小寶失場累冧廠 田蕊妮着火：佢紅吖嘛！ 田蕊妮,MW,

2013年11月1日星期五

小寶失場累冧廠　田蕊妮着火：佢紅吖嘛！田蕊妮,MW,

保持距離

劇組冧廠後數日，要加一日補戲，無辜加多日戲的阿田，一見小寶扁曬嘴。

娛樂喧

小寶失場累冧廠　田蕊妮着火：佢紅吖嘛！

近日在《巨輪》中，爆 seed狂摑宋熙年的田蕊妮，兇狠程度勁過 14巴港女。劇中阿田惡起上嚟生人勿近，現實中，她原來一樣咁好火。

近日，阿田和肥妹「小寶」陳嘉佳為無綫拍新劇《忠奸人》，演一對肥瘦啤酒妹同居密友，誰知小寶日前拍外景時，竟然為了碼住發哥拍賀歲片《賭城風雲》，臨時甩場累全組人冧廠。當晚在場呆等三粒鐘的阿田即時扯火咆哮：「算點呀，唔到唔出聲！」事後回應記者時，亦句句有骨：「冇計啦！佢（小寶）紅吖嘛！」

其他影片

肥妹渴市，即使《老表，你好嘢》播出一年， 230磅的小寶依然有價有市。近日密密接 job的她，同時拍攝電影《賭城風雲》、《 Delete愛人》和無綫劇集《忠奸人》，據知其工作已排到出年，肥過肥仔水，卻因此惹怒拍檔。

微博曬命

甩場當晚淩晨，小寶在微博透露與發哥拍戲感興奮，還有抱抱及發哥親筆簽名㖭！

新戲《賭場風雲》除有發哥外，亦有謝霆鋒和阿田老公杜汶澤，卡士咁強，難怪小寶唔敢得失《賭》戲演員啦。

臨時通知冧廠

日前，田蕊妮和小寶原定到深水埗拍外景，小寶卻遲遲未到。由於當晚只拍攝二人的對手戲，因此準時晚上七時到達現場的田蕊妮，惟有先到附近茶餐廳醫肚。約七時半食完晚飯後，她和助手便回到車上繼續刨劇本。直至九時，小寶依然未見人。據知劇組人員嘗試打電話給小寶，但一直未聯絡得上。此時在車上發吽哣的田蕊妮，只好落車百無聊賴在街上踱步。接近十時，小寶才致電劇組，指自己正拍攝的《賭場風雲》仍未收得工，在場全體工作人員局住冧廠收工。呆等三小時的田蕊妮聽到收工 order後，即時忍唔住咆哮：「吓！又冧廠呀？唔到唔早出聲。」當記者走近問田蕊妮時，餘氣未消的她繼續火遮眼說：「佢同發哥、我老公（指杜汶澤）開工喎，俾佢哋夾住咗！冇計啦，佢紅吖嘛！」

據知，小寶已非首次臨時通知唔到，令《忠》劇組怨聲載道。一工作人員透露：「其實阿田同小寶都係大情大性，開頭都幾 friend㗎。肥妹為食，成日都買唔同零食帶返工，而阿田就萬歲汽水，開親工好似大食會咁。不過肥妹接咗《賭城》後，明明話嗰邊客串幾日，都搞到我哋套劇冧咗兩次廠，兩次都係趁人出曬外景，臨時臨急通知話嚟唔到，要我哋白等，係人都嬲啦！」

匿埋刨劇本

小寶失場當晚，田蕊妮準時到深水埗，還匿在自己座駕努力刨劇本，為拍攝做好準備。

遊街解悶

坐到攰，田蕊妮與助手到附近街上行來行去，打發時間。最後她等了足足三個鐘，場務表示小寶唔到要「冧廠」，全世界局住收工。

外景冇偈傾

數日後，劇組在深水埗補拍小寶早前甩場的外景，為免搞到天怒人怨，這次小寶不敢怠慢。當晚她十分準時，比其他人還早到。未埋位時，曾說會減肥的小寶爭取時間食薯片，田蕊妮則匿在公司外景車嘆冷氣睇劇本，兩人鮮有交談。

其間導演嗌埋位對稿，二人企埋一齊都冇交流，田蕊妮只顧與另一對手章志文唸對白，小寶儼如搭枱般冇人理。對完稿田蕊妮即刻彈開，小寶則繼續食嘢打發時間，唔妥到出面。

記者向小寶求證因冧廠激嬲阿田一事，她狀甚難為情，並將責任推卸落《賭城》的導演劉偉強身上：「其實嗰日原本五點半就收得工，但劉偉強導演臨時話加多場，拍吓拍吓就超咗時先通知呢邊劇組。如果有咩搞到人哋，我道歉講 sorry囉，真係唔好意思。（點解明知遲，都唔早啲通知？）哎吔……嗰邊拍吓拍吓冇留意時間，真係好對唔住！」阿田發火，非同小可，小寶下次醒少少啦！