真面目
唯我獨尊 舞王變大茄 獨裁星爺 cut爆小豬
2013年01月23日將於賀歲檔（ 2月 7日）上畫的《西遊．降魔篇》，由周星馳身兼監製、導演及編劇，繼 08年《長江 7號》後先有新作陪過年。
收埋 5年再出擊，星爺今鋪不容有失，雖然電影以科幻特技做賣點，但仍重金邀請舒淇及內地一線男星文章做膽，講明要成為今年華語片票房冠軍。據知，有份飾演空虛公子的羅志祥（小豬），一心諗住黐住星爺實冇死，點知拍完先知戲分被狂 cut兼冇份唱主題曲，就連原本想曬舞功出場，最後卻被星爺打壓到變咗坐轎，嘥曬舞王心機。
籌備 4年的《西遊．降魔篇》，由星爺及憑《打擂台》奪得金像獎「最佳導演」的郭子健聯合執導。星爺今次專注做幕後，只會在戲中出鏡幾秒過戲癮，快過高 Ling被姦。
錯上賊船
自導自編自監，由選角到後期製作全部話曬事的星爺，一早鎖定由女神舒淇做女主角段小姐，文章演唐僧，孫悟空則由同樣來自內地的金馬影帝黃渤扮演，鑽石級陣容要吸人仔幾乎易過印銀紙。
班底勁但偏成熟，於是算死草星爺搵小豬做另一降魔高手空虛公子，希望引後生仔入場。據知當初星爺向小豬拍心口保證角色有發揮，而且唔使化醜妝做醜角，小豬先應承畀期拍攝，更希望憑《西》片打入電影界，同死敵周傑倫拗手瓜。
偏心舒淇
戲分最重
《西遊記》原著中最主要嘅角色應該係唐僧同三個徒弟，但被星爺改編後，反而由舒淇飾演嘅降魔女段小姐先係主角，有動作有愛情戲，最搶！
片場惡曬
星爺自爆舒淇喺片場大曬，自己講錯一句嘢，舒淇會即刻怒睥，兼且夠鐘收工即走，星爺都冇 say！
欽點唱歌
有歌手小豬唔用，反而指定要舒淇包辦主題曲〈一生所愛〉國粵語版，更親自開金口唱咗個合唱版，乘機親近女神！
剪剩幾場
「星爺最初搵小豬，講明戲分唔會太少，雖然一定唔及男主角文章，但保證肯定唔係可有可無，仲話諗緊有冇可能畀佢唱埋主題曲添！小豬見星爺咁有誠意，又係自己童年偶像，咪叫經理人即刻接，點知最後出到 嚟根本唔係嗰回事，剪剩幾場戲，主題曲寧願搵舒淇唱曬國粵語版都唔分隻畀小豬，小豬覺得俾星爺玩殘！」小豬身邊人透露。
今次星爺的「剪」功分分鐘勁過王家衞，而堂堂天王變大茄，小豬早前來港宣傳時忍唔住全程黑面抗議，單獨接受訪問時更忽然自爆被星爺 ban橋，「我嘗試用自己的方式去演，可星爺不太接受，最後還是要跟他一套！」無厘頭俾星爺借 嚟過橋，小豬今次真係變咗蠢豬喇！
鬥辣火頭
星爺出曬名難相處，同佢合作過的拍檔最後多數反面收場，但原來小豬都唔好蝦，無論香港定台灣都辣過唔少火頭！
周傑倫
有傳當年周董因睇中侯佩岑狠撇蔡依林，身為 Jolin好友的小豬睇唔過眼，從此同周董變死敵。
言承旭
拍《籃球火》時因爭戲分傳不和，言承旭故意唔出席宣傳避開小豬，又唔肯上對方主持的節目《娛樂百分百》。
楊丞琳
楊丞琳與小豬的共同朋友造謠搞事，令兩人誤會多年，後來在澳洲開騷，小豬當面向對方解釋清楚，終冰釋前嫌變好友，甚至傳過拍拖。
黃秋生
秋生在微博寫「不知羅志祥是誰」，又指豬迷和小豬是「蒼蠅與屎」，令小豬反擊叫對方要尊重人，記仇嘅小豬，更在上週的演唱會大嗌「我是誰！」
洪金寶
03年拍《功夫》時，不滿星爺在片場「話曬事」而劈炮，星爺臨急找來袁和平頂上做武術指導。
田啟文
與星爺合作 13年，終頂唔住於商台訪問中，大數對方脾氣差、數口精、不近人情又孤僻，送件 200蚊 tee畀佢要請番佢 13個 friend睇戲！
梁小龍
曾簽約星爺公司「星輝」，因不滿對方抽傭海鮮價食水深，炮轟星爺「人食人」，更主動提前解約。
梁思浩
94年拍《國產淩淩漆》時，喊足 17次但 roll一次機，被整蠱的思浩發誓做乞兒都唔再同星爺合作。
.[FACE]唯我獨尊 舞王變大茄 獨裁星爺 cut爆小豬
http://veryy8.blogspot.com/2013/01/face-cut-face.html.[FACE]唯我獨尊 舞王變大茄 獨裁星爺 cut爆小豬
http://veryy8.blogspot.com/2013/01/face-cut-face.html
