[忽然1周 951 ENTERTAINMENT] 獨家訪問 陳豪勒令退出起紛爭 陳茵媺剖白懷孕心情 茵媺,陳豪,陳茵媺,MW,

上周四(10日)下午二時，陳茵媺素顏現身西貢銀線灣的超級市場，戴住 5卡 200萬鑽戒，盡現幸福少奶奶模樣。當日她更與記者真情剖白懷孕辛酸與開心事，心情靚絕。

打頭陣

獨家訪問　陳豪勒令退出起紛爭　陳茵媺剖白懷孕心情

懷胎七個月的陳茵媺（ Aimee），巨肚愈大愈有市場。上周二(8日)出席懷孕後首個賺錢活動，當場宣布佗男 B， 20萬酬金袋袋平安。

賺錢雖輕鬆，但愛妻如命的陳豪，始終不想陳茵媺操勞，曾揚言「男大當家，我一個人搵錢得㗎喇！」不過陳茵媺唔想「攤大手板」，想自己搵銀證明實力。

上周四（ 10日）陳茵媺在清水灣行超市，大方地接受本刊記者訪問。她透露自己是工作狂，即使佗住 B亦想拍劇，但老公陳豪卻力勸她退出娛樂圈做少奶奶。為此 Aimee甜絲絲說：「佢向來都就曬我！哈哈！」短短數分鐘的獨家剖白，已感受到皇後 Aimee幸福滿瀉。

其他影片

陳茵媺今年 6月佗住「 Mo仔」嫁給陳豪後，一直成為傳媒追訪對象，即使她遠赴多倫多老家安胎， 7月中在父親經營的酒家擺酒，依然吸引大批傳媒越洋採訪，人氣前所未有。

產前最後配音

七月中陳豪陳茵媺在多倫多擺酒筵開十席，陳茵媺母親亦盛裝出席。據知陳母將於 12月來港照顧女兒坐月，會逗留多個月才離開。

現懷有七個月身孕的 Aimee，預產期是 12月尾或明年 1月初，採取自然分娩。不過她並未因為佗 B而推掉工作，除了上周二(8日)出席品牌剪採活動之外，上周四(10日)上午十時，她更現身 TVB，為懷孕前所拍的《單戀雙城》作後期配音，做個負責任的演員。下午二時許，完成配音工作後， Aimee由爸爸充當柴可夫接載離開。其後，兩人到達位於清水灣的超市掃貨。由於上月尾 Aimee獨自駕車離開大埔寓所時，在汀角路發生交通意外，釀成四車連環相撞，幸好大細無恙。不過在老公陳豪勸告下，自此她亦已乖乖不再「獨駕」，出入都由父親做司機。

被讚佗得靚

到達超市後， Aimee第一時間去揀水果，又問超市員工：「請問雪梨放喺邊？」其後她再揀選了一些對孕婦有益的食品如乳酪、西芹、蘋果等。當時場內顧客不多，她所到之處都有超市員工讚她「佗 B佗得好靚」、「好好笑容」。

親切的 Aimee未幾發現本刊記者，更友善地即場接受獨家訪問，對比平日出席活動時的對答，明顯輕鬆得多。

記：記者　陳：陳茵媺

記：見到你返 TVB喎。

陳：係呀！幫《單戀雙城》做 dubbing（配音）嘛！

記：嚟超市買咩呀？

陳：買咗啲雪梨、雪耳，想煲雪梨水俾 Moses（陳豪）飲，順便買吓日用品囉！

記：個個都話你佗得好靚喎！

陳：哈哈！ Thank you！我好 enjoy呢個 moment（指懷孕過程）。雖然初初有嘔，嗰時我成日都攬住個廁所，其實係辛苦嘅，不過依家諗起就覺得好笑。仲有呀，嗰種作嘔係無時無刻，唔知佢幾時嚟，不過依家冇啦，仲感覺好好！有時 BB喺肚裏面踢我，感覺好奇妙，我咪隔住肚皮摸吓佢。 Moses都好鍾意同佢玩，每次佢都笑唔停。不過 BB啲手仔腳仔好好力，有時踢到我好痛！

爸爸揀梨

陳茵媺到超市買雪梨，為煲雪梨水給近日忙於搵銀的老公陳豪滋潤吓。不過其間回覆短訊，要勞煩陳爸爸幫手揀雪梨。

爆乳現巨肚

着住條薄薄 deep V碎花裙的 Aimee，除了上圍明顯升 cup，側面睇巨肚更現。她在超市雪櫃前慢慢研究產品成分是否適合孕婦，就連揀包果汁糖都要純天然無色素，真係為 BB着想。

