2013年1月23日星期三

無綫姐仔爭做《一代宗師》妓女

真面目

分秒必爭入選Jeana:出鏡兩秒我當贏

第296期

《一代宗師》上映一星期狂收 1,200萬（國內更已過 2億），王家衞終於都有賣座冠軍。

王大導出名仔細，由選角到布景陳設都一絲不苟，連過鏡的金樓藝伎，一樣都挑花咁執。最威係明知角色只係過鏡妓女兼零發揮，王大導一吹雞搵人，大班無綫姐仔仍仆住去面試，最後爆冷由梁政玨同o靚妹李綺雯和陳美詩入圍，每人收 8萬蚊做妓女，難怪非無綫族類但仍有兩秒鏡頭的 Jeana囂說：「有兩秒我當贏咗！」

出名慢工出細貨嘅王家衞拍《一代宗師》用咗 17年時間。主角梁朝偉、章子怡、張震為拍呢套戲，練足 3年功夫，練八極拳練到攞全國八極拳冠軍，就知王導拍片幾認真。

《一》片重頭戲，偉仔同章子怡喺金樓大戰，同一班藝伎同場，除咗劇照中影唔到嘅無綫姐仔同o靚模，其餘嘅都係國內演員，有啲係特約演員，好似喺梁朝偉身後呢位內地演員（箭嘴），原來係廣州電視台嘅藝員何文婷。

何佩瑜

佢叫我唔好似砵蘭街嗰啲。

出鏡 1秒

梁政玨

導演（王家衞）教我撥扇！

冇份出鏡

李綺雯

預咗見唔到我！有得拍已經開心！

3姐仔入選

除了王大導要求高，禦用美指張叔平亦一絲不苟，連班藝伎嘅衣服同首飾全部由頭到腳跟足，難怪同王家衞咁夾。

王家衞對大牌明星認真唔奇，估唔到對過鏡冇對白嘅演員都超嚴謹。戲中主要場景妓院金樓，入面有好多飾演藝伎嘅女角色，原來王導都要精心挑選，王大導更試過去無綫搵姐仔，有份面試嘅分別有姚子羚、龔嘉欣、陳爽、陳美詩、梁政玨、李綺雯等十幾人。不過最後只得陳美詩、梁政玨、李綺雯 3位入選，而有份出鏡的更只得梁政玨一人。據知面試要即場被副導試戲，內容係飾演賣藝不賣身藝伎，太姣太浮誇都會即場被 out。

姣誇即 out

王家衞出名仔細，每次開工打燈都用上 10小時，每一個鏡頭都一定親自拍攝，事前亦會同演員溝通。

最終 3位無綫姐仔及o靚模 Jeana成功突圍做藝伎，為期一個月拍攝期，實則開工只有 10天，不過每人有 8萬蚊酬勞勁好 pay。而不用開工嘅日子，就要上堂跟老師學習儀態、舞蹈、食煙姿勢等。最誇係每一位現場演員，即使係臨時演員嘅衫都係張叔平親自修改，飾物亦係由張叔平親手戴上。有份演出嘅李綺雯說：「前年去試鏡，一入片場就唔可以影相?喇！我哋啲衫全部由張叔平親自處理，瘦咗都會修改。出場前仲幫我哋噴香水。總之成個環境務求要大家一入片場就入曬戲，酬勞有 8萬?！」有 1秒出鏡的梁政玨則說：「估唔到有 1秒囉，王導演好好人呀，佢仲教我點樣撥扇！」至於最後亦有份出鏡兩秒嘅 Jeana（何佩瑜）就話：「個副導叫我唔好姣，唔好似砵蘭街啲囉，叫我要誘惑佢，結果出嚟宋慧喬有 6分鐘，張智霖有 6秒，我有兩秒出鏡，我當贏咗！」