媽咪姐
劉松仁 大狀愛上主
2012年10月26日
台慶重頭劇《名媛望族》終於出場，媽咪姐呢啲資深電視劇監察員當然又要出動啦！金睛火眼 𥄫住個電視幾晚，無得傾，成套劇嘅亮點一定係 63歲嘅松哥劉松仁。
Wow，佢同三太江美儀嗰幕調情戲，真係熱辣辣，兩個攬攬錫錫去到盡！都話薑係老嘅辣，後生仔好似吳卓羲呢啲，就一定做唔出呢種情趣同韻味嘞。仲有呀，飾演香港首位華人大狀嘅松哥，今次大曬英文，同阿仔馬國明傾傾嚇，都會忽然彈句「 That's enough!」出嚟，真係估唔到喎。而且，媽咪姐聽落，覺得佢講英文，流暢過喺加拿大 UBC畢業嘅馬明！嗱，媽咪姐無乜嘢叻，但求知慾就一向 keep住咁旺盛嘅！即刻上網 check，原來劉松仁係港島名校聖約瑟書院畢業㗎。喺佢嗰個年代，絕對係非常勁，啲英文程度分分鐘仲犀利過依家一街都係嘅大學生㗎。
講開又講埋，可能因為自細讀教會學校關係，劉松仁原來係虔誠天主教徒，仲長期參與教會工作。早前，媽咪姐就撞到佢特登揸車去九龍塘聖德肋撒天主堂望彌撒，好有心！最近，佢接受訪問時話：「中途離開過（教會），迷失過，依家想做多啲。」都好嘅，天父係導人向善，但記住都要繼續做多啲好戲俾我哋睇呀！
《名媛》登場 讚多過彈
英語大檢討
有香港網民話套劇有咁多英文對白，有啲突兀，有人仲插番書仔馬明啲英文口音「不堪入耳」。不過就有唔少人喺微博撐松哥，而見慣風浪嘅佢，就大方話會「接受意見」。
微博 show quali
松哥不時喺微博貼出英語警句，仲加埋自我見解，非一般藝人呀。
「鹹濕」有理
劇集開首，松哥已經同最風騷嘅三太江美儀打曬茄輪，非常重口味！網友忍唔住留言話佢「好鹹濕」，好演技！而松哥亦喺微博讚江美儀做得好，但亦不忘冧埋大婆韓馬利，真係識做。
靚相女
近年熱愛攝影嘅劉松仁，不時喺微博貼上花草靚相，送俾《名媛》眾女主角，人人有份。喺劇中做慣齊人嘅佢，入戲喎！
.[忽然1周]劉松仁 大狀愛上主
http://hk8news-e.blogspot.com/2012/10/1_8574.html
