台慶節目《走過烽火大地》洪永城闖中東戰地

壹週刊 第1175期

大解慳囊

闖中東戰地　餘詠珊千萬保愛將

自從餘詠珊空降無綫，成為非戲劇製作總監，有傳佢偏心一班有線舊愛將，黃翠如孭飛做女主角，新加入無綫，主力做旅遊節目的洪永城，新工上任馬上被委以重任，拉隊遠赴伊拉克、伊朗、黎巴嫩等中東戰亂地區，拍攝無綫重頭製作《走過烽火大地》，為保愛將命仔，無綫改慳儉作風買重千萬保險，錫到出曬面。

洪永城在黎巴嫩跟當地軍隊影合照，士兵冇揸槍兼態度友善，面對鏡頭的洪永城亦終於笑得出。

被拒簽證

由有線跳槽到 Now，洪永城一直主力做旅遊節目，到處飲飲食食歎世界，今次過檔無綫，工作性質雷同，但生命隨時有危險。

洪永城等一行七人，早前深入伊拉克、伊朗、車臣、黎巴嫩等時局最動盪的地區拍攝重頭特輯《走過烽火大地》。全部人毫無戰地採訪經驗，雖然所到之處跟激戰地區有段距離，但無綫為安全計，事前做足多方面功夫。

「 Sandy（無綫非戲劇科製作總監餘詠珊）唔想攞同事條命較飛，事前幫佢哋買咗過千萬保險，臨出發前仲再三同洪永城佢哋講，任何人心有疑慮或者擔心，都可以即時退出，公司唔會責怪。」

公司力撐，但未出發已經遇到難關：「本來喺北京嘅伊拉克、伊朗大使館申請入境簽證，點知聽到我哋話入去拍嘢，即刻講『你們不要命嗎？』，結果全部唔批，惟有先到土耳其見步行步，逐個地點申請。」無綫工作人員說。

另外公司特別請來當地的庫爾德人做嚮導，庫爾德族散居中東，熟悉各地情況，亦協助他們疏通各地關口，四十天的拍攝行程，總算有驚無險。

停車拍攝期間，洪永城遇到坦克車經過，被大炮指向頭部，他依然要強作鎮定。

有危先有機呀！

（設計對白）

雖然不是核心戰區，不過黎巴嫩境內不單不時有坦克車經過，而民居牆身亦布滿子彈窿。

大炮瞄準

沿途經常碰見坦克車巡邏，遇上手持重型機槍軍人上車檢查，不時周遊列國的洪永城，亦難免心驚膽顫。「有次直頭有架坦克車，突然將支大炮指向我哋，嗰刻心裡面真係好驚。」洪永城說。

洪永城抵達黎巴嫰時，正值鄰國敍利亞戰況最激烈之際，申請進入阿富汗的計劃，亦因時局問題，簽證被拒而作罷。

餘詠珊空降無綫做非戲劇科製作總監以來，動作多多，今年一人一票選港姐鬧得滿城風雨，雖然未能省靚招牌，殼王陳國強依然繼續力撐，「班老細有搞作總好過冇搞作，總比六嬸時代有作為得多，依家係改革時代，錯漏總有，所以 Sandy咁夠薑，年底普選視帝視後，希望再炒熱話題。」知情人士說。

相比於烽火四起的黎巴嫩與土耳其南部接壤的格魯吉亞人民生活比較穩定，洪永城亦有機會跟當地人飲番杯。

因核武問題被美國單方面制裁的伊朗，國內人民生活依然平靜，洪永城更作實地體驗，在飛髮鋪剪髮。

黃翠如是餘詠珊在有線時期的愛將之一，餘詠珊回歸無綫，立即安排她與陳展鵬合作拍劇《心路 GPS》。

今屆香港小姐是餘詠珊重返無綫頭炮大作，為了讓觀眾有新鮮感，她捨棄傳統製作，結果反應未如理想。

自己友多著數

自從餘詠珊重返無綫後，她在有線娛樂新聞台一手發掘的幾個主播，包括洪永城、陸浩明以及黃翠如都跟隨舊老闆過檔無綫，有舊老闆撐住，黃翠如先行爬過一班二、三線姐仔頭， 孭重飛在新劇《心路 GPS》擔正，跟上位陳展鵬做情侶，有迷你版吳大維之稱的洪永城，亦在台慶月推出的重頭旅遊節目《走過烽火大地》做主持，至於近月才加盟的陸浩明，據知亦已有 job在手，安排主持旅遊特輯。

.台慶節目《走過烽火大地》洪永城闖中東戰地
http://hk8news-d.blogspot.com/2012/09/blog-post_4851.html