http://hk8news-d.blogspot.com/2012/08/1_9555.html.
娛聞樂
不和升級 阿姐兩度改期 黃淑儀劈炮唔宣傳
2012年08月24日
由汪明荃及黃淑儀孭飛的新劇《巴不得媽媽》下周一（ 27日）晚首播。劇中兩位阿姐惡鬥連場，火藥味濃；私底下，她們 36年前合作《書劍恩仇錄》已結怨。
今次兩人再度碰頭，拍攝期間已因對白及髮型問題辣著火頭。無綫有見及此，順勢將兩人不和橋段擺上枱，拍成宣傳片，製造話題。本周三（ 22日），身處加拿大的黃淑儀，本應返港幫手宣傳，但由於汪阿姐為遷就自己粵劇演出，勒令監製將宣傳期一改再改。新仇加舊恨，黃淑儀索性以「訂不到機票」為由，拒回港做宣傳，實行有你冇我。
承接劇集《巴不得爸爸》餘威，今年 4月，無綫開拍續集《巴不得媽媽》，主角黃淑儀（ Gigi姐）有得留低，無綫更安排與她有積怨的汪阿姐做拍檔，擺明要她們鬥「戲」。曾於《書劍恩仇錄》被汪阿姐用劍刺傷眼角險些毀容的黃淑儀，早前在《巴》造型會上，卻自爆為了阿姐，推掉王維基城電的過檔邀請，表面上看似是刻意向汪阿姐示好，實情兩人卻面和心不和。
Gigi還以顏色
《巴不得媽媽》拍完不足 3個月，便安排在下周一（ 27日）播放，眾演員亦開始預留檔期宣傳。根據以往慣例，無綫會於劇集首播前的周末安排活動，為劇集造勢。不過，汪阿姐在本月 25日至 30日為「沙頭角中元節嘉年華會」表演粵劇，事先講明在這段時間唔會現身做宣傳，私底下更致電監製潘嘉德，要求提早一至兩星期安排宣傳活動，遷就自己的綵排及演出時間。
不過，當監製通知所有演員後，阿姐又突然改變主意，表示只得 22日有期，其他日子一定唔會到，搞到監製和台前幕後嗌曬救命。最後監製敲定周三（ 22日）在葵芳新都會廣場做首次宣傳活動，就曬阿姐。
正在加拿大休息的黃淑儀及後亦以「訂不到機票」為由，拒絕返港宣傳。知情人士說：「 Gigi姐都知道套劇會喺今個月底播出，一直話會飛返嚟，不過當佢知道宣傳日期要個個就阿姐，拍劇嗰陣又同佢炒過大鑊，穀鬼氣索性唔返嚟。講真，依家啲學生仲放緊暑假，基本上大把機位，點會 book唔到吖。大家都明嘅，無理由叫佢咁頻撲返嚟宣傳，陣間改期又搞到佢。」
公事繁忙
新劇《巴不得媽媽》即將播出，由於汪明荃要專心排練粵劇，故要求其他演員遷就她的檔期宣傳。黃淑儀知道後，決不賣帳給對方，索性不回香港宣傳。
分開拍宣傳片
兩個阿姐輩拍劇時已經火星撞地球，原來拍完戲一樣勢成水火。上個月，劇組原定安排二人拍攝宣傳片，阿姐卻講到明要同黃淑儀分開拍攝。有工作人員透露：「原本個 trailer(預告片)係講阿姐同 Gigi姐鬧交，不過阿姐聽完個古仔後，就話：『不如分開拍啦，後期剪片 key番一齊都一樣啫，費事一個等一個咁嘥時間。』而 Gigi姐對呢個提議亦冇異議。」最終兩人雖然同一日拍宣傳片，但實則分開上下午拍攝，根本沒有一刻碰面機會。
就黃淑儀唔返港宣傳《巴不得媽媽》，周三（ 22日），記者在宣傳活動中訪問汪阿姐，她竟以唔舒服為由，透過助手推卻做訪問，之後更由後台通道離開現場。其實她與黃淑儀的恩怨已過了 36年，都係時候放低啦。
精神奕奕
阿姐在宣傳《巴》劇時，表現投入，其間更落力和拍檔鍾景輝玩遊戲。
獨欠 Gigi姐
本周三（ 22日）《巴不得媽媽》在葵芳新都會廣場做宣傳，全體演員均有出席，獨欠 Gigi姐。今次活動為遷就汪阿姐，罕有提早在周三舉行。
監製為難
汪明荃與黃淑儀面和心不和，曾為簡單一句對白搞到面紅耳赤。拍攝後期，兩位阿姐想改對白，就各自搵監製傾，免再起爭拗。
稱病拒回應
活動完畢，阿姐先後做過電視台和報章記者訪問，之後本刊記者道明問題後，阿姐突然走入休息室，並透過助手表示唔舒服，婉拒回應。
做和事老
演員之一的羅仲謙，對於新劇要遷就阿姐而提早宣傳，表示不知情，「我第一次收通知就係今日呢個日子。（ Gigi姐嚟唔到會唔會覺得唔人齊？）冇所謂，點都要就大家時間啦，我都有機會去唔到宣傳！」