即場飲乳酪

接受本刊訪問後， Aimee似乎有點口乾，上車返家前忍不住開包杧果乳酪邊行邊飲。據知乳酪有助通便，最適合容易便秘的孕婦。

與陳豪有分歧

記：點解唔留喺多倫多生 BB？

陳：我同 Moses都喺香港住同工作，香港生方便啲，我哋會喺呢度落地生根。而且我爹哋媽咪都會嚟香港幫手湊孫，香港生好啲。

記：會唔會生咗 Mo仔之後唔工作？阿 Mo話佢一個人做曬喎！

陳： No！我係工作狂，我好鍾意工作，雖然 Moses有 offer我唔使做，唔想我辛苦，呢件事上面我哋兩個都各有意見，但我真係唔慣唔工作。我會同 Moses傾吓，令佢唔反對我繼續工作。其實佢不嬲都聽曬我話啦！哈哈！不過頭一年會照顧 BB，到佢一歲左右我先出返嚟接 Job或者拍劇。

記：有咩秘訣可以佗仔佗得咁靚？平時食乜嘢多？

陳：哈哈！多謝你！我諗冇咩特別秘訣，同平時一樣，肥膩嘢少食，多菜少肉，不過呢段時間仲有長輩煲嘅滋潤湯水，同埋燉吓花膠鮮奶，老人家話會長胎。

獨家剖白懷孕心情後， Aimee與爸爸便到收銀處付款，然後往停車場取車返回大埔寓所。

阿 Mo唯一女人

早前陳茵媺公開表示自己可以做 Mo唯一的女人耐一 D，有傳媒誤會是做 Mo仔的女人。其後陳茵媺在微博解釋因這胎懷的是男 B，如果是女 B，她就唔可以獨霸老公做唯一的女人。

好姊妹聚會

周一（ 14日）戚黛黛生日， Aimee打扮得靚靚為對方慶祝，加埋剛誕下細仔的曹敏莉一家及朱凱婷與女兒，幾位好姊妹難得再聚。而陳豪亦俾面出席，真是愛屋及烏。

星級生仔醫院

仁安醫院位於沙田，環境清幽之餘，其特色是保安嚴密，出入口多，圈中名人為防記者偷拍，都喜愛在這醫院生 B。當中徐子淇在仁安產子，各大傳媒苦等數星期都無功而還。費用方面，陳豪所訂的豪華套房入場費至少 30萬，還未計醫生費及雜費，名副其實是星級醫院。

兩陪月陪百日

有爸爸照顧，陳豪當然放心。據知陳豪將聘請兩位資深陪月員，待 BB出世後即時開工，其中主力照顧 BB的陪月員更會入住大埔寓所，方便全日 24小時貼身照料 BB，另一位陪月員則負責 Aimee一日三餐及湯水補品。陳豪早前收到陪月員的補品清單時，已預早買定補品，兩位陪月員更會陪足一百日，讓兩母子都得到悉心照顧， Aimee大可安心坐月。

日前本刊更影到 Mo媽離開兩人的大埔比華利山愛巢，原來 Mo媽幾乎日日都去照顧新抱，每星期都親手炮製兩三款「補品」為 Aimee進補，包括花膠燉鮮奶、牛骨湯等。有奶奶全天候照顧，難怪 Aimee佗得靚之餘又長胎。另外一向崇尚自然的 Aimee選擇順產生 B，是希望可以享受整個懷孕與分娩過程。據知陳豪已一擲十萬，訂了仁安醫院的豪華套房，貪其就近大埔寓所，環境清靜兼保安嚴密。

緊張 Mo

上月尾 Aimee從多倫多回港，過百傳媒淩晨五時已在機場守候，陳豪亦事先聲明一定會去接機。當日冇見老婆近兩個月的陳豪緊張得面紅紅，不時護住老婆肚仔俾記者影相，緊張大師上身。

明年新劇

十月初無綫拍節目巡禮，推出一大堆未來一年的電視劇預告片，其中一劇是陳豪與胡杏兒做主角。雖然套劇還未開拍，但都意味住陳豪來年仍活躍 TVB。

陳豪：最緊要 Aimee鍾意

萬事俱備，陳豪心情當然興奮，不過明年 1月便滿約無綫的他，尚未知去留。有消息指陳豪有意與經理人嘉莉自組公司，並以部頭形式與無綫合作，既可以專心接活動及廣告，亦不用給 TVB抽傭。嘉莉為免無綫綁死三個月，亦不與公司簽經理人合約。上周六(12日)陳豪出席活動時，被問到是否用另一種形式與無綫合作？他避重就輕說：「真係未有定案，總之會優先考慮 TVB。（係咪與嘉莉開公司？）現階段真係唔方便講太多。」

