2012年8月30日星期四

吳卓羲失戀刪微博

2012年08月30日

藝人玩微博玩上癮，就連公布生仔結婚發聲明都響微博搞掂曬。不過，微博都有壞處，正如吳卓羲，當日俾張馨予入錯微博上錯床，搞到情侶關係公諸天下；但呢段中港友好關係，已經俾張馨予同內地男藝人李晨認拍拖，正式一刀切！偷食富家女，吳卓羲箍煲徹底失敗。

九月二日係吳卓羲三十三歲牛一，俾女飛，好在班 fans有心，安排佢同八月三十日生日嘅楊怡一齊搞 party。提到舊愛火速結新歡，吳卓羲表明立場唔想再提張馨予，仲話自從換咗新電話，冇 download同玩微博好耐，又係嘅，無謂舊地重遊，睇番張馨予用佢戶口發床照個微博，眼寃啦！

六月尾吳卓羲最後一個微博留言，係講佢同張馨予拍拖好開心，希望外界支持，唔少 fans叫偶像就算唔再玩微博，都無謂保留呢個留言。

速遞卡地亞戒指俾張馨予箍煲，不過都唔夠情敵李晨硬淨，吳卓羲仲話以後都唔會再提前度。