娛頭
連環鬼上身 三日 fing三十萬 失控周秀娜任攬任啜
2013年01月17日憑噴血寫真爆紅的周秀娜，一直大方公開髮型師男友 Avis身份，拍拖六年，即使身份地位身家有距離，娜姐亦唔介意，早前豪掟三十萬置裝，亦預男友一份。
講心唔講金！近年娜姐經常人不在港，慣性偷食的 Avis愈玩愈大膽，離譜到帶女返屋企，娜姐忍無可忍，一個月前，決定不再留戀這段六年情。
過去半個月，娜姐不停四圍飛，週日（一月十三日）返港一天，她亦爭取時間，約了三名鬼仔到灣仔三里屯開餐，甩拖解放，飯後娜姐與三鬼在街頭豪放攬啜！
來者不拒
離港半個月，周秀娜難得回港一天，把握僅有時間，相約鬼佬朋友開餐，也未有探望早幾日整傷腳的 Avis。
下午二時， Chrissie由小西灣寓所坐的士到九龍灣一工業大廈，逗留了四小時上堂練功夫，晚上七時，先去柴灣為電影配音，之後到銅鑼灣會合兩名女友前往灣仔三里屯一間露天餐廳，三名鬼仔早已候駕，等她開餐。當中一體型較高大的鬼仔，與娜姐尤其親暱，二人不時咬耳仔，其間男伴紅酒杯杯清，但娜姐卻滴酒不沾。三男三女六人飯局食到淩晨，飲飽食醉後，三男對娜姐變得愈來愈熱情，不時借故親近，娜姐來者不拒，更主動出擊，與三男在街頭輪住攬啜！
性格獨立
自○九年憑寫真集極速走紅，從不吝嗇用索爆身材俘虜異性的娜姐，偏偏不避忌公開已名花有主，口不離髮型師男友。
「佢哋拍拖六年， Chrissie紅咗之後，身邊啲朋友都以為散硬，但 Avis好識冧女， Chrissie又成日公開讚男友有自己事業，好上進！對 Avis一條心到大家都唔信。」娜姐好友說。
性格有點男仔頭的周秀娜，對男友採取信任態度，即使自己工作忙，見面少，亦不會 check住對方行蹤，令 Avis有機可乘。
「娜姐好獨立，舊年佢喺馬來西亞拍戲整傷腳，都無通知男友， Avis都係睇到報導先知，有時撞正大時大節要開工見唔到，佢亦從來唔會過問對方去邊、同邊個一齊。可能習慣咗呢種相處模式，前年聖誕節，娜姐喺橫店拍劇，本來有兩日假，但佢寧願坐車去上海睇蕭敬騰演唱會，都無飛返香港，可能因為咁，大家感情開始淡！」
幫手埋單
收入名氣大有距離，亦是二人感情致命傷。娜姐豪花幾十萬置裝是等閒事，但對做髮型師的 Avis來說，卻是天文數字。
「娜姐好捨得買衫，舊年十月， IT俾圈中人優先半價買衫，由百德新街買到金鐘，娜姐前後三日， fing咗三十萬， Avis都買咗一對鞋、一件衫、一條褲，加埋兩萬幾，都係娜姐幫佢碌埋咭！」知情者說。
使錢唔計較，但 Avis最不滿是傳媒以「周秀娜男友」形容他，女尊男卑， Avis無法忍受，經常向友人呻氣。
「表面上 Avis好似無嘢，其實心裡面好介意，成日俾人叫『周秀娜男友』，好似自己無名咁！舊年佢參加籃球賽，攞咗季軍，有傳媒寫『 Avis女友周秀娜』都有撐場，佢開心到周圍同人講，因為終於有人寫周秀娜係 Avis女友，佢開心到將篇蚊型報導放上 facebook同 Instagram！」
公然偷食
終於有名有姓，但天生花弗的 Avis未有珍惜同娜姐的六年情，過去一年多趁女友經常四圍飛，乘機出外「搵食」。
「男人花弗幾乎係本性， Chrissie成日唔響身邊， Avis更加無王管，已經好幾次俾人影到佢同其他女仔去街，最近仲帶埋女仔返屋企，偷食唔抹嘴， Chrissie梗係大炒啦！」
