http://hk8news-d.blogspot.com/2012/08/24.html.
主頁>娛樂圈 >娛樂追擊>患難與共24年 劉嘉玲揭偉仔兩度崩潰秘史
午後的上海，陽光灑進昔日大亨杜月笙四姨太的故居，站在陽台上的劉嘉玲，輕倚欄河，秋波淺笑，流盼一派強者風範。由地面抬頭仰望她時，總有一點點距離感。
「我其實係一個正氣嘅人，性格又開朗，如果你真真正正認識我，你係會接受我呢個人。」
訪問期間，說到笑話時，她會率性仰頭大笑。提起亡父時，眼神會流露愛得太遲的悔疚。談到梁朝偉，她清楚記得，這些年月當彼此神傷痛哭時，另一半總會靜靜地留在身旁守候。
一份情，兩顆心，廿四年相知歲月，劉嘉玲無論走哪一個方向，梁朝偉都說著同一個祝福：「只要你開心和安全便好。」
百世修來同船渡，浪奔浪流，情事總上心頭。
「在這個世界上，很難找到一個人，像他般懂我。他心裏很清楚，我對他是怎樣一回事，很多事用言語是不能表達的，尤其是感情。」
不言不語，也可以溫柔。這兩句梁朝偉的歌詞，劉嘉玲最懂。
○八年七月，二十年愛情長跑，畫上圓滿句號，百人見證，不丹完婚。
聽風者
「如果有一天世界已改變，當滄海都已成桑田，你還會不會在我的身邊，陪著我度過長夜？」梁朝偉曾在歌曲中這樣問道，劉嘉玲會在微博甜蜜地稱梁朝偉是自己的最後一個男人，隔空傳情，只因聚少離多。
「我哋由day one到依家廿幾年都係咁相處，佢拍戲，我做嘢，各有各忙，可能幾個月先見一次，靠電話互報動向同平安，但我哋已習慣咁嘅模式，唔會去騷擾大家。
「好少女仔可以似我咁自由自在，做自己鍾意做嘅嘢，又唔使擔心老公會發我脾氣，投訴我。」
梁朝偉愛靜，喜獨處，不用拍戲時愛一個人出海，凝望雲的變化，或在花園修剪樹木，聽風聲鳥叫便是一天。
童年的梁朝偉，父親一早走了，單親生活令他變得內向自我。劉嘉玲十五歲時，父母從蘇州帶她來香港定居，滿口鄉音飽受歧視。兩顆寂寞的心，自然容易走近。
「呢個世界，冇乜人可以同佢做到朋友，亦冇乜交往。就算我介紹佢去一間餐廳食飯，佢就會一路只去呢間食飯，基本上佢係唔會點改變，直至我再介紹另一間餐廳，佢試過覺得好喇，先至會轉。
「佢係一個鍾意safe（安全感）嘅人，佢唔鍾意去冒險，去試一啲新嘅事物。」
性格內斂的偉仔，隨時可以一日一夜默不作聲，沉醉於靜思之中。
「佢真係可以o架！依家我返到屋企，同佢已經係一種家人嘅感覺。佢有佢嘅空間，但只要我同佢打個照面，我就可以感覺到佢依家咩心情，廿幾年感情，點可能唔知啫！」
對性格外向的嘉玲來說，偉仔也許是個悶蛋。「係好悶o架！我係要好有忍耐力，當係我每日修為要做嘅功課。呢個係我哋兩個之間解決唔到嘅問題，但我會覺得，我搵到佢嘅優點，依然多過佢嘅缺點。」
八四年芳齡十九，首次擔正女主角演《再版人》，男主角正是梁朝偉。
浪漫詩語
八四年首度合作《再版人》，劉嘉玲的螢幕初吻送了給梁朝偉，八八年合演舞台劇《花心大丈夫》撻著，九○年嘉玲被綁架事件後，梁朝偉跟她說：「如果你真的不開心，我們一起離開娛樂圈吧。」九一年她憑《阿飛正傳》成影後大熱卻倒灶，她回家哭成淚人，偉仔細語安慰：「你永遠是我心中最佳女主角！」
二十四年一起走過的路，每一步都見溫柔。
「佢係一個好感性嘅人，心思細密，大時大節應該做嘅一啲門面嘢，佢都做得好足，每一份禮物都睇得出佢花過心思，有時佢會寫一封情信，或者喺小卡片寫首情詩，去表達佢嘅情感。
「有一年我生日，佢明明去咗越南拍戲，忽然間門鐘響，我一開門，就見到佢拎住部攝錄機拍低我當時嘅反應同表情，佢好識製造驚喜。」
