率先爆《 On CallⅡ》劇情 楊怡癌復發流產 楊怡,MW,

2013年11月1日星期五

率先爆《 On CallⅡ》劇情　楊怡癌復發流產楊怡,MW,

滾熱辣

率先爆《 On CallⅡ》劇情　楊怡癌復發流產

CY冇得俾你揀，師奶繼續硬啃 TVB劇集。《巨輪》呢個禮拜播完，下周一（ 4日）晚，輪到 30集台慶劇《 On Call 36小時Ⅱ》。今輯「一件頭」馬國明同「魚仔」楊怡終於結成夫妻，吸睛位仲有做慣醫生的吳啟華同嫩口朱千雪父女戀。

承接上輯，《 On CallⅡ》有不少手術室場面，但由於在 8點半合家歡時段播出，上集血腥鏡頭全部冇得留低。取而代之全劇高潮位，就係視後楊怡癌病復發兼流產的內心戲，絕對催淚過嘉欣 BB一味咆哮的喊戲。

其他影片

楊怡雙重打擊

上輯楊怡患有脊髓內腫瘤，成為與馬國明發展的一大障礙，最終「一件頭」成功清除楊怡體內的惡性星形細胞瘤。今輯兩人排除萬難結成夫妻，楊怡亦成功懷孕。不過好景不常，她的癌細胞此時突然復發。最終楊怡接受電療，忍痛決定流產。保唔住個胎，兩夫妻更因此事不斷爭執。痛失 BB亦令馬明焦慮症發作，壓力爆煲。加上小產後的楊怡，堅持由心胸肺外科，轉到馬明死對頭吳啟華打骰的病理科做專科實習醫生，二人決定離婚。此時馬明忽遇車禍危殆，楊怡才醒覺要珍惜眼前人。

衝破難關

首輯楊怡患癌，不想馬國明浪費青春在自己身上。後來他操刀清除楊的癌細胞，今輯楊怡終肯下嫁他。

難敵腰痛

楊怡脊髓內腫瘤復發，經常腰痛行路不穩，令大住個肚的她痛不欲生。

忍痛流產

楊怡婚後懷孕，本來是喜事。豈料癌細胞復發，迫不得已再入院做手術。最終保得住個大，保唔住個細。

慘遇車禍

馬明疲勞過度，離開醫院時被小巴撞傷，眼角及額頭流血不止，更陷入昏迷，要緊急送院做手術。令楊怡及飾演母親的黃淑儀擔心不已。

香香搶贏大隻謙

上輯羅仲謙暗戀實習醫生張慧雯，可惜追女唔成，結局都係孤獨一支公。不過今輯大隻謙飛來艷福，先有實習醫生李雪瑩投懷送抱，後有做社工的香香對他一見鍾情，最後大隻謙揀咗身材、樣貌同樣煞食的香香，果然有眼光。

自小患上腦癌的岑麗香，手術後，腦內仍埋下計時炸彈。暫時康復的她，決定在醫院當義工，為病童帶來歡樂，其樂觀性格更吸引到羅仲謙對她傾情。

羅仲謙不時鼓勵李雪瑩，令她以為對方亦對她有意，主動示愛，結果兩女爭一男，謙謙左右做人難，最後都係揀咗香香。

現實中，羅仲謙和楊怡拍《 On Call 36小時》時撻着，續集中他們雖然冇感情線，但有好多場對手戲，唔知係監製有心安排定無心插柳呢！

朱千雪戀絕症吳啟華

吳啟華空降入《 On CallⅡ》，不過他並非《妙手仁心》的「程至美醫生」，而是先由咖啡店老闆，轉職做病理科顧問醫生兼做楊怡的上司。劇情交代他有位已過身的妻子陳倩揚，並有一女。此時他遇到生命中的第二春朱千雪。朱為實習醫生，原有一要好男友，更把男友的親生仔視如己出，不過男友其後玩失蹤，朱不理父母反對，一手帶大男童。兩個同是天涯淪落人撞埋一齊，原本吳啟華礙於年紀大對方一截兼且自己患有中期癌症，唔敢開始戀情，但最終被女方熱情和主動性格征服，繼而發展一段相距廿年的「父女戀」。

在去年節目巡禮中，吳啟華和一眾《 On Call II》演員宣傳新劇，吳所帶的醫生名牌，嘜頭同個名都錯到離譜。 TVB咁小事都是是但但，《 On Call II》唔知會唔會又有「另類」驚喜呢？

佢個樣

唔似咁大年紀，我哋拍埋都好襯吖！

（真實對白）

朱千雪和吳啟華相隔 25年，好在男方 keep得好，樣貌身形都冇走樣。就算劇情講女追男，亦接受得到。

吳啟華因愛妻意外離世而留下陰影，即使本身擁有外科醫生牌，但卻不敢再做手術，留在咖啡店當老闆避世，最後因女兒心臟病發作，終做回醫生為她施手術。

《 On Call II》幾乎個個主角都有奇難雜症，做醫生嘅吳啟華亦有中期癌症，至於女友朱千雪，本來肥肥白白健健康康，劇集中段卻忽然感染傳染病，令原本唔敢同佢開始嘅吳啟華開始對佢心動。

雙華戀暗燒

「古佬」古明華同蘇玉華今輯是新加入的演員。蘇玉華是吳啟華姨仔，陳倩揚死後，她負責照顧吳的女兒的起居飲食，並覺得吳啟華沒有盡父親責任，處處針對他。飾演作家的她，極度抗拒異性，對掃把頭古明華更是厭惡之極，但由於一次英雄救美，令蘇玉華對古頓生好感，繼而發展成歡喜寃家。

飾演作家的蘇玉華，是吳啟華的姨仔，不時進出醫院找他，而認識了醫生古明華。古鍥而不捨追她，終成功打動了女方。

吳啟華女兒入院，阿姨蘇玉華非常緊張，同時令到吳啟華反省自己愧對妻女，後悔不已。

網友 buy中佬

無綫小生、花旦冇幾個，在《 On CallⅡ》繼續有熟口熟面的楊怡、馬明擔正，好彩今集有唔少生力軍加入，加埋有中佬吳啟華助陣，仲有朱千雪、岑麗香新紮花旦加入，話題性加番少少分。眾多角色中，網友幾乎集中討論吳啟華，有人期待但亦有人踩老餅。其實第一輯最高收視都有 39點，可惜撞啱近日發牌事件，搞到市民熄電視罷睇，相信行動陸續有嚟， TVB劇集唔受影響就假！