2013年2月1日星期五

誓踢走80磅肥膏變索女細細粒：我要溝仔

誓踢走80磅肥膏變索女細細粒：我要溝仔

忽然1周第914期

無綫新劇《老表，你好嘢！》叫好叫座，最高收視達 37點。飾演王祖藍鄉里「細細粒」的肥妹小寶（陳嘉佳），風頭更冠絕全劇演員，就連高登仔都撐她「瘦咗一定索」。獲捧高登女神， 27歲從未拍拖，仍是處女之身的小寶，為求「開齋」，近日終於的起心肝減肥，發誓踢走肥膏。周日（ 27日），本刊在西九海濱長廊直擊她喪做運動三小時。事後她喘住氣說：「我目標要喺兩個月內減 80磅。我要變索！我要溝仔！」

零彈跳力 FAIL

周日（ 27日），著住白色短褲仔的小寶，到西九海濱長廊跑步兼喪做運動 3小時。其間她嘗試跳高彈起，不過只能腳踭離地，彈極唔起。

27歲的肥妹小寶，現時體重高達 230磅。試過俾 90後??仔叫「恐龍」，但她從未意識過要減肥。直至近日出街，她被傳媒廣泛起底，加上被本刊拍得她日吞 8碟肉，終醒覺要做個「真正索女」。小寶誓要努力搣甩肥膏，早前除有指纖體老闆張玉珊主動襄助外，她近日亦立志要做運動和節食減磅。

拗腰掂 PASS

小寶跑完步，見到阿伯拗腰零難度，仲講笑話自己實做唔到。估唔到有 50吋腰的她，親身擘腿拗腰竟然表現自如。勁！

食肉獸

早兩星期，本刊記者目擊她與同事打邊爐，一餐竟將 8碟肉吞落肚，卡路里爆曬燈。

引體升唔起 FAIL

拗腰輕易而舉，不過引體上升就肯定難倒小寶。礙於身體重量，小寶雙手攀著鋼架後，根本無力將身軀提起。在記者鼓勵下，她連攀 5次，最後雙腳才勉強離地。

跳住跑 FAIL

小寶坦言行步路都會喘氣，當日她做完一輪運動，再在天橋上跑步。不過彈兩嚇已經彈唔鬱，要坐埋一邊唞大氣。

Sit up摺唔埋 FAIL

咪以為小寶成功做 sit up，原本她要將腳放入身後的欄杆做 sit up，不過腳板肥大肉厚放唔入，惟有將頭掉轉擺。最後她要靠助手拉起「造馬」，才能完成 sit up「壯舉」，挑戰失敗。

兔仔跳 FAIL

小朋友最愛兔仔跳，不過自小已經牛高馬大的小寶，當然未試過。連踎低都有困難的她，肚腩又頂住大髀，想跳一下都難！

地獄式減肥

童心未泯

辛苦完一輪，小寶離遠見到有韆鞦，已經嚷著要玩。原來重達 230磅的她，都坐得落韆鞦。她說：「阿媽以前好少帶我落公園玩，依家有機會梗係要玩下。」她更玩到唔捨得走。

周日（ 27日），本刊記者直擊她著住運動裝，獨自在西九海濱長廊跑步。由入口一直沿海邊跑步，沿途不少遊人認得她，不過她未有理會繼續低頭跑。斷斷續續跑了半小時，她終頂不住在旁邊長櫈休息。其間，記者趁機與她做訪問。原本唞著氣的她即抖擻精神說：「成世女都未做過咁多運動。唔得，今次一定唔可以俾人睇死，我要減肥。」之後，她再將難度升級，挑戰拉筋、仰臥起坐、引體上升等連串運動。雖然面露痛苦神情，她仍頂硬上。

做完一輪運動，她氣喘如牛說：「呀，我呢個樣咁樣衰，你哋（記者）唔好再影啦，仲影冇人要?！我都係想減肥啫，希望可以兩個月內減 80磅。我要變索！我要溝仔！」做完訪問，小寶再到附近天橋跑樓梯，來回跑足半小時才離開。

