鄰居爆料 夫妻嗌交 失控開拖 劉以達爆缸入院 劉以達,MW,

滾熱辣

鄰居爆料　夫妻嗌交　失控開拖　劉以達爆缸入院

近日，劉以達的前代理人 Anita於 10月 10日發聲明，正式終止與劉以達的合作關係。事緣 Anita為劉接下工作，惟劉自從 9月 28日起，一直玩失蹤，令雙方關係破裂。

劉以達夫婦一向以騎呢見稱，洗腳唔抹腳，經濟拮據加上老婆（冼美珍）日哦夜哦，終爆發情緒病，他曾自爆︰「我試過自殺！」最後惟有求助精神科醫生。

有鄰居爆料，指他們兩公婆不時在村屋寓所吵大鑊，身上更有一陣天拿水氣味。今年 2月初，有鄰居指聽到兩人激烈吵架聲及類似爆玻璃的聲響，最後搞到要 call埋白車，劉以達左手受傷入院。

其他影片

Anita幫劉以達做代理人做咗近兩年，其間為達哥傾咗唔少大陸騷，今年仲接咗兩個廣告，最終都關係破裂收場。

失控的劉以達行為怪異，除了早前被周刊影到外賣吊飯上屋及買咳藥水外， 10月 15日，他自出席完電影《當 C遇上 G7》宣傳活動後，一直未有外出，只係間中走出露台唞唞氣。記者問過兩人平日幫襯開的茶餐廳，店員說：「三年嚟佢哋都係咁樣吊飯，好少見到劉以達，通常都係見到佢老婆。」

21日下午一時許，達嫂終於現身，到樓下提取一箱貨物。記者欲向她求證與老公打架入院一事，她未聽完記者問題，「哈哈」兩聲就轉身，雞咁腳閂閘避記者，更立即把露台的玻璃門關上，自閉在寓所內。之後一連兩日，他們連露台都唔出。記者連日致電達嫂，但她的電話卻長期關機。

婚照放蚊

今年初，達哥為慶祝結婚十五周年，同達嫂再影結婚相，不過當日達哥不停放蚊，精神狀態麻麻。

打錯算盤

2月尾，達哥達嫂在中環搞水晶婚及 50大壽派對，不過賓客唔多，只有黃耀明、盧凱彤等人。賓客當係普通生日會，冇人俾厚禮，令以為有油水嘅達嫂打錯算盤。

《蘋果日報》圖片

《蘋果日報》圖片

睇中環精神科

被問到點解失蹤，達哥又話忙又話病，但 10月 1日他兩夫婦就約咗萬綺雯食蟹。

劉以達在娛樂圈多年，一直覺得自己懷才不遇，由於愛鑽牛角尖，脾氣亦變得愈來愈暴躁。「達哥（劉以達）呢十年嘅情緒起伏好大，朋友介紹中環精神科醫生俾佢睇，佢每個月都要去覆診。醫生開啲鎮靜劑俾佢，但佢一唔食藥個人就打回原形。」知情者說。

工作不多的劉以達，近年一直有財政壓力。多年前他與前經理人陳海琪鬧翻，遭對方雪藏，半年內收入不足一萬。但老婆達嫂寧願返外家借錢，都沒有返工幫補家計，當時劉以達曾直言「連屋企啲狗都冇飯開……」

夫妻開片重組　半夜嗌交

鄰居指，兩人經常喺屋企大吵大鬧，今年 2月聽到達嫂大聲鬧劉以達，仲聽到達哥大嗌多聲。

互掟發洩

嘈咗十幾分鐘後，屋裏面就傳出掟嘢聲，仲爆玻璃，又有踢門聲。

受傷入院

過咗一陣就有白車嚟，大約十五分鐘後，就見救護員扶住包紮咗左手手掌嘅達哥上白車。

貧賤夫妻百事哀

生活逼人，達嫂不時吟吟噚噚，加上劉以達的消極態度，令達嫂無名火起。情緒失控的劉以達曾試過赤腳衝出門口，向達嫂說：「我跳樓死俾你睇！」鄰居更爆料指兩公婆不時在寓所內嗌大交，更開大音響來遮掩吵架聲浪，家無寧日。

