，始終未適應戶外活動，在嘉欣懷中爆喊的她，即獲老竇袁劍偉上前𡃁番
代吹蠟燭生日又點少得吹蠟燭，不過今年嘉欣就先代Kayla吹，到下年2歲，Kayla應該自己識吹啦！
七情上面其間嘉欣送上禮物，並代Kayla打開，只見嘉欣表情豐富，仲開心過囡囡，但囡囡似乎唔知咩事仲想喊㖭！
上周二（11日）生日會中，剛滿一歲的Kayla已經可以自己拎起水杯飲水，好叻女喎！
回港已有一段時間的林嘉欣，早前專登抽空，搵埋好友蔡美詩去睇林憶蓮演唱會。
嘉欣復出首項工作是與黄子華合作舞台劇。對於黄子華被傳患抑鬱症消瘦，嘉欣話：「佢向來都瘦喎！唔覺佢有病。」《蘋果日報》圖片
匿埋生女
秘密結婚
847期
