http://hk8news-d.blogspot.com/2012/08/49.html.
娛頭
婚前大咬 49% 蒙嘉慧出口術吞身家 伊健落閘：請去旅行就冇所謂
2012年08月30日早被本刊踢爆明年一月結婚的鄭伊健，終於親口公開承認明年做老襯，同拍拖七年的女友蒙嘉慧畫龜註冊。
「蒙麵戀」修成正果，但可以坐正做麵嫂的蒙嘉慧仍未心足，正在趕拍新劇《仁心解碼 II》的她，更有意無意間向同劇演員方中信楊怡等透露，伊健名下公司已加埋她的名，佔股更高達 49%，出曬口術，企圖逼伊健分身家。
蒙嘉慧先斬後奏，伊健馬上落閘澄清：「我無呀！我哋財政獨立，平時請去旅行就無所謂！」
羨慕邵美琪
眼見身邊唔少好友輪住結婚生仔，一直不願意受婚姻約束的鄭伊健終於受到感染，萌起結婚念頭。週一（八月二十七日）演唱會慶功宴上，伊健親口證實明年結婚。「好快嘞！」而一早被本刊預告婚訊的蒙嘉慧，揸住準鄭太入場券，心情更加好到不得了。
「阿 Yo恨咗好耐，伊健答應結婚，佢不知幾開心！之前俾你哋（傳媒）爆咗件事出嚟，但佢都忍住，出到嚟又同伊健口徑一致，唔講結婚，另方面，佢又會話講得多驚男友唔鍾意，想認但唔認得，佢最知伊健性格，愈叫愈走嗰種，男友唔講佢唔可以認，依家終於得咗！」伊健身邊人說。
未來麵嫂表面上對男友千依百順，但私底下亦有頗多怨言。
「以前伊健唔想結婚，阿 Yo成日呻話自己三十幾歲，啲朋友都結曬婚，伊健就成日掛住玩，俾唔到安全感佢，仲有，拍拖咁多年，兩個都係財政獨立，唔似得前前度邵美琪，可以同伊健聯名持有物業，呢件事，阿 Yo都好耿耿於懷！」
錢唔過女人手
當年鄭伊健與邵美琪拍拖，每次買樓均會聯名，部分物業更只寫邵美琪個名，直至二人分手，伊健更將大部分身家，撥歸邵美琪。
「 Maggie件事，對伊健打擊好大，並唔係因為 Maggie分咗大部分身家，佢成日覺得，錢無咗可以搵番，只係感情好多嘢控制唔到，改變咗，不過伊健身邊班兄弟，就成日提醒佢，唔好再學以前，唔可以再同女朋友聯名持有物業，佢死黨錢國偉仲叫伊健有錢唔好過女人手，所以阿 Yo都唔係好鍾意 Wilson，但佢又管唔到！」伊健身邊人說。
為進一步爭取控制權，蒙嘉慧未入門已經有動作。正在趕拍無綫新劇《仁心解碼 II》的她，有意無意地向劇中演員放聲氣，指伊健已將名下的公司，加入她的名字，佔股量更多達百分之四十九。
「阿 Yo同方中信、楊怡都幾傾得埋，喺佢哋面前都認咗會結婚，只係冇講日子，有次仲好突然咁自爆伊健已經將啲公司加曬佢個名，俾咗 49%股份佢！」知情者說。
借方中信把口
八月十五日，蒙嘉慧接受無綫《東張西望》訪問時，亦故意借方中信把口，向外透露伊健加名一事。
「無端端講呢啲嘢，咩居心大家心知肚明，佢咁做，無非想借其他人把口，逼伊健將自己啲物業同公司加埋佢個名。節目出街之後，伊健身邊朋友同屋企人，都覺得阿 Yo立心不良。」
根據土地註冊處資料顯示，鄭伊健現持有南灣及黃埔花園共值四千多萬的物業，均由他開設的 E-House Production Ltd持有，而 E-House 100%股權，亦只得鄭伊健一人擁有。上週五（二十四日），鄭伊健開始一連四場演唱會，應該要趕劇的蒙嘉慧，一早向監製請足四日假，日日出現紅館，在後台滿場飛，以女主人身份幫伊健招呼親朋好友。
