媽咪姐手帳
02年，黎瑞恩喺紅館開咗首個個人演唱會《夢想成真演唱會》後，即宣布退出樂壇，同年年尾更同「金利來」太子爺曾智明結婚。婚後嘅小恩子聽曬老公話，乖乖咁做少奶奶、廿四孝媽咪，但間唔中都會喺朋友搞嘅活動亮一亮相。好似上個禮拜，佢就出席「藝高會周年晚宴」，一身粉紅色裝束，打扮成花仙子咁，雖然娘娘地，但畢竟佢都38歲，仲生咗兩個，樣貌同身形都算keep得唔錯。
當晚媽咪姐見到小恩子個妝好似唔算好濃，但望真啲，塊面同條頸係兩截色㗎！頸上面嗰粒大癦，雖然用咗粉去遮瑕，不過癦上面嘅一條長毛就點遮都遮唔到。女人咁貪靚，小恩子就算唔脫「富貴癦」，都應該掹毛吖。唔通，呢啲就叫做「發達毛」？ ####
嫁入豪門你估話咁易！（設計對白）
粒癦嘅size真係唔細，加埋條毛，嗯……同佢嗰雙好好火嘅鑽石耳環，一樣咁搶鏡！
畢竟少出function，小恩子喺簽名板前影相，都有啲「硬軚」。如果再有碟出，都要train吓嘞。
最近本刊踢爆環球打算搵小恩子出Hi-Fi碟，但老公曾智明就唔係咁想老婆出嚟唱。睇大合照，小恩子企正中間，連當紅嘅陳展鵬都係靠邊站咋！咁有「江湖地位」，又真係唔好嘥嘅！
846期
