[忽然1周 951 ENTERTAINMENT] 官太哈囉喂 MW,

2013年10月18日星期五

細女馬露玲與符傑廉喺四季酒店筵開 33席，馬時亨夫婦開心到不得了，全程笑騎騎，個口冇合埋過。

周一（ 14日），商務及經濟發展局前局長馬時亨細女馬露玲出嫁，喺中環四季酒店擺酒，請來好多猛人賓客。除咗商界、演藝名人，仲有新舊政界高官。平日個底麻麻嘅官員，表現古靈精怪，搞到一班甚少對鏡頭嘅官太要執生配合。官太們，哈囉呀！喂喂，望鏡喇。

前財政司司長梁錦松老婆伏明霞，盛裝到場，一身黑裙都難掩圓碌碌身形。佢落車嗰陣好鬼大風，吹到披頭散髮，不過佢超級敏捷，兩秒還原靚頭，金牌運動員係唔同啲！

講到最樸素，都算係財政司司長曾俊華太太，一身紅花裙嘅佢，素顏見人，連雀斑都唔遮，勝在笑容燦爛。反而財爺相都唔願影，一支箭入場。

知名梁粉、發展局局長陳茂波孭住「囤地波」、「劏房波」咁多名，做太太嘅許步明都唔敢太高調。陳太一身 C9褲裝撞閃鞋，品味認真麻麻。

前政務司司長林瑞麟同太太一齊到場，林太行頭十足，巨型珍珠耳環、頸鏈搶到暈。兩個一落車，林瑞麟即時繑實老婆慢慢行，林公公果然入型入格。

前經濟發展及勞工局局長葉澍堃，一見記者即拖住太太 Nancy急步入場。相反戴住閃鑽翡翠戒指嘅葉太對鏡頭就好敏感，一有閃燈即刻望鏡，得咗！