娛頭
JJ發狐功 樊少皇電話恐嚇 樊太：驚斷水斷糧
2012年09月06日生吞「小三」汙名， JJ（賈曉晨）堅定不理外間指責，誓死攬住拋妻棄子女的賤男樊少皇；兩人更大無畏，不理另一方感受，輪流公開發表愛的宣言，以表示愛得堅定，拆唔散。
近日多番強辯女友 JJ並非小三的樊少皇，堅稱同「老婆」陳少霞在四年前已經分手，斷絕關係，誰想得到原來在他初認識 JJ當晚，仍然同陳少霞共處一室。
為氹掂 JJ深信自己並非小三，據知樊少皇在事發後，曾打電話同「老婆」講數，要脅對方不可以向外數 JJ不是，及踢爆他們的真正關係，否則會經濟封鎖，斷供他們三母子糧水。
公開示愛
拋妻棄子女的樊少皇，上星期接受無綫訪問時，眼都唔眨在熒幕前，公開向新歡 JJ發表愛的宣言，「我嘅愛係堅定，我哋會繼續走落去！」再三強調 JJ並非小三，並表示一開始交往，已經視對方為結婚對象。
這次示愛行動，冧到 JJ暈陀陀，第二日馬上作出回應，一臉羞怯地自爆同樊少皇一見鍾情。
「我覺得呢個男仔（樊少皇）好真，佢做啲角色好似我同鄉。」 JJ更唔介意男友已經有兩個十幾歲的仔女，「其實我可以同佢哋（樊的子女）做朋友，我有啲 fans仲細過佢哋。（但係樊少皇俾人話拋妻棄子。）兩樣嘢唔可以混埋一齊講，感情還感情，親情還親情。」發功搶做正印。
JJ同樊少皇愛得火熱，公開打情罵俏，完全無理會被遺棄的三母子的感受，更可怕是，樊少皇早在事件被揭發前，已打電話恐嚇老婆陳少霞，叫她小心說話。
「最初有人傳少皇同 JJ搞埋咗，霞女都第一時間問過少皇，佢就話唔知點解會俾人咁傳。其實當時霞女都心裡有數，知道個老公呢幾年喺大陸拍戲，成日有唔同女人，自己又要湊住啲仔女，冇辦法 𥄫實個老公，只要對方識返屋企，佢就隻眼開隻眼閉。
「點知今次少皇同 JJ嚟真，仲話要發聲明講同霞女四年前已經分手，如果唔係人哋（ JJ）就唔會同佢一齊。霞女梗係唔肯，仲話要同傳媒講清楚，兩個人喺電話度嘈曬，少皇話如果佢向記者爆料，又或者數臭 JJ，以後唔會再俾錢養佢同一對仔女，會完完全全同佢哋脫離任何關係。」霞女身邊人說。
被迫收口
據知，陳少霞自懷有細仔後，已經十年沒有外出工作，要她重新投入社會，談何容易；加上一對兒女仍需要她照顧，權衡輕重下，她被迫妥協，接受現實。
「依家佢哋一家三口每個月開支要成五萬幾六萬蚊，霞女知道就算佢出番嚟做嘢，頂多咪搵到萬幾蚊，點慳都養唔到兩個仔女，同埋少皇淨係年幾前俾過一筆錢霞女做家用，都已經用得七七八八，如果少皇再唔俾錢，佢哋三仔乸都唔知點生活。所以霞女唯有應承個衰人，話一句嘢都唔再講，點知有一日出咗段報導，話佢哋年頭仲一齊喺黃埔睇戲，少皇即刻癲咗，打電話狂鬧霞女，話唔會再俾錢佢，又唔會再見對仔女，嚇到霞女喊曬，仲掉番轉頭同個衰人道歉。」
本週一（九月三日），樊太出外接細仔放學，對於記者追訪，她早有防備，戴帽戴黑超，對於記者追問，亦不似之前會講幾句，只有一臉委屈表示：「我唔講得！」
日前有讀者提供了樊太同女兒的家庭相，以及一張樊少皇大女在 facebook上載影住四張戲票的相片，上面寫住他們一家四口去睇戲，力證他們在去年仍然在一起。
