2012年9月3日星期一

張智霖豪擲350萬買「玩具」

張智霖豪擲350萬買「玩具」

張智霖（Chilam）買車如買玩具，一眨眼，近日又豪擲350萬元買超級跑車。前晚他便帶新「Toy」平治SLS AMG開工拍劇，並將這架玩具周街泊，難怪同劇的視後胡杏兒亦眼紅：「嘩！架車好型呀！」

張智霖嗜好不多，但愛車如命的他每每一擲買新「玩具」已夠攞命！繼今年2月豪擲300萬元買林寶堅尼Gallardo後，未知是否避免車腳郭富城、沈嘉偉及餘文樂笑他「唔轉款」，事隔短短半年，Chilam已火速扲350萬元，為車庫添置新成員平治SLS AMG。新「Toy」落地，Chilam也不介意招搖過市，並駕駛新「Toy」開工周街泊。

前晚Chilam與胡杏兒於中環蘇豪區拍新劇《衝上雲霄II》，收工後，杏兒獨自登上保母車準備離開，Chilam見記者守候，不時左顧右盼，遲遲未肯離開服裝車。直至昨淩晨近二時，為趕快回家見囝囝魔童，他亦硬著頭皮取車走人。

杏兒眼紅：好型呀

原來Chilam將價值350萬元的新玩具就泊於路邊，新車型仔又突出，白色流線型之餘，雙門從側翼打開，十足十蝙蝠一樣。但Chilam無懼被刮花之險，連停車場也不入，只將愛車「曬」於當街當巷，公諸同好。難怪Chilam取車後，路過的杏兒放聲大笑：「嘩！架車好型呀！」而開工期間，Chilam心情輕鬆，埋位前與杏兒有講有笑。雖然場口只拍攝二人在樓梯行行企企吹水，但因天氣悶熱，Chilam不時抹汗、補妝及梳頭，還對住塊鏡狂照，比杏兒還要貪靚。有貼心的外籍人士特地送上春卷小吃給劇組人員，Chilam與杏兒連聲道謝。

發高燒「冧廠」

記者昨日致電Chilam，對於買新「Toy」一事，他三緘其口，並笑說：「唔講呢啲喇！」問是否其生日禮物？他說：「有人送畀我就好，你估人哋傻o架！」之後一笑帶過地說：「買好耐喇！唔講呢啲！」未知是否財多身子弱，Chilam前日連走幾組戲，結果感冒發燒，昨天要向劇組請假：「好慘，燒到101度，醫生開咗四日假紙畀我，叫我多休息，但食完藥仲有燒，老婆（袁詠儀）又返內地做嘢，惟有自己照顧自己。唉！最慘係呢幾日主要拍我嘅戲份，（對劇組）真係唔好意思，所以要爭取時間休息，希望聽日（今日）可以開工！」

平治SLS AMG簡介

車架及外殼均經過輕化處理，用鋁合金物料鑄造，全車只重1.62噸，馬力達114匹，扭力驚人。

引擎：V8

容量：6,208c.c.

最大馬力：571hp/6,800rmp

最大扭力：650Nm/4,750rmp

極速：317km/h（電子限制）

車型：雙門雙座位跑車

傳動：七前速AMG SPEEDSHIFT DCT雙離合器波箱

驅動：前置引擎、後輪驅動

綜合油耗：13.2L/100km

張智霖的「新玩具」連視後胡杏兒都非常羨慕。

張智霖豪請工作人員食宵夜。

張智霖與胡杏兒為新劇趕工，任得「靚跑」周街泊。