《神槍狙擊2013》周海媚徐子珊爭做女一
忽然1周 第915期
娛聞樂
新劇爭做女一 海味嬲爆：女主角唔係我咩？ 子珊得戚：我由頭帶到尾！
經無綫多次力邀，周海媚（海味）自 08年拍過《蔡鍔與小鳳仙》後，近日回巢為新劇《神槍狙擊2013》趕工。傾《神》劇時，無綫承諾海味係「第一女主角」。海味對新劇亦甚為重視，不僅推了過百萬內地工作，又月花 2萬多租住酒店式住宅方便拍劇。
不過，無綫為捧徐子珊，竟過橋抽板，暗中狂加子珊戲份；而海味的戲份由第 15集開始就大減，擺明借老戲骨捧自己親生女。
海味對戲份被刪，又驚又嬲︰「乜女主角唔係我咩？」至於升格變「女一」的徐子珊就風騷話︰「我個角色由頭帶到落尾。」
有咩改變，應該話番俾我經理人知囉！（真實對白）
被問到戲份被刪，海味心情即刻轉壞。至於子珊被問到獲加戲份時，就笑曬口。
1月 15日，海味在沙田為新劇《神槍狙擊2013》趕戲，記者上前問她辛唔辛苦？海味仲笑笑口話無綫好錫住佢，捱兩日廠會俾佢唞番。但當記者問她是否由主角變配角時，原本心情大靚嘅海味明顯躁爆，更緊張地將聲線提高︰「乜女主角唔係我咩？點解你會咁問？（傳cut咗你啲戲，加咗落徐子珊度！）我唔知喎！冇人通知我！公司有咩政策改變，應該要話番俾我經理人知囉！我覺得冇呢回事！」
至於得米的徐子珊，被問到在《神》劇「坐正」做女一時，明顯避重就輕，但就自認戲份重：「我真係唔知喎，劇本未出曬！（你同海味邊個多戲啲？）你問監製啦！我淨係知套戲入面我好八卦，個角色由頭帶到落尾，有大量動作場面。戲份多少我唔介意，最緊要角色有發揮。」
雖然暗爭戲份，不過上周四（ 31日）一見到記者在場，海味主動行埋子珊度傾偈，但子珊卻面露尷尬神色。始終薑係老嘅辣。
同場徐子珊都有一幕追逐跨欄戲，對第七次演差婆的她，自然冇難度。
遷就海味進度慢
其實無綫最初搵海味拍《神槍狙擊2013》，是想她做女警，不過海味厭倦再演差婆，於是監製關永忠替她度身訂做一個保險經紀角色，與張兆輝及徐子珊發展三角戀。為免曾患紅斑狼瘡的海味工作過勞，承諾她每日拍攝時間十小時，而且極少捱夜。海味眼見早前和張兆輝拍大陸劇《四大名捕》合作愉快，於是再度回巢。
「導演唔敢拍得太長時間，怕海味頂唔順。不過事實依家啲劇好趕住出街，咁 嘅進度，會令廠期延長。無綫於是暗中刪走唔少海味戲份，將徐子珊嘅戲加重。海味 嘅戲集中頭嗰 14集，反觀徐子珊個角色就貫穿全劇，戲又搶又有發揮。邊個至係第一女主角，唔使多講啦。」知情者說。
呢場戲講子珊追海味，海味情急下跳天橋走人，雖然地下鋪曬墊同紙皮箱，但都成十幾呎高?！
臨時親跳
無綫為海味準備咗替身（小圖右），不過海味臨時決定自己跳。
跳咗三次
拍攝呢場戲，海味親自跳咗三次，更瞞住經理人，佢話如果經理人知道，實會鬧死。
穩袋百三萬
當日海味同張兆輝早上十時許已到圓方附近的行人天橋拍劇。跳橋前海味表現淡定，同張兆輝玩自拍。
海味一集收 5萬，拍 26集 嘅《神槍狙擊 2013》，百三萬袋袋平安。不過海味在內地做慣一姐，當然不忿淪為配角。
為了爭回女一，據知事後海味曾透過經理人向無綫詐型。此外，很多動作戲她都肯親身上陣，把握機會搶鏡。上周四（ 31日），有場戲講述海味被子珊追到要跳天橋。原本無綫為她準備了替身，不過海味臨時拒用，更親自跳了三次，博得工作人員連串掌聲。雖然兩位女角暗爭戲份，但有記者在場，海味與徐子珊亦好識做坐埋傾偈，戲裏戲外鬥好戲！
被問到海味是否冇得做女一，監製關永忠話：「今次係雙生雙旦，海味同張兆輝段感情係細水長流，而子珊就犧牲自己，個結尾我仲度緊，總之佢兩個都係女主角。」嚇，咁都得！唔知海味收唔收貨。
收視保證
海味過往主演的劇集都有收視保證， 97年憑《大鬧廣昌隆》的小芙蓉一角，令人印象深刻，收視高開 45點，是當年收視之冠。就算收視較差的《蔡鍔與小鳳仙》最高亦有 35點。
97年 《大鬧廣昌隆》
最高收視 45點
海味飾演惹人憐愛的女鬼小芙蓉，和飾演「大隻廣」的林家棟有一段糾纏兩世的感情。
98年 《天地豪情》
海味在劇中飾演黃日華女友，由於故事主線集中在羅嘉良、張家輝及陳錦鴻身上，是海味少數不起眼之作。
最高收視 38點
09年 《學警狙擊》
最高收視 43點
在《學警》系列第三輯，海味飾演黑道大家姐芯姐，周旋於苗僑偉和林利之間，最後被苗僑偉狠心殺死。
09年 《蔡鍔與小鳳仙》
最高收視 35點
海味首次和劉松仁合作，飾演名妓小鳳仙。劇情被指與史實不符，不過劇集卻賺得師奶熱淚。
.《神槍狙擊2013》周海媚徐子珊爭做女一
http://veryy8.blogspot.com/2013/02/2013_8.html.《神槍狙擊2013》周海媚徐子珊爭做女一
http://veryy8.blogspot.com/2013/02/2013_8.html