鄰居表示︰「今年 2月初，嗰晚佢哋嗌得好犀利，我聽到掟嘢同爆玻璃嘅聲音，無幾耐就有白車嚟。救護員上樓後，就見到左手包住紗布嘅劉以達上白車。」

本刊就兩人經常嗌交，甚至大打出手到爆缸入院，向其前代理人 Anita求證。她說：「因為交咗俾律師處理，藝人嘅私事唔方便講。（你知唔知佢哋打交搞到 call白車？）唔係咁方便講。（劉以達有情緒病？）唔……講真佢有情緒嘅。（佢係咪有 high天拿水習慣？）佢嘅生活作息我唔評論。（係咪因 high天拿水迷糊到唔聽你電話？）你問番佢，我都想知點解佢唔聽我電話。」

劉以達與投資者商談達明 25周年演唱會事宜，對錢銀甚為着緊的達嫂亦在場聽實。《蘋果日報》圖片

劉以達近年工作比以往多，早前他和穀德昭拍保險公司廣告賺十萬，可惜他時常玩失蹤，已嚇怕不少客戶。

買咳藥水解畫

劉以達早前曾為買咳藥水一事解畫，他說︰「我病咗引致聲沙先買咳藥水。」其實除了咳藥水，劉以達身上更成日有陣天拿水氣味。知情者說︰「有次有個教友去佢屋企探佢，問佢點解身上有咁重嘅天拿水味，佢就同人解釋話砌模型時啲膠水黐到成手都係，咪用天拿水抹甩佢……」

06年劉以達簽陳海琪做經理人後，初時陳亦戮力為他接 job，可惜之後有人玩失蹤，行為失常，最終兩人翻臉收場。「海琪一提起劉以達就扯火，佢嗰時已經成日『冇影』行動，仲要受埋達嫂啲藝術家脾氣。有次海琪搵唔到劉以達，直接走上去佢屋企搵人，有人跪喺海琪面前叫俾多次機會佢。軟功搞唔掂，惟有出硬功，有人愈講愈激動，竟然唔俾海琪離開，嚇到海琪好驚。」知情者說。

就此事聯絡陳海琪，惟截稿前未見回覆。不過，之前陳接受訪問時，有記者提起劉以達，她不屑說：「唔好提起呢條粉腸。」

避而不答

周一（ 21日），達嫂一見記者，就急急腳返回屋內，只以「哈哈」兩聲回應記者提問。

兩眼矇矓

周日（ 20日），足不出戶的劉以達，罕有行出露台。兩眼矇矓的他四圍𥄫，未幾就返回屋內。

劉以達租住的村屋約七百呎，不過四處放滿玩具。他為玩具花費不菲，單是這蝙蝠俠戰衣已價值逾萬，隨時賺埋都唔夠買玩具。

夫妻四圍辣

50歲的劉以達入行多年來都與拍檔不歡而散，夫婦怪行多多，令劉以達在圈中朋友少之又少。

黃耀明

達明一派在 85年組成， 91年拆夥，此後二人一直傳不和。直至 06年軟硬開騷，達哥表示不滿明哥冇問過佢，就應承軟硬以達明名義做嘉賓，又怪明哥每次出個人精選碟都收錄達明時期嘅作品。

俞琤

06年，俞琤打算拉攏軟硬同達明一齊開騷，卻因為劉以達怒轟商台自把自為唔尊重佢，又在周刊插俞琤，結果不歡而散。達哥又指有人運用影響力，勸其他唱片公司唔好同佢合作，直指俞琤好小器。

陳海琪

07年初，劉以達指之前公開不滿黃耀明的言論是受陳海琪教唆，自此劉與陳掀起罵戰。身為經理人的陳海琪後來雪藏達哥，又指很難控制他工作。

李璐璐

07年，劉以達與李璐璐組成「達與璐」。一年後，達哥指李璐璐有藝術家脾氣而解散。李璐璐在博客撰文，反指有藝術家脾氣是達嫂：「她（達嫂）表面很客氣，但說話就帶骨頭……」

其他影片

. 鄰居爆料　夫妻嗌交　失控開拖　劉以達爆缸入院 劉以達,MW,
http://hittt.blogspot.com/2013/10/mw_5940.html. 鄰居爆料　夫妻嗌交　失控開拖　劉以達爆缸入院 劉以達,MW,
http://hittt.blogspot.com/2013/10/mw_5940.html. 鄰居爆料　夫妻嗌交　失控開拖　劉以達爆缸入院 劉以達,MW,
http://hittt.blogspot.com/2013/10/mw_5940.html. 鄰居爆料　夫妻嗌交　失控開拖　劉以達爆缸入院 劉以達,MW,
http://hittt.blogspot.com/2013/10/mw_5940.html. 鄰居爆料　夫妻嗌交　失控開拖　劉以達爆缸入院 劉以達,MW,
http://hittt.blogspot.com/2013/10/mw_5940.html