盛品儒同人妻亞姐打情罵俏
【銅鑼灣時代廣場】現年36歲的亞視執行董事盛品儒，常chok爆示人的他異性緣旺，去年被偷拍到熱吻陳霽平後卻不認女友，堅持單身形象，過去半年先後被拍到身邊出現不同女伴，前晚他被發現跟91年亞姐人妻黎虹讌逛銅鑼灣，黎虹讌更風騷用紙袋拍打盛品儒，當街打情罵俏。
亞視近日強制要藝人上洗腦班，抗旨者炒魷收場，藝人風聲鶴唳，為保飯碗都忍氣吞聲準時上堂，執行董事盛品儒近年傍實王征執掌亞視，盛品儒不時監場洗腦班捉懶蟲，但課堂以外的他卻勁旺桃花，身邊女伴如走馬燈，入主亞視即被爆力追前亞姐呂晶晶，去年被爆撻著陳霽平發展姊弟戀，但早前又偕亞姐王家敏出席飯局，前晚盛品儒與人妻亞姐黎虹讌更被本報記者踢爆在銅鑼灣當街打情罵俏。
1.【買噴髮膠】■貪靚愛chok的亞視執行董事盛品儒，前晚收工即到超巿選購噴髮膠，一買還打孖上。
被黎虹讌當街拍打
36歲的盛品儒最愛穿上筆挺西裝，配以chok爆甫士，他去年明明被拍到與陳霽平在公眾場所熱吻，但卻拒確認對方的女友身份，以繼續維持鑽石王老五形象。前日傍晚6時多，盛品儒又再出動，他先與一男子逛時代廣場的city'super買噴髮膠，之後他與一名打扮高貴、戴上太陽眼鏡的黑絲女子笑笑口邊傾邊排隊付款，原來該黑絲女就是91年亞姐亞軍、現任仁美清敘副主席黎虹讌。他們最初表現避忌，至結伴上扶手電梯離開時全程有傾有講，其後一行三人到了連卡佛外避車處等車，盛品儒和黎虹讌雞啄唔斷，兩人更打情罵俏，黎虹讌竟拿著紅紙袋拍打盛品儒，其後黎虹讌司機駕駛七人車到達，盛品儒隨她上車。
2.【笑住排隊】■亞視高層盛品儒前晚掃貨後，與人妻亞姐黎虹讌排隊付款，二人傾得開懷大笑。DV圖片
3.【揮袋拍打】■人妻亞姐黎虹讌跟盛品儒當街打情罵俏，黎還揮動紅紙袋拍打他。
4.【風騷調笑】■盛品儒被拍打後繼續講手機，黎虹讌則風騷地笑。
「佢幫我買充電器」
記者昨日致電盛品儒，問他前晚與一女伴在銅鑼灣購物，記者形容該女伴的打扮，盛品儒竟避談該女子是黎虹讌，他說：「朋友囉，佢唔係圈中人，約人唔係男就係女，佢只係我女性朋友，我哋傾生意經，我介紹啲人畀佢識。」對於再被影到有女為伴，盛品儒抵死說：「下次我淨係同男人出去。」盛品儒直認近期少見陳霽平，他說：「大家都忙，我又病咗，出差凍親。」那可找女伴蓋被？盛品儒搞笑說：「冇人幫我冚被，老竇幫我咋。」
當記者指出盛品儒前晚女伴是已嫁有米老公許尊健的人妻亞姐黎虹讌，他才坦白承認：「我係見過E仔（黎虹讌），我唔知你哋喺邊度影，我夜晚真係同一班男仔女仔食飯。」他查問過時間地點後再說：「city'super嘅係黎虹讌，佢之前去日本，我叫佢幫我買充電器，攞完嘢同佢飲番杯嘢。」盛品儒表示認識黎虹讌老公，但前晚為何沒出來？他卻說：「我唔知佢哋。」其後盛品儒以一句「唔講咁多」便匆匆收線。
5.【等司機接】■盛品儒與黎虹讌等候司機接載，已有一對子女的黎保養得宜。
6.【同車離開】■司機到達後，黎虹讌先上車，盛品儒跟男友人吹水後便登車。
■黎虹讌昨表示因盛品儒（左）多口笑她年紀大，才當街打他。 微博圖片
陳霽平：見面要度期
黎虹讌昨日大方承認給盛品儒交收充電器，她在電話中說：「我之前同老公囡囡去咗日本玩，順便幫佢買。」問到黎虹讌何故當街風騷拍打盛品儒？她解釋：「佢只係熟呢幾屆嘅亞姐，但我近年仔女大咗，多咗自己時間，我幫仁美清敘手，見得盛品儒多咗，佢成日笑我係資深亞姐，即笑我年紀大，我咪拍打佢。」黎虹讌表示跟盛品儒happy hour後便會合老公晚飯。問到黎虹讌可知盛品儒形象花弗？她說：「佢私人嘢唔知，我哋普通朋友關係。」
踏入2013年才半個月，陳霽平坦言今年未見過緋聞男友盛品儒，她昨日在電話中說：「我要拍劇，見面真係要度期。」對於盛品儒身邊女伴轉不停，陳霽平說：「冇所謂，我哋異性朋友多。」
採訪、攝影：陳辰、丁寧
【齊齊投選2012年娛圈風雲人物】
入面粒粒巨星，你想咀佢，定想掟蕉過去？XD
http://bit.ly/ent_2012 （電腦版）
http://bit.ly/ent_m2012 （手機版）
下一則:祖兒台上狂呻 「冇人諗過佢攞金」
.盛品儒同人妻亞姐打情罵俏
http://veryy8.blogspot.com/2013/01/blog-post_1699.html.盛品儒同人妻亞姐打情罵俏
http://veryy8.blogspot.com/2013/01/blog-post_1699.html
