娛聞樂
要人仔唔要獎 謝安琪頻撲養家
2012年12月21日
憑〈囍帖街〉彈起的謝安琪，一度挑戰天後位置，可惜她今年受轉會影響，一首 hit歌都冇，年尾樂壇頒獎禮隨時捧蛋。
既然冇份爭獎，加上又要孭起成頭家，謝安琪情願返內地登台𢱑人仔好過。頻撲北上賣唱，搞到謝安琪冇時間照顧兒子張瞻。早前本刊就拍得她一家三口買快餐外賣醫肚。
年初謝安琪與環球傾唔掂數，令她人氣陷入穀底。直至 10月，她才落實過檔星煥國際，完全唔夠時間發力，就連商台剛宣布「我最喜愛女歌手」的最後五強中，謝安琪亦榜上無名，十分無奈。知情人士說：「商台一直好錫 Kay（謝安琪洋名），但就同星煥嘅關係唔算好好，況且 Kay今年得兩首歌上榜，算過度過後，商台索性飛阿 Kay出局。」
唱勻廣東省
由三年前「傳媒大獎」到今年可能乜獎都冇，謝安琪的事業確實大起大落，不過這似乎並未影響她心情。上周日（ 9日）晚上，本刊拍得謝安琪、老公張繼聰和五歲囝囝張瞻，一家三口現身大埔超級城。他們抵達商場後，先到「吉野家」買牛肉飯外賣，然後去「肯德基」掃炸雞餐，之後就坐車返大埔比華利山寓所。快餐做晚餐，唔算健康。
食得咁匆忙，與近年謝安琪長期北上不無關係。其實她今年好事多磨，一來被環球打入冷宮，二來又未被無綫解封，零曝光機會下，謝索性強攻內地市場，其經理人夏森美更一口氣為她接下八場廣東省巡迴騷，唱勻湛江、汕頭、雲浮等偏遠地方。「做每場騷之前，要去當地電台宣傳又要綵排， Kay一個月有成兩個幾禮拜唔喺香港。就算做完騷，搭長途車返嚟都淩晨兩、三點，阿仔都瞓咗覺啦！」八場歌酬有成 400萬人仔（約 497萬港幣），頻撲都無計。
謝安琪：我都冇歌
周一（ 17日），謝安琪出席活動時，就向記者自爆對於獎項已打定輸數，她說：「哎……獎項呢啲嘢冇話自己諗就有，反正我都冇新歌，隨緣啦！近來我的確經常返內地做嘢，去咗好多唔同地方唱歌，個騷仲要做到明年二月。不過我揀星期六、日搭長途車上去唱，希望閒日可以多啲時間陪嚇個仔。」她深知自己冇時間湊仔，於是她決定今年聖誕節補數，「真係要唞一唞，所以聖誕節要留番俾屋企人，會開一個小小嘅大食會慶祝。（送咩禮物俾囝囝？）我唱反調，覺得佢物質都好豐富，會叫佢喺自己嘅玩具入面揀一份出嚟捐咗去。」
兩公婆密做吸金
做歌手靠一首金曲食糊，因此 07年的〈囍帖街〉帶挈謝安琪唱到內地海外街知巷聞，夾埋轉會費及香港其他散 job，保守估計，謝安琪今年賺過千萬。而一向被指靠老婆的張繼聰，近年亦成功埋到無綫堆，幫補家計。
養起一家七口
謝安琪走紅後，由月租四千的大埔村屋，越級進駐大埔比華利山三層獨立屋，除她一家三口外，更與自己父母和張繼聰父母同住，養起一家七口，認真辛苦。
.[忽然1周]要人仔唔要獎 謝安琪頻撲養家
http://veryy8.blogspot.com/2012/12/1_8326.html.[忽然1周]要人仔唔要獎 謝安琪頻撲養家
http://veryy8.blogspot.com/2012/12/1_8326.html
