大封面
再懷孕下體大量出血 蔡少芬親證胎盤撕裂
2012年12月28日
高齡產婦懷胎唔易，佗 B更要打醒精神。 39歲星媽蔡少芬（ Ada），兩年前經歷小產之痛，後來懷孕成功，去年 5月中剖腹誕下愛女張楚兒（ Zoe）。揚言要生夠 3個的她，今年 10月初再次發現懷孕，現時懷胎 5個月。可是今胎同樣出現流產危機， 10月尾，蔡少芬下體曾大量出血，經醫生證實其胎盤撕裂，胎兒險些保唔住。
上周六（ 22日），蔡少芬在一佈道會上，堅強承認此事：「我喺飛機上發現啲血流到叭叭聲，即刻送入急症……足足住咗兩星期醫院。」幸保胎兒，就算隨後有錢搵，仍堅持停工一年，以策萬全。
去年 5月，蔡少芬誕下 9磅 4巨 B女楚兒後，繼續努力造人。今年 11月中，她主動在微博公布再度有喜，得到不少藝人留言道賀。同月，她出席活動時，卻只隱晦交代：「有第一個小朋友好快樂，依家好感恩，本來我諗過生 3個，不過最後決定生埋呢個就停工。」忽然改變初衷，其實蔡少芬確實有難言之隱。據知她懷這胎時，與之前兩胎一樣，同樣險些痛失胎兒。
機艙流血不止
蔡少芬密友透露：「 10月尾，我哋原本想約 Ada（蔡少芬）食飯，點知佢話入咗醫院。我哋都好驚，知佢有咗（當時蔡還未對外公布），就追問佢有咩意外，佢就話小事，點都唔肯講。」
半個月後，蔡少芬在微博報喜。字裏行間，她亦沒有透露任何端倪。直至上周六（ 22日），她在佐敦泉福堂的佈道會上講見證，才和盤托出整件事。起初，她語帶輕鬆表示：「生完楚兒，一年半後又有多個，都好健康嘅……我同老公都好開心。」可是，接著她語氣變得沉重：「懷胎初期，我帶住楚兒一齊坐飛機，諗住同班 friend去台灣食嘢。當時我佗緊兩個幾月。點知上飛機後覺得好唔舒服，朋友見到我塊面青曬。嗰陣架機準備起飛，我即刻走入洗手間。我發現流緊血（下體），即刻出嚟同朋友講：『好驚呀，我要即刻入醫院。』未講完呢句，我已經 feel到我啲血流到叭叭聲，當時我覺得好暈，好擔心個 B就咁冇咗。」最後當值機師要緊急讓蔡少芬落機，由機場救護人員護送回地面，此時接報的老公張晉已飛車到達機場，與救護員急送老婆往醫院。
自爆今胎佗女
最後，經醫生診斷，原來蔡少芬的胎盤出現一條頗大的裂痕，導致下體大量出血。蔡少芬在佈道會中激動地說：「醫生話條裂痕唔知點樣形成，我問佢會唔會再出血，佢都答唔到我。唔係經過第一次小產有經驗，我諗我今次實癲咗。」
講見證期間，蔡亦唔覺意自爆今胎是女嬰：「我照超聲波嗰陣，見到個 BB成個跳起，嚇到我係咁喊，唔知 BB有冇事，醫生就話：『 BB，你跳多啲鬱多啲，你媽咪好驚。』……我個女呀，你嚇死媽咪啦。」此時，在座不少聽她做見證的教友，都表現得十分愕然，部分女教友更忍唔住用紙巾拭淚。為緩和氣氛，原本眼泛淚光的蔡少芬，隨即笑笑口交代 BB現時好健康，羊水冇事，只是當時在醫院瞓了兩星期病牀，刻意淡化小產危機。
其實，蔡少芬在兩年前懷第一胎，當 BB三個月時發現冇心跳要做流產手術。原來懷楚兒時，亦險遇意外。她說：「有楚兒時，我拍緊《甄嬛傳》，原先唔想再開工，但收咗人錢，冇辦法話俾人聽我有咗，咪佗住佢開工，拍攝過程經歷好多得人驚嘢。
「我做皇後，有 8人大轎，我坐完一次覺得好唔安樂，同副導演講唔想坐，佢應承咗。跟住拍抬空轎，點知一抬起成個轎 boom一聲冧咗，原來有邊樑斷咗，加上行緊斜路，如果我坐喺入面，一定跌咗出嚟碌多幾碌，嗰嚇我都睇到呆咗。而生楚兒時，本來想自己生，點知過咗 12個鐘都生唔到，醫生驚 BB心律不正，要緊急開刀生。」回憶起可怕經歷，蔡少芬亦不禁眼紅紅。