阿媽做媒

其實為一嘗索女滋味，小寶 16歲情竇初開時，曾一日三餐以水果充飢，最終兩個月減掉 40磅肥肉。可惜依然冇仔吼，她索性將減肥計劃擱置，變回 200磅以上大肥妹。小寶亦曾為此自責：「諗番我都好後悔，點解嗰陣唔繼續減肥落去，瘦咗咪唔會好似依家咁冇拖拍。」

由於她是家中獨女，父母一直渴望她開枝散葉，三代同堂。去年小寶母親更親自為她做媒，介紹男仔俾小寶識。小寶身邊友人透露：「伯母好想抱孫，成日哦佢咁肥冇男仔要，仲整埋愛心飯盒俾佢食，等佢食得健康啲瘦啲。伯母試過介紹啲男仔俾佢識，不過有次個男仔見到佢，飯都冇食，借尿遁走咗，搞到小寶好唔開心。」有過難堪遭遇，小寶再不敢與男性約會。

對此，小寶尷尬地說：「我咁大個女都未拍過拖，係有暗戀過人，不過唔敢表白。明知冇好結果，講嚟做乜？我以前見人拍拖都好恨?，但正常男仔又點會揀個肥妹做女朋友。我阿媽都話我去到呢個磅數，依然冇自制力減肥，係咪想孤獨終老？我好想節食?，不過當見到啲美食又乜都唔記得曬。所以我今次同自己講，一定要減到 150磅，我要拍拖。（介唔介意姊弟戀或忘年戀？）乜年齡都冇所謂，最緊要個男仔心地好囉。」唔想做剩女，小寶今次一定要堅持呀！

口不對心

小寶揚言要減肥，不過上周六（ 26日）出席宣傳活動時，新年願望竟寫住：「大魚大肉！」看來減肥真的有難度。

食橙充飢

其實小寶真的有減肥決心，落台後，她戒絕一切零食，反而食橙充飢，抵讚！

本刊連續數日追訪，小寶收工後，已戒掉吃「雲吞麵」打底的習慣，直接揸車返彩雲邨家，陪父母食齋當減肥。

群星讚索

小寶雖然身形輸蝕，但性格夠真夠可愛，《老表》一班藝人都撐她減肥後，應該索過唔少女星。

王祖藍佢幾靚女

「有人話小寶揮低魯芬，其實我當初見佢肥得嚟都幾靚女，網民仲將佢同廖碧兒、苟芸慧比較。佢瘦咗應該幾索。」

鬼妹介紹男仔俾佢

「我喺套劇同小寶有最多對手戲。佢性格好 sweet好得人鍾意，我都想介紹男仔俾佢識。」

王菀之同佢一齊減

「小寶五官標致，瘦咗會好得。其實我都想減肥，等我搵日約埋佢一齊做運動先。」

高登仔嗒糖

以往俾高登仔封得做女神，必定樣靚身材正，但性格可愛的小寶，卻反傳統令高登仔嗒糖，就連小寶自己亦難以置信。

減太快易心臟衰竭

早前，本刊拍得肥妹小寶日食 6餐，每日吸收過萬千卡熱量，比所需的 2,400千卡熱量多足 4倍。為了有拖拍，小寶終肯減肥，現時日食 4餐，早晚兩餐食媽咪發辦煮的愛心餐。

據尚營坊註冊營養師鍾蓉文表示：「根據以下餐單，保守估計佢只係吸收 1,500千卡熱量左右，遠比佢身體所需嘅 2,400千卡少好多。佢咁食法，一個月可以減到十磅以上，但體力會唔夠，會好易攰同抵抗力弱。減得太快，身體仲會產生酮體（毒素），影響身體健康，同時心臟肌肉會流失得快，易心臟衰竭。建議佢下午茶同晚餐分別加多兩塊麵包同一碗飯。」

早餐

薏米粥一碗（阿媽煮）及一個蘋果