Cover Story
母親的抉擇 李嘉欣
2013年01月17日可憐天下父母心！
印象中、不管是陳慧琳徐濠縈吳君如楊千……一眾星級媽咪的共通煩惱：為子女的學業問題大傷腦筋。
「你知香港家長幾誇張，但自問比起其他人，我雖不屬於怪獸家長一類，亦無可避免地被現實環境所影響，催迫到有少少偏離心目中細路仔唔需要太早學咁多嘢的原意，所以 Jayden歲半已經開始要返 playgroup。」煩惱雷同的，還有藍血媽咪李嘉欣。
然而許家小王子許建彤 Jayden Max，下月 8號方才滿牙牙學語的 2歲生辰。
「記得幫囝囝報 playgroup時，有位家長同我講：『嚇？你個仔十個月大都未安排佢學過任何嘢？我諗你著緊啲好喎！』嚇死我，先得十個月人仔，仲係『一 pat嘢』就要逼佢學嘢，唔係啩？！」
嘉欣坦言當時身處家長群中，聽聽埋埋，真係驚，甚至曾撫心自問是否不夠積極，對囝囝的學業前途太過寬鬆，無盡好母親的責任。
「其實歲半上 playgroup我都嫌太早，根本唔需要，囝囝現階段學到的，大部分來自家庭和生活。有時間我寧願帶 Jayden去公園跑餐飽，都唔要逼佢學法文德文遊水練琴。」
都說可憐天下父母心。
估佢唔到
Jayden下個月就 2歲生日，以男仔嚟講，都算多嘢講，而且好多時的反應都係估佢唔到：例如整跌嘢會講：「 Oh! My goodness!」又或者遇事唔明會問我：「 How come?!」開始會講一些簡單英語句子，但就未知佢係咪懂得運用，還是係咁啱得咁橋撞彩。
囝囝性格最似我，好硬頸，幾考我 EQ，有時真係會唔知點教，但改變無得夾硬嚟，要就住調教；佢偶然表現得好心急好無耐性時，我會諗究竟有乜法子可以令到佢有耐性啲，後來明白，其實小朋友行為某程度係反映緊自己，正如照鏡，因為我自己都無耐性，我自己都改變唔到，試問又點可以夾硬要佢改呢？
為了湊小朋友，同囝囝溝通得好啲，都讀過唔少親子書，但我發現無一本可以幫到手，所有書都係作者本身好個人的體驗，然而實戰起上嚟就要睇番生活環境同小朋友性格。
挑戰唔止教方面，仲包括體能， Jayden已經踏入好 active階段，我甚至懷疑佢係咪唔識得行路？點解佢可以無停過喺我面前跑來跑去！好多時明明同佢坐低玩得好哋哋，佢會無端端拔足就跑，跑跑跑跑跑到好遠，我又唔夠佢跑得快，只能跟緊佢後面猛嗌住佢。你知小朋友唔識分乜嘢叫危險，最慘係這類景象不時會發生，真係好攰！有時好頂唔順，睇住佢 non-stop咁跑來跑去睇到我就快暈低，就會打俾家姊，問佢有無好地方介紹，可以俾我帶 Jayden出去放電。所以佢一見到表哥就會好開心，兩個男仔自己玩足大半日，我就可以乘機攤抖休息嚇。
其實我已經唔算好落手落腳湊，響我心目中，真係會廿四小時 mark實，陪小朋友瞓、食、去廁所沖埋涼至為之跟得媽咪。我只係半參與，陪 Jayden玩時間比較多，但都已經攰到不得了！所以我好感恩，哈里路亞！ Jayden一出世就有個表哥陪佢玩，有大哥哥做伴，有人鬥嘴有人爭嘢玩 balance嚇，否則生活在一個大人世界裡面，實悶。
不過 Jayden成日蝦表哥，因為佢一出世就見到這個大自己五個月的人物，佢好清楚這個哥哥係錫自己，而且係可以細蝦大恰番轉頭嘅！事實上表哥亦好照顧 Jayden，上 playgroup時老師一叫坐低，表哥就會指住 Jayden補多句：「坐低！坐低！」若果見到 Jayden手多多周圍掂，表哥又會跟實提佢：「 Don't touch! Jayden, don't touch!」好有大哥哥風範，表現好成熟，為我分擔唔少工夫！
粉紅色喱士拼薄紗連身裙$134,000 Valentino
Elizabeth Taylor Private Collection
鉑金鑲綠寶石及鑽石襟針（用作頭飾）（ 1960年）非賣品 Bulgari
拒絕做怪獸
我好相信一句說話：你係邊種父母，自然會教出邊種子女。外國教育主張要培養小朋友獨立、勇於探求性格， OK！在我視線範圍內，而又喺安全情況下， Jayden跌倒我會由佢；但一定唔會由得個小朋友揦起地下啲泥擺入口度、撞到額頭嘭嘭聲流曬血縫兩針當濕濕碎囉，始終我哋唔係響咁樣家庭教育下長大。不過都會經常提醒自己，唔可以太保護，唔可以太過溫室；畢竟佢將來大個始終有日都要自己出去嘗試跌碰挫敗。