至於早前揚言「男大當家」的陳豪，當日亦改口風，表示會支持老婆產後繼續工作，似乎兩人已達到共識。「 Aimee係可造之材，佢可以有好大嘅發展空間，最重要可以喺工作同小朋友之間取得平衡就 OK。我支持佢工作，最緊要佢鍾意。」陳茵媺應該好開心等生啦！

經理人兩份用

多年來照顧陳豪的經理人嘉莉，當然最知陳豪心意。自從 Aimee懷有 Mo仔後，每當 Aimee出席活動，嘉莉貼身照顧大肚婆。對於傳與陳豪合組公司，嘉莉表示：「私人嘢唔會交代」。

雙親進駐愛巢

陳豪今年年初以三千萬買入大埔比華利山獨立屋，上月已裝修完畢。現時陳茵媺爸爸亦同住大屋，方便照顧臨盆女兒。而陳豪媽媽雖然現居將軍澳都會駅，但都經常送湯水補品給 Aimee，故亦時常進出陳氏愛巢。

日前陳豪親自駕車送 Mo媽由比華利山返回將軍澳都會駅，為了照顧新抱， Mo媽辛苦曬。

向視後進發

陳茵媺 06年參選香港小姐獲得冠軍和「國際親善小姐」，出道初期主要為綜藝節目擔任主持，及在明珠台主持節目《 Dolce Vita》，其後加入戲劇組，在多套電視劇中擔任配角。 08年她於《畢打自己人》飾演陳寶拉一角才開始為人熟悉，至今拍了 18套電視劇，於今年初播出的《情越海岸線》終一嘗做女主角的滋味，尚有《叛途》及《單戀雙城》兩套劇未出街。 Aimee奮鬥 7年終成為一線花旦，再做落去分分鐘有得攞視後，難怪唔想息影啦！

11年陳茵媺與陳豪合作拍《心戰》演兩兄妹，其間陳豪與廖碧兒分手，未幾便傳出與陳茵媺撻着，感情仲一日千里。

在劇集《真相》，陳茵媺雖然只是配角，但一場強姦戲卻演得非常逼真，為演出絕不錫身。

懷孕前拍的新劇《單戀雙城》，陳茵媺擔任第一女主角，當中一場雨中跪地嚎叫的戲份，可見她演技大有進步。

形象健康的陳茵媺，近年深受廣告商歡迎，去年她更穿泳衣拍護膚品廣告，絕不吝嗇美好身材。

半年賺千七萬

陳豪一向形象正面，甚得廣告商歡心，自他榮升準爸爸後，廣告、商演、甚至電影更加蜂擁而上。單計近半年他已吸金超過千七萬， Mo仔腳頭唔錯喎！

其他影片

.[忽然1周 951 ENTERTAINMENT] 獨家訪問　陳豪勒令退出起紛爭　陳茵媺剖白懷孕心情 茵媺,陳豪,陳茵媺,MW,
http://hittt.blogspot.com/2013/10/1-951-entertainment-mw_4046.html.[忽然1周 951 ENTERTAINMENT] 獨家訪問　陳豪勒令退出起紛爭　陳茵媺剖白懷孕心情 茵媺,陳豪,陳茵媺,MW,
http://hittt.blogspot.com/2013/10/1-951-entertainment-mw_4046.html.[忽然1周 951 ENTERTAINMENT] 獨家訪問　陳豪勒令退出起紛爭　陳茵媺剖白懷孕心情 茵媺,陳豪,陳茵媺,MW,
http://hittt.blogspot.com/2013/10/1-951-entertainment-mw_4046.html.[忽然1周 951 ENTERTAINMENT] 獨家訪問　陳豪勒令退出起紛爭　陳茵媺剖白懷孕心情 茵媺,陳豪,陳茵媺,MW,
http://hittt.blogspot.com/2013/10/1-951-entertainment-mw_4046.html.[忽然1周 951 ENTERTAINMENT] 獨家訪問　陳豪勒令退出起紛爭　陳茵媺剖白懷孕心情 茵媺,陳豪,陳茵媺,MW,
http://hittt.blogspot.com/2013/10/1-951-entertainment-mw_4046.html