http://hk8news-d.blogspot.com/2012/08/1_31.html.
滾熱辣
苦等六年 伊健拒生 蒙嘉慧為嫁妥協
2012年08月31日
45歲鄭伊健自從 06年與蒙嘉慧（ YoYo）結伴打羽毛球譜出「蒙麵戀」後，今年踏入「七年之癢」期。曾公開末日結婚論的伊健，周一（ 27日）演唱會慶功宴中，終於向蒙嘉慧開出結婚期票，揚言會在下年低調完婚，但時間、地點則堅持保密。
苦等六年，一直恨嫁的蒙嘉慧終於有望入鄭家門，但入門前第一條要守的家規，竟然係唔俾生仔留鄭種，令 39歲蒙嘉慧嫁得唔生得！
一直對婚事唔嗲唔吊的鄭伊健，眼見身邊好友陳光榮和陳小春均已成家立室，終於的起心肝決定結婚。周一（ 27日）他在演唱會慶功宴上，親口證實明年結婚，「好快 嘞！不過真係好私人 嘅事，結 咗婚會講俾大家知，唔會係今年，係出年！但我唔講時間地點，係私人事。（有計劃？）唔係一早 plan，要講 feel。」
羨慕有餡盈盈
苦等六年，如今終於嫁得出，蒙嘉慧理應雀躍，不過未入鄭家門，卻先要守第一規條。據知，大細路鄭伊健向來嫌小朋友麻煩，因此結婚條件是決不生仔。他曾斬釘截鐵說：「無必要有下一代！唔係有冇能力問題，唔關經濟問題，係我唔想小朋友面對依家社會壓力同環境。我都希望將來另一半有相同諗法。」
與蒙嘉慧商量結婚時，二人曾因生仔一事有拗撬。「 YoYo好耐之前講過唔鍾意小朋友，但近排見到班姊妹好似湯盈盈同周家蔚都有 咗，佢改變想法，同朋友講自己想生。不過佢同伊健傾，伊健就話今世人一定唔會做老竇。佢講到咁決絕，無非係想 YoYo死心！」
後台嗌求婚
伊健今次忽然開金口講婚期，其實是遭好兄弟「圍攻」所致。上周五（ 24日），做足四場表演嘉賓的錢嘉樂，每晚都在台上向伊健施壓，直到周一尾場，更號令現場萬多個 fans，逼伊健對女友有個交代。至於從內地返港的陳小春，亦接力爆肚請蒙嘉慧上台，卻遭伊健連番阻止。
台上伊健冇任何表示，演唱會後，蒙嘉慧在後台出現時，一班兄弟再次起哄。知情人透露：「完 咗個騷後， YoYo入 咗後台，當時伊健掛住同 Wilson（錢國偉）吹水，見唔到佢。點知嘉樂仔帶頭起哄，連埋 dancers同阿 Lo（林曉峰）佢 哋，猛嗌『求婚』，見伊健粒聲唔出面 燶 燶，就唔敢再嗌。唔好話 YoYo，我 哋都尷尬到暈！」即使伊健後台甩到身，在慶功宴中，他再被記者圍攻，此時伊健終於證實會與蒙嘉慧拉埋天窗。
結婚為老父
除了遭身邊好友車輪轉迫婚外，伊健結婚決定亦因為父親。伊健身邊好友表示，「伊健爸爸就快 80歲，早兩年仲好壯健，朝朝同伯母行晨運。不過年紀大身體多毛病，兩個老人家成日哦伊健，話佢大佬同細妹都結 咗婚，淨係佢未成家立室。」向來侍父母至孝的伊健，望見兩老短短一年間，原本一頭黑髮變成白髮蒼蒼，開始動搖其「不婚主義」。
雖然蒙嘉慧生仔夢唔使諗，不過有得嫁總好過攝灶罅，惟有局啃！