讀書方面計劃，主要睇佢到底係邊種性格，至決定循邊種教育模式搵學校。已經有家長同我講，佢個小朋友學緊幾多種運動，日日操幾多個鐘水，跟邊個教練最好，學完有分，搵學校好有用……我心諗：兩歲都未夠喎，點操呀？使唔使咁早就十八般武藝軍訓？算罷啦！每個人都有自己命運，做媽咪嘅只能盡力幫小朋友 develop自己性格同興趣，佢覺得想學自然會提出，真係要讀，讀到 68歲都可以繼續讀！
也曾經考慮，以 Jayden坐唔定個性，讀國際學校可能會好啲，但佢爹哋係讀國際學校出身，反而堅持要 Jayden讀 local school，可能想佢將來中文會叻啲，而且讀 local school比較有 discipline。唉……我都唔知……試嚇囉，反正功課間間學校差唔多，都係一樣的多到嚇死人！
屋企多咗個小朋友，對於增加話題當然有好大幫助，我同老公之間所傾嘅幾乎每日都圍繞住佢。其實當一個小朋友嚟到一個家庭，箇中衝擊可以好大，一方面令到家庭關係更完整，另一方面又會不斷產生磨擦。囝囝啱啱出世時，除咗我自己情緒會好波動，原來男人多多少少都會抑鬱，因為現實係連佢生活模式都改變咗，但無論點拗撬，出發點一定係以小朋友得到最好的前提下，搵出協調解決方法。而 Jayden的出現，令到我哋長期唔夠瞓之外，好處係不斷提升大家責任感，做乜嘢之前都諗咗佢先，仲會考慮得好 detail。
以前細個，好驚星期日，對星期日總有種莫名其妙嘅空虛感，見到人哋一家大細，會羨慕，覺得人哋家庭係最 perfect！當然人大咗，有自己屋企，自然明白每個家庭都一定有自己問題，但心態點都有唔同，我已經唔再怕星期日，我甚至會期待星期日的來臨，可能心裡面副 puzzle終於都可以好圓滿咁 build up好啩！
中國人有句說話「養兒一百歲，長憂九十九」，真係一啲都無講錯，好似我老爺咁，佢唔單只同我講擔心個孫，到依家仲擔心緊我老公。人就係咁，一代一代咁擔心落去，原來生兒育女，為嘅，就係嚟還債！
紅色喱士連身裙$54,500 Valentino
Elizabeth Taylor Private Collection
鉑金鑲藍寶石及鑽石頸鏈（ 1969年）非賣品
Elizabeth Taylor Private Collection
鉑金鑲藍寶石及鑽石戒指（ 1971年）非賣品 Both from Bulgari
一個夠曬數
一時被傳二度有餡，一時又話落實封肚，貴為許家新抱，既要背負為家族開枝散葉的重任，又要面對一眾擔櫈仔剝花生等戲睇的塘邊鶴八卦目光，究竟生/唔生，幾乎已成為傳媒必問的交差題目。
「想唔想再追多個？我都唔知，我真心覺得年紀係一個大問題囉！有啲人會覺得生幾多個都無所謂，不過係十個月的過程；但在我來講，最大問題係生完都唔知仲有冇咁多精力去湊，以我少少事都會好緊張上心嘅性格，最驚到頭來無一樣兼顧得好，反而搞到自己黐咗！」
事實是也曾將問題攤出來和枕邊人商討，結果，得到的答案，竟然是一個都夠曬數。
「我都覺得奇怪，好少男人會唔贊成，唔使佢大肚又唔使佢十級痛或者捱一刀，只係負責玩 BB啫，我老公都話唔使。歸根究底，一句到尾不外乎中國男人傳統思想。佢有講過如果第一胎生女，都會想嘗試再博多個，但既然第一胎已經係仔，就無必要追。不過，我相信如果真係有多個女，佢應該會係幾偏心個女錫到燶嗰種爸爸，因為好多時男人同女人一樣，口講同真實發生時遇到的，往往是兩
回事。」
對對對！口不對心的專利，又點只得女人。
白色薄紗拼綠色絲質連身裙$38,500 Valentino
Elizabeth Taylor Private Collection
鉑金鑲鑽及綠寶石戒指（ 1962年）非賣品 Bulgari
黃色喱士背心裙$29,900 Valentino
Elizabeth Taylor Private Collection
鉑金鑲藍寶石及鑽石襟針（ 1969年）非賣品 Bulgari
.[壹週刊]母親的抉擇 李嘉欣
http://veryy8.blogspot.com/2013/01/blog-post_2129.html.[壹週刊]母親的抉擇 李嘉欣
http://veryy8.blogspot.com/2013/01/blog-post_2129.html
