真面目
自我河蟹 CY國教 gag全刪 黃子華擦強國鞋自閹
2013年01月16日北上掘人仔係娛樂圈大趨勢，連本地神級棟篤笑始祖 黃子華，亦食住去年 10月香港《洗燥》騷氣勢，登陸祖國搞棟篤笑。
不過內地開騷禁忌多，尤其 黃子華呢類經常抽政治人物水的棟篤笑更加要小心，結果子華一登強國開騷，香港版有關國教、 CY、貪官的話題全部自動刪除。雖然冇曬政治 gag，不過班強國觀眾一樣睇到拍爛手掌，總之要氹到班老細「 CC服服」。
內地版
足足 3年冇喺中山表演，上週六（ 12日）子華終於再次踏足此地。中山市民等到頸都長，子華落力表演，雖然連衣著都一樣，但強國人聽到子華把聲，冧曬！
港版
相比內地演出， 黃子華喺香港串得多，由劏房到特首都成為佢嘅諷刺話題，忠於口沒遮攔本色。
笑貪官 刪
我母親（祖國）好多做官都貪汙，香港呢樣追得好貼，佢哋高官老婆殺人，咁我哋香港點呢？
寸狼英 刪
你班仔（ 黃之鋒）由朝嗌到晚，仲要嗌切（撤），我男人嚟㗎嘛，又做交叉手勢，分明係一把鉸剪，其實呢個時候你（ CY）應該推老婆出嚟講：「你哋叫佢切，佢切咗我點樣，我死畀你睇！」
諷國教 刪
母親節（國慶）唱歌要喊，但真係喊唔出，呢度係香港，唔係北韓，死時先喊，文化太唔同。
新增 地溝油
我覺得地溝油係戰略儲備，大家都知道呢樣嘢唔食得㗎，點解仲會喺度呀？我哋唔怕地溝油，但美國會好驚。
加強 寸日本
我以前見到一間日本時裝店，嗰間鋪頭個名就係叫『日本時裝』，咁我就認為日本就等於時裝，時裝就等於日本，嗰種目中無人就係 黃子華嘅棟篤笑囉！
去年《洗燥》 10場叫好叫座，連無綫都話要搵 黃子華回巢，再跟 Do姐拍劇迎戰新電視台。其實 52歲的 黃子華，由 90年代開始做棟篤笑棟足 22年，除咗香港受歡迎，原來在內地亦好吃得開， 07年開始更講到返內地，成為香港首位踏足強國開棟篤笑的男星。
￥ 680飛貴香港 7成
上週六（ 12日）， 黃子華繼早前的廣州站後，再到中山開騷，即使最貴門票達 680人仔貴過香港七成三（香港最貴$480），但全場 5,000個座位仍有九成滿。子華一出場，已有粉絲在台邊欄杆等候，難得子華勁識做，握手影相絕冇托手踭，而且強國人對子華甚受落，雖然大部分內容跟香港站一樣，不過內地觀眾仍然笑唔停，幾乎子華講乜都有反應，又識大叫「回水」及「除褲」等指定動作，明顯有班強國忠實 fans。
雖然子華開騷內容食老本，但喺內地開得騷，子華自然知規矩，於香港站勁抽特首 CY水、國民教育、被自殺的李旺陽和涉及貪官的劏房局長陳茂波全部自動刪除，而食住中國最近的反日熱，有關日本的話題如「日本人打輸仗要食鹹魚蒸肉餅壽司」、「日本等於時裝超自大」、「對膠鞋可以行到去釣魚台」等話題則全部保留兼加強，擦盡強國 fans鞋。
嘟嘟定阿佘？
今年新電台來勢洶洶，無綫急召回經典拍檔再合作。早前曾傳出考慮返 TVB拍《男親女愛 2》及《絕代商驕》續集嘅 黃子華將於 4月回巢，雖然未落實回巢，但成班子華 fans已經超期待，但由於《洗燥》巡迴棟篤笑未完，加上 Do姐早輪接受電台訪問時卻又反口話：「我唔會再拍劇，拍咗幾十年好多角色都做過。」嘟姐改曬口，唔通阿佘真係爭贏？本刊曾致電 黃子華助手，但至截稿前仍未聯絡上。
內地開騷限制多
繼 07年《愈大鑊愈快樂》喺廣州演出第一場後，子華內地嘅棟篤笑愈來愈多，除了已開的廣州和中山站外，遲嚇子華更會衝出廣東省，殺入廣西開騷添！據知 黃子華香港站一場收約 80萬港幣，大陸則收貴 5成約 100萬人仔。而據一內地搞演唱會搞手表示，想在內地開棟篤笑原來唔簡單：「內容一定要審過，除咗敏感話題同政府官員唔講得，即使諷刺一啲名人或者新聞都唔可以，例如你想諷刺四大天王唔得，你想講毒奶唔得，之前林海峰都喺內地開過一次《是但噏我願意》，不過一樣好多內容都刪走啦！」
內地巡迴表：
第 1站： 2013年 1月 1-3日廣州體育館
第 2站： 2013年 1月 12日中山市體育館
第 3站： 2013年 1月 18日佛山南海體育館
第 4站： 2013年 3月 16日廣西體育中心體育館
.[FACE]自我河蟹 CY國教 gag全刪 黃子華擦強國鞋自閹
http://veryy8.blogspot.com/2013/01/face-cy-gag-face.html.[FACE]自我河蟹 CY國教 gag全刪 黃子華擦強國鞋自閹
http://veryy8.blogspot.com/2013/01/face-cy-gag-face.html