隱晦爆舊情
除了見證佗 B驚險經歷，蔡少芬在佈道會上，亦剖白了多年前被某位富豪照顧，自己過著窮奢極侈生活。她說：「以前我曾經覺得自己好偉大，為屋企人付出好多。早排我同舅父去法國旅行，行過 Gucci、 LV，佢問我點解唔入去睇。我低頭唔敢睇，唔想好似以前咁再買嘢。返到酒店房，我埋怨神：『我以前坐飛機一定坐 first class，我去邊度都有黑卡，我鍾意邊件就買邊件，仲要唔使睇價錢牌，點解今日咁折墮啫？』之後，我腦海嘅 picture就出番曬嚟， 10幾 20歲嗰時，我可以去豪嘆，但我依家有嘅自由係我諗唔到，我唔想要以前嗰種生活。嗰陣屋企生活富裕咗，我都唔見得屋企人特別快樂，仲成日憂憂愁愁。」蔡少芬雖然沒有指名道姓，但不難令人聯想到她和大劉的陳年緋聞。
險釀分手
雖然蔡少芬當年放棄奢華生活，而揀與內地武指張晉一起，蔡脾氣依然火爆，經常無故嗌分手，港女性格險些玩出禍。她說：「我當時成日同張晉講，你唔好追我，我好麻煩，佢話頂得順冇問題。點知一齊咗之後，佢就瀨嘢，我鬱啲發脾氣，又成日嗌分手，佢都忍我讓我。點知有次喺北京，我又嗌分手，佢粒聲唔出幫我執行李揸車送我去機場。嗰嚇我知驚啦，真係喊咗出嚟，佢問我『仲分唔分手？』我話『唔分嘞，唔分嘞！』」
推劇湊 B
刻下蔡少芬腳踏實地，為生活奔波。雖然佗 B開工危機四伏，但為賺奶粉錢和張羅明年開童裝店仍頂硬上。上月，她便完成一早接落的 10多個內地活動，搭飛機亦有六、七次之多。不過講到拍劇，她就可免則免。據知她雖然欠無綫兩套劇，但三個月前她主動推掉重頭劇《 On Call 36小時 2》，對此，無綫高層樂易玲直認不諱：「我知 Tommy同珍姐都有搵過 Ada，我哋都有搵佢拍《 On Call 2》，但佢推咗，嗰陣都唔知佢有咗。（但佢仲欠無綫劇喎？）佢係仲有約，但等佢生咗個 B出嚟先啦，唔會迫佢返嚟。」佗 B大過天，相信蔡少芬成功誕下第二名先會再搏殺。
胎盤裂易流產
蔡少芬在懷孕初期胎盤出現裂痕，婦產科專科醫生靳嘉仁表示：「胎盤同子宮中間有好多血管，如果胎盤剝落，會導致胎盤流血。對於孕婦嚟講，產前大量出血會容易流產。其實呢個現象喺孕婦早期懷孕時會發生， 10個孕婦中有 1個會出現。」
至於蔡少芬佗 B繼續周圍飛，會否增加流產危機？靳醫生表示此說法純屬謬誤推測。「其實坐民航機 嘅時候，機艙氣壓同地面差不多，所以唔會有直接影響。」
醫院絕密照公開
在見證會中，蔡少芬除了自爆今胎險小產外，同時分享她在產房生大女的過程。片段中，經歷女人十級痛楚的她，幸得老公在身邊支持，最後有驚無險生了重 9.4磅巨 B楚兒。
兩個月密密執
除了拍內地劇執人仔外，有意從商的蔡少芬，在今年 11月，成立「童夢工場」有限公司，打算在出年開設童裝店。不過香港租金貴，加上楚兒細妹亦於明年 4月出世，一闊三大，她亦要落力搵銀。雖然公布有身孕後，蔡少芬講明唔會接劇，但就密密接活動，短短兩個月，已拍了一個廣告及出席內地 10個活動，勁賺近 300萬。
微博曬幸福
愛女得來不易，蔡少芬即使要工作周圍飛，但她仍經常放楚兒照片上微博，大曬有女萬事足。
.[忽然1周]再懷孕下體大量出血 蔡少芬親證胎盤撕裂
http://veryy8.blogspot.com/2012/12/1_28.html.[忽然1周]再懷孕下體大量出血 蔡少芬親證胎盤撕裂
http://veryy8.blogspot.com/2012/12/1_28.html
