1人羅仲謙分飾4角

FACE週刊 第295期

由救生員搖身一變成靚仔小生， 28歲大隻仔羅仲謙不經不覺入行第 8年，今年頭已一早忙碌，先拍《 On Call 36小時 II》、《戀愛季節》、《衝上雲霄 II》再到電影《古惑仔：江湖新秩序》，一時間 1人分飾 4角，鏡頭後的羅仲謙最似邊個角色？即刻分析！

最韓氣

「 2月無綫新劇《戀愛季節》擔正主角，我做一個乞人憎的男明星，與 Toby有感情戲，感覺幾韓劇 feel。其實上年《巴不得媽媽》入面飾演少爺仔，到《 On Call 36小時》已為自己角色買衫扮靚。我最鍾意上網買衫，推介網上時裝店 gmarket.kr，勁多平靚韓衫買，最愛買三件頭西裝。」

唔聽 BIGBANG，不過會煲韓劇，之前愛睇《秘密花園》，最愛係韓國演員元彬（上）同拍過《 X-Men》的 Daniel Henney。

最 chok

「中二開始愛睇伊健演的陳浩南，但演這套我冇特別重溫，因為監製王晶想我重新演繹，最困難係免受評語影響，因為好多人在微博留言話世上只有一個浩南（伊健），一定有壓力，況且浩南係一個有情有義的古惑仔，戲中大多為內心戲，要 chok好多幕，哈哈！我好羨慕任講粗口、演山雞的梁烈唯呀！」

最謙謙

「《衝上雲霄Ⅱ》裏我飾演一位運動員，成績差常被人睇低，所以發憤，最後成為副機師，同我未入行前是救生員、現在是演員有點相似。拍攝《衝》劇線更撞期拍《古》片，朝早 6點在機場拍完，夜晚就要踩去旺角演古惑仔，精神狀態比較差，不過好在自己夠健康，唔係就唔可以在《衝》劇同最 chok的吳鎮宇鬥 chok喇。（笑）」

最成熟

「《 On Call 36小時Ⅱ》我繼續飾演第一集的洋蔥，續集講演實習醫生的我比以前行醫成熟，也很反映這一年自己在戲內戲外的成長。戲內是自己的演技有所進步，得到觀眾的認同，上年《 On》劇奪得馬來西亞「 MY AOD我的最愛頒獎典禮」最愛電視男配角獎；而戲外亦對娛樂新聞睇得更開，不會為報道不實而激氣，反而更有推動力，繼續努力工作！」謙謙的另一半，真幸福！

撰文：陳家豪

攝影：黎韋邦

.1人羅仲謙分飾4角
http://veryy8.blogspot.com/2013/01/14.html.1人羅仲謙分飾4角
http://veryy8.blogspot.com/2013/01/14.html