斷正又斷正， Avis氹女功夫再上乘，也無補於事。一個月前，雙方決定正式分手。「以前 Chrissie出埠，無論幾點機， Avis都會揸車送佢去機場，但呢排 Chrissie已經改咗叫公司同事幫佢 book車，大家都知咩事啦，其實近呢三個月，佢已經瘦咗十幾磅，話曬六年感情，點都有啲傷！」 Chrissie友人說。
無得比
○八年被模特兒公司 GME發掘入行的周秀娜，憑住 32D巨胸瘦腰長腿，備受注目，○九年推出第一本個人寫真《 Kissy Chrissie》，食雪糕、刷牙誘惑相成為一時話題，銷量高達三萬本。之後在動漫節中乘勝推出人形攬枕，宅男反應更烈。
走紅後，工作接踵而來，去年 Chrissie集中火力進軍內地，先後接了四套國產電影及兩部電視劇，加埋廣告、登台、打碟，進賬超過千五萬人仔。
相反， Avis事業停滯不前，同時兼任髮型師及 model的他，雖與朋友合資在藍田及佐敦開設髮型屋，但收入亦有限，兼職做 model拍廣告及黐住 Chrissie情侶檔搵銀，借周秀娜男友招牌，才令他有機會進軍大銀幕，拍攝電影《喜愛夜蒲 2》，但工作量與收入同女友仍差天共地。
慣性偷食
「宅男女神」周秀娜，多年來對髮型師男友 Avis不離不棄，可惜男方未有好好珍惜，反而多次背住娜姐嗒女。
高登女神 Vivian
去年尾， Avis被拍得與高登女神 Vivian到尖沙咀夜蒲，之後更車女神返馬鞍山住所，繑曬手十分親熱。
模媽 Mia
與模媽 Mia去年合作拍攝電影《喜愛夜蒲 2》，被拍得在酒吧調情， Avis更登堂入室，在對方跑馬地寓所過夜。
傅穎
一一年八月，有指 Avis趁娜姐到馬來西亞拍戲，暗撻傅穎，又被撞破做柴可夫接載傅穎到天後的動物診所帶倉鼠睇醫生。
性感泰模 Ella
一○年三月，周秀娜到日本行騷期間， Avis乘機到泰國搵食，搭上擁有 32C上圍的泰模 Ella，事後 Ella在 facebook上載二人的親密合照。
人鬼情
同聲同氣唔一定夾，圈中不少女星如梁詠琪、周汶錡、莫文蔚等，均因為同外國人拍拖，成功脫離剩女行列，做阿太！
梁詠琪
○六年與鄭伊健分手後， GiGi開始鍾情老外，先後與法籍 Sly及美國籍 Matthew拍拖，一一年， GiGi在西班牙旅行邂逅 Sergio，二人拍拖數月即閃婚。
周汶錡
曾經同過杜德偉、連勝文等拍拖的周汶錡，○六年結識家族做珠寶代理的法籍男友 Julien Lepeu，拍拖六年，至去年二人在法國結婚修成正果。
李玟
○四年，李玟向傳媒公布與加拿大籍男友 Bruce Rockowitz拍拖，男方是利豐總裁，身家豐厚，一一年二人拉埋天窗，在港舉行一連兩日的億元豪華婚禮。
莫文蔚
先後同周星馳、馮德倫等拍拖，最後翻撻讀書時認識的德國籍初戀男友 Johannes，兩年前在意大利出嫁。
.[壹週刊]連環鬼上身 三日 fing三十萬 失控周秀娜任攬任啜
http://veryy8.blogspot.com/2013/01/fing.html.[壹週刊]連環鬼上身 三日 fing三十萬 失控周秀娜任攬任啜
http://veryy8.blogspot.com/2013/01/fing.html
