黎諾懿苦練咬字克服鼻音

2013年3月22日星期五

演戲超過十年的無綫男星黎諾懿患有嚴重鼻敏感，導致被網友狠批講對白重鼻音，不過性格樂觀的他入行後苦練咬字，誓將先天缺陷變成優點，不過對演藝生涯最大威脅是身患哮喘，曾經因病發而停廠一粒鐘！

諾懿入行超過十年，參與拍攝的劇集多不勝數，但卻被網友批評講對白極重鼻音，他透露是先天缺陷所致：「重鼻音係因為我不嬲都有嚴重嘅鼻敏感，細細個講嘢唔清晰，唔識我嘅人應該一隻字都聽唔到，直至入行後有人話我鼻音都幾重，所以惟有苦練，令每個字都講得清楚啲！」

黎諾懿入行時被批重鼻音，但原來是因嚴重鼻敏感所致。

雖然鼻敏感及鼻音纏身，但一向樂觀的諾懿視之為優點：「其實先天缺陷都係一種優點，因為我講嘢有鼻音，人哋一聽就會話：『哦！黎諾懿做緊戲！』要我講嘢無鼻音唔難，但需要刻意吊高把聲，咁樣做戲就會好怪，而且會無咗個人特色！」

樂觀的黎諾懿認為先天缺陷亦是一種優點，使別人能夠容易記住自己。

醫病致面腫

講對白重鼻音並不會阻礙諾懿對演戲的追求，不過他坦言中度哮喘曾一度阻礙拍劇工作：「由中學開始就已經發現有患上哮喘，醫生話係中度哮喘，上年拍《造王者》個廠有天拿水味同埋好焗，所以突然之間講唔到對白，淨係好想咳，搞到要停一個鐘廠，要拎藥同抖一抖先再拍。」

諾懿又指病情一向控制得頗好，但由於去年忙於拍劇，加上香港空氣差，導致哮喘復發幾次，而且服食類固醇搞到面腫腫，所以希望今年能夠身體健康，毋須粉絲擔心！