「無綫套劇拍得都好趕，監製話將就兩日無問題，但係阿 Yo企硬，講明就算監製唔放人，佢都要走，監製都無佢符！」知情者說。
示意唔俾上台
本週一（二十七日），伊健演唱會尾場，一班《古惑仔》兄弟上台逼供，陳小春更大膽到請蒙嘉慧上台，只見伊健即時面色一沉，男友冇話 OK，台下的 YoYo黐住張櫈唔敢輕舉妄動。「我喺舞台上會盡量滿足大家，但我同女朋友嘅私人感情，俾番啲私人空間我！」伊健堅持唔請女友上台。唔刻意在台上製造高潮，去到慶功宴，伊健才親口承認結婚：「好快嘞！係出年！」
至於蒙嘉慧不斷向身邊人出口術，聲稱伊健已經在公司加上她的名字，他即時落閘否認：「我無呀！我無呢啲嘢！我哋財政獨立，平時請去旅行無所謂；其實佢都話一定要做嘢，自己搵錢！佢唔會計較呢啲嘢嘅！」
冇句真
外表斯文柔弱，入行近 20年的蒙嘉慧，事業一直未見突出，人緣更麻麻，早前被踢爆大話連篇，虛報年齡兼一腳踏兩船，堪稱表裡不一。
一腳踏兩船
07年，蒙嘉慧與伊健已拍拖半年，但她一直與一名在加拿大做飲食生意的有錢仔 Michael暗交，對方更買定鑽戒豪宅諗住結婚，點知 YoYo瞞住對方同伊健來往，確定同伊健有機會繼續發展後，才起飛腳向對方提出分手。
報細年齡
去年拍完劇集《 ATF反恐》收工回家期間，蒙嘉慧駕著伊健過百萬的 Range Rover座駕，在將軍澳道炒車，人雖然冇事，卻被踢爆原來一直虛報年齡。根據官方資料顯示，她是 1975年出世，但實際是 1973年，報細了兩年，現年 39歲。
人財未必兩得
唔少身家豐厚的男藝人，婚前已將財政大權轉交另一半，以示不二心！不過，結婚多年仍堅持錢留喺自己身邊，老婆冇錢過手的，亦唔少！
劉德華
有近 20個物業揸手的劉德華， 04年起逐漸將財政大權轉移到一個名為 Capital Development Limited的海外公司持有，包括原本由劉父持有的兩個嘉多利山物業，有指該公司的大股東是朱麗倩。
李克勤
06年與盧淑儀結婚的李克勤，早於婚前已將旗下的兩間公司，包括威利代理有限公司及集勉有限公司加上女友的名字，各持一半股份，現在二人共同持有龍湖別墅、北角兆華大廈及壽臣山曉穎花園等物業，市值近 1億。
陳奕迅
Eason與徐濠縈同居多年，直至 04年阿徐懷有女兒陳康堤後，二人才拉埋天窗，一直有經濟支持女友的 Eason，亦早將手上的 Top Dragon Investment Limited加上對方名字； 01年，二人用公司名義以 2,242萬購入大坑嘉崙臺單位， 08年以 3,550萬售出，賬面賺 1,308萬。
黎 明
身家豐厚的黎明， 05年與樂基兒撻著， 08年結婚，婚後黎明並未有將財產進行轉移，就連現居的上水雙魚河愛巢 St. Andrews Place獨立屋，亦是黎明於 07年以 4,800萬購入， 09年他再以 3,500萬購入同區禦林皇府獨立屋，同樣由他個人持有。
郭晉安
郭晉安與歐倩兒 06年結婚，先後誕下一子一女，郭晉安手上的物業全部冇老婆份，包括一家四口現居，市值二千萬的匡湖居洋房，另外 09年購入的太古城單位，也由郭晉安所持有。
大教 訓
92年，鄭伊健與邵美琪拍劇集《九反威龍》撻著，女友 96年患上肝病，他承諾照顧對方一生一世，更將手上大部分物業都加上邵美琪名字； 99年二人分手，伊健將物業全數轉贈邵美琪作補償；但其中有兩個單位要蝕賣。冇咗一大截的伊健，自此資產全部唔過女友手。
