當年今周
鄧萃雯回到溫柔時
2012年10月26日
近期鄧萃雯嘅新聞一浪接一浪，先有傳佢要求多多，麻煩惡頂，搞到金牌監製李添勝將佢飛出《巾幗梟雄 3》，搵胡杏兒頂上。跟住，九姑娘忽然喺公開活動上，甜笑默認有拖拍，但過幾日又唔認蜜運，令人懷疑係咪 46歲嘅佢強勢得滯，嚇走男人！
媽咪姐翻查資料，又覺得未必咁灰嘅！睇番 2001年 10月 20日第 325期《忽周》，當時同前度鄭敬基分咗手成年嘅鄧萃雯，單拖去快餐店買飯，再做埋「外賣仔」，抽住大袋飯盒去搵大隻猛男，出錢出力出埋心！唔好話女明星，就算普通一個女人仔，都未必會咁做啦，係咪？只要九姑娘 recall番呢份溫柔體貼，要拍拖？ Easy job！
檔案編號第 325期
日期： 20/10/2001
九姑娘的男人在何方？
萬梓良
85年，鄧萃雯一入行就喺無綫劇《薛仁貴征東》做女主角，同男主角萬梓良順理成章日久生情。大佢 9年嘅萬子，亦師亦父，多過似男友！拍拖年幾，最終分手。近年萬梓良長留大陸， 02年同國內空姐郭明黎結婚，有一子萬大千，偶爾回港拍戲，依然有火。
江華
96年，鄧萃雯過檔亞視拍《我和春天有個約會》，被影到撻著拍檔兼人夫江華，全城皆知。大婆麥潔文嬲爆，孖住老公江華上電視數臭鄧萃雯。多年後九姑娘公開承認呢段孽緣係佢做過最後悔嘅一件事。巧合嘅係，三個人依家都信主，哈利路亞。
鄭敬基
98年，鄧萃雯喺一次露營活動中，識到失婚爸爸鄭敬基。當時唔少人錯以為呢段係姊弟戀，但男方其實大女方 4年。鄧萃雯話過鄭敬基好照顧佢，但後來男方要返加拿大發展，二人拍拖年幾後分手。依家鄭敬基仍長留加國，偶爾登台出騷。
林志豪
99年，鄧萃雯被影到同細佢 8年嘅亞視藝員林志豪蒲吧，傳出姊弟戀，但女方多次否認。依家林志豪同萬子一樣長留內地拍劇，九姑娘上微博就可以見到呢位緋聞舊情人。
.[忽然1周]鄧萃雯回到溫柔時
http://hk8news-e.blogspot.com/2012/10/1_5840.html