頂硬上
冇工作、零收入的樊太陳少霞，除咗養自己，仲要照顧一對仔女，一家三口的衣食住行，開支龐大，為咗錢，忍氣吞聲硬食。
大話連篇
身在內地的樊少皇，亦一直大話連篇，除了呃 JJ，更希望可以瞞騙所有人，企圖保住形象，亦因此，他矢言與老婆已經分開四年。不過，據了解，認識 JJ（今年三月廿三日）即洪天明婚宴當晚，飲宴後，他便返回黃埔寓所，與陳少霞一齊過夜；而樊少皇又講將約值廿萬的日產 Skyline坐駕留給陳少霞用，以示有情有義，卻完全隱瞞當年供車錢，是由陳少霞死慳死抵省下來，自己一個仙都冇俾過。
最令陳少霞傷心，是樊少皇竟然指責她刻薄奶奶，趕老人家出門口，加上知悉另一半原來在杭州送了一層樓給另外一個女人，反而她幫樊家生完又生，捱了多年，乜都無！時至今日，淪落到要為隨時被斷經濟，擔驚受怕。
「當年因為少皇老豆（樊梅生）包二奶，所以佢阿媽去咗同少皇佢哋住，霞女同奶奶的確唔係好啱，兩個人成日為咗小事嘈，少皇又嫌煩完全唔理，但佢阿媽話要走佢都冇阻止，依家就賴曬霞女刻薄佢阿媽所以分手，真係屈得就屈。」知情者說。
有其父必有其子
樊少皇嗒女嗒出禍，其父樊梅生雖然其貌不揚，但同樣花心。據知，現年 71歲的樊梅生，曾任電影武指及演員，與太太結婚後，居住在紅磡區舊樓。風流成性的樊梅生，婚後不時被街坊目睹帶不同的女朋友回家，甚至試過一屋藏兩妻，說服老婆同二奶一齊住，父子更因此反目，直至年前，樊少皇終忍不住，勸服母親離婚，開始新生活。
雪藏懲戒
在這段三角關係中，成功坐正勝出，但她的經理人公司 Snazz，對這段戀情極為不滿，就連 JJ的其中一個老闆阿叻（陳百祥），都曾出口勸 JJ同樊少皇斬纜，以免影響形象同事業，可惜她戀愛大過天，就算面臨被公司雪藏，都堅持繼續。
「 JJ向來都好聽公司話，但今次佢就企硬，唔理公司點反對，佢都話呢個男人（樊少皇）冇呃佢，要同佢喺埋一齊，文迪（經理人）都好失望，勸又勸過，鬧又鬧過，都冇用，唯有叫 JJ媽咪嚟香港睇住個女。公司都對佢抱放棄態度，唔會再好似以前咁幫佢，爭取咁多機會，等佢自生自滅。」 Snazz一名員工說。
沒有好結果
唔少女星為咗搵真愛，都不惜背住「狐狸精」之名，但十居其九最終都無法開花結果，仲賠上了事業，雙失！
梁詠琪
99年， GiGi與鄭伊健合作舞台劇《仲夏夜狂想曲》時，介入伊健與邵美琪的感情，男方生日正日， GiGi以勝利姿態步出男友寓所，宣示正印身份，被傳媒封為「好勝 GiGi」，令她清純玉女形象一鋪清袋。二人拍拖六年，有指 GiGi多次逼婚，令伊健提出分手。
郭羨妮
06年拍攝《學警出更》搭上有婦之夫陶大宇，陶太阿寶不甘丈夫被搶，接受雜誌訪問時大鬧：「郭羨妮係第三者！」郭羨妮因此背上「狐妮」之名，並急急避走溫哥華三個月，與陶大宇斬纜。
江若琳
出道時形象清純的江若琳， 08年被老闆娘趙雪英當眾踢爆引蛇入屋，暗指江若琳是第三者，介入她與老公林小明的婚姻，近年她已轉到內地發展。
.[壹週刊]JJ發狐功 樊少皇電話恐嚇 樊太：驚斷水斷糧
http://hk8news-d.blogspot.com/2012/09/jj.html
