2012年9月13日星期四

鄧健泓縮鼻走眼袋

2012年09月13日

上個禮拜四（九月六日）無綫新劇《初五啟市錄》舉行試造型記者會，現場焦點係男女主角陳錦鴻同郭羨妮，前者因為要照顧患有語言障礙嘅仔仔而停工，家陣情況有明顯改善，陳錦鴻可以安心重投工作崗位；至於郭羨妮，有傳佢老公朱少傑無錢養家，搞到老婆要出番嚟賺奶粉錢，佢話老公唔知呢單報導，兩公婆亦唔會成日講錢。

可憐天下父母心，不過八珍只係留意鄧健泓，因為佢成個樣都唔同曬。對番舊照，鄧健泓以前眼肚魚尾紋樣樣齊，仲有個上窄下闊正宗蒜頭鼻，家陣眼紋冇曬，眼肚移平，鼻翼位收窄，三管齊下，整容女星見得多，鄧健泓算係開男星換面先河。

聽講打 botox可以二人同行一人收費，不過女友龔嘉欣冇參與，睇番佢以前有線做足球台個樣，五官冇變，只係將開罅門牙（箭嘴）箍番埋！

郭羨妮唔認拍劇搵奶粉錢，同老公朱少傑講心唔講金，仲打算下年生多個之後封肚，兩個夠曬數！

為咗照顧患有語言障礙嘅仔仔，停工一年嘅陳錦鴻終於復工拍劇，仲話仔仔而家讀書同溝通都有進步，無須入讀特殊學校，心情靚曬。