http://hk8news-d.blogspot.com/2012/08/1_2338.html.
娛聞樂
建酒廠 搞有機農務 阿燦睇化：錢夠使就得
2012年08月24日
做過傳銷、賣過叉燒，廖偉雄（阿燦）多年來搞過不少飲食生意，但最後都損手爛腳，試過孭落一身街數，要破產收場。
失敗，並不代表放棄。今年 54歲的他終於學精，唔再揼錢，寧願在一間農業生物科技公司打工，每月𢭃幾萬蚊人仔做總經理。除了發展有機農務外，現時他更主力搵靚水源、建酒廠、釀米酒。阿燦和太太更帶本刊記者上廣州，視察水廠工程進度。
經歷無數起跌，阿燦睇得好化，他捉住老婆隻手對記者說：「錢夠使就得喇！」
定居廣州的阿燦，由太太楊慧玲陪同來港，為有線拍攝《食出五味人生》。之後阿燦和太太搭直通車返廣州，順道帶本刊記者採訪他們平日的生活。在短短兩小時的車程，阿燦道盡三十年來的辛酸。
發哥開千萬支票
94年，阿燦毅然減產，叉隻腳入商界話要大展拳腳。雖然滿腹大計，但衰嘢接二連三，結果搞到破產，連阿媽的棺材本也要攞埋去還債。阿燦說：「以前喺香港買落嘅樓同車，都因為還債賣曬喇！依家乜都放低，否則我一早燒炭自殺。」他說當時周潤發和劉德華也曾先後給他一張上限一千萬的支票，但阿燦選擇靠自己走出逆境。
近年阿燦主攻國內，自家有機品牌「阿燦米」銷售成績不俗，故此他雄心再起，成為「香港豐智碧全農業生物科技有限公司」的總經理，以月薪加分紅制搞米酒，他說：「錢夠使就得喇！呢份工好有意義，教中國農民種有機植物，唔淨止做耕田佬。」
既然有大財團力撐，阿燦滿腹大計，搵靚水源加入自家有機米釀酒，「大家一直認為米酒只用嚟拜神，唔上得大場面。不過公司收購咗一個無汙染山泉，用呢種泉水加埋自家有機米，足足用五斤米先可以釀成一斤酒。所以要尊稱呢啲做『米液』。」「阿燦米液」成功與否仍是未知之數，但記者跟隨阿燦視察過釀酒廠，發現酒廠發展十畫未有一撇，看來這條「米液」之路，將會很漫長。
曾和太太打交
阿燦為生意東奔西走，曾經疏忽家人， 02年更曾傳出夫妻婚變，太太為情自殺。此時阿燦捉實太太隻手，說：「咁多年前嘅嘢唔想再提，但自殺真係冇得求證。總之我哋兩公婆結婚三十年一定鬧過交，仲打過交㖭！」
牀頭打交牀尾和，現時阿燦和太太定居廣州，「千幾呎都係租三千蚊人民幣，朋友租俾我嘅，廳房大之餘仲有露台！仔女都大曬喇！阿女舊年仲結埋婚，喺新加坡開飲食學校。阿仔就喺大馬做酒店管理，久唔久嚟探我哋，我都有地方俾佢哋瞓。」雖然阿燦似乎享受在商場打仗，但他仍希望拍劇，「我會再返娛樂圈，將自己過去廿年來上上落落嘅人生經歷放喺戲劇上。」
阿燦從商仆到應
廖偉雄憑 79年《網中人》的阿燦一角走紅， 90年他淡出娛樂圈從商，卻遇上金融風暴，屢敗屢戰，認真有毅力。
94年 搞傳銷
他投資生產聲稱能杜絕臉上蟎蟲的護膚品進軍大陸，撞正內地立例禁止傳銷，令他損失慘重。
98年 開夜場
阿燦投資四百萬於內地開 disco，可惜被股東騙財，結業收場。
99年 賣車仔麵
在大馬連開三間「燦師傅」車仔麵檔，初時生意滔滔，其後被指食品質素下降，又遭黑社會收保護費，最後全線執笠。
99年 斬燒味
建立「燦師傅美食」品牌醬料，之後更發展成燒味系列，賣「發溫雞」、叉燒等，再推出「燦師傅」廚房用具，可惜兩年後玩完。
02年 開茶餐廳
於北角開「燦師傅茶餐廳」，邀請梅小惠等藝人登台，但最終蝕住離場。
03年 賣即食點心
阿燦於國內推出「全叮宴」系列即食點心，滲入國內不少超市，暫時生意 OK。
05年 推有機米
建立有機米品牌「阿燦米」，在廣東地區銷售不俗，他更經常化身農夫耕田宣傳。
