2012年8月24日星期五

傅珮嘉開騷一腳踢

2012年08月24日

借問聲你哋見到呢條題之後，內心有冇「唓」一聲呢？事關傅珮嘉冇人氣，媽咪姐做乜要寫佢呢？實情係今年 31歲嘅佢，月底將會搞個超迷你音樂會。

歌手開騷，表面正路，但原來傅珮嘉喺樂壇捱咗足足 15年，前年亦已成為人妻，連仔都生埋。今次為咗一圓開騷心願，於是拎咗幾十萬出嚟，由籌備、搵 band、宣傳一腳踢，每步有血有肉㗎，咁值得媽咪姐俾少少篇幅同佢打氣嘅。

傅珮嘉當年與張栢芝同屬「環球唱片」新人，當時栢芝彈出，傅就經常掹車邊出騷。

家陣冇唱片公司重金包裝宣傳，傅珮嘉惟有喺微博放張「冇面見人」嘅個唱海報穀飛。聽講反應 OK噃！

傅珮嘉前年嫁咗俾台灣仔，婚後就好快生咗囝囝 Jasper，仲經常將阿仔嘅得意相放上微博。