毒後帶挈 視後大熱 徐子珊壓力爆煲
自詡樣貌、身材、高度都麻麻哋的徐子珊，繼04年當選香港小姐冠軍後，最近又憑劇集《雷霆掃毒》毒後陳家碧跑出，成為視後大熱門！天賜發圍機會，卻換來不絕的負聞及緋聞，子珊壓力大到爆煲，坐唔安，食唔落，瞓唔著，情緒起伏好大，她無奈說：「一周有成兩、三個封面，都係爛桃花，大佬呀，全部都係炒作新聞，解畫都解到頭暈，仲有一段時間先到台慶頒獎禮，都唔知點捱落去！」那便是成名的代價！
採訪：方騫平
攝影：畢紹基 髮型：Maggie Law@Kim Robinson
Styling：Patrick Sun 場地提供：Sakesan
處身爭崩頭的娛樂圈，女藝人要出位，唔係靠實力，就要樣靚身材正！偏偏徐子珊是例外的一個：「印象好深刻，曾經有位導演同我講：『你有個長處就係每樣嘢都好平均，唔高唔矮，身材中等，又唔太靚，但就因為唔突出，可塑性特別高，甚至可以豁出去做乜都得，包括毒後！』又係喎，我咩都夠膽死去試，好似喺劇集《錦衣衛》內，明明可以要求用武師去吊威吔拍飛身鏡頭，我就堅持要親身上陣，由缺點變成長處，都算係異數咯。」
「陳家碧」為徐子珊帶來掌聲，觀眾對她搏老命演技讚不絕口！她坦言對奪視後都有信心。手執半個盃耳的子珊由原先唔多緊張，漸漸愈踩愈深：「近排真係太大壓力，成日飛來飛去宣傳，又要拍賀歲片，加上有咁多炒作新聞，真係啼笑皆非，搞到我連食嘢都冇哂胃口，就算揀食朱古力、蛋糕、飲汽水，但都唔吸收，體重直線下降咗8磅，真係乘機可以減肥。成個人處於繃緊狀態，好緊張呀，最慘係瞓得唔太好，keep住會醒，情緒起伏好大，好彩搵到朋友傾訴，盡量平衡到心態，應該ok唔使睇醫生。
唔怕醜拉票
其實每次提到入行8年，條路好難行嘅心路歷程，都忍唔住落淚，因為我真係好感激我嘅經理人同合作團隊，一直在背後默默支持，視後絕對唔係志在必得，我更加唔係輸唔起，而係我好想將個獎座同佢哋分享，冇佢哋，唔會有我。坦白講，以前台慶頒獎禮我都係著靚靚hea住坐一晚㗎啦，今年大可以都係咁，我唔想身邊人失望，所以積極少少，唔想再陪坐啫。今次比參選港姐同角逐電影圈新人獎緊張得多，我唔怕醜㗎，會盡力去拉票，希望唔鍾意我嘅人，或者同情我個角色，都投陳家碧一票啦。」
緋聞篇
「壓力大嘅時候，好想搵個男朋友依靠，有拖拍嘅話梗係想公開，仲期待拖友係終身伴侶。我係愛情大過天嘅人，可以為咗家庭而放棄事業，入行只係8年，往後40年嘅幸福好重要，條數係要咁計。」對於翻炒黎明和黃宗澤的緋聞，子珊超無奈道：「人地感情有問題，我唔想講太多，費事攞佢哋做宣傳，我只可以講，同黎明有好多年冇見過面啦，大家都冇聯絡，黎明同樂基兒分開，我都唔會去聯絡佢。至於暗撻Bosco仲好笑，之前佢同杏兒分手時，咪有報道話Bosco有小三嘅，矛頭係指向我嘅話，當日一早都講咗啦，我真係拜託Bosco快啲同杏兒復合呀。」
《雷霆掃毒》中「一秒輪姦」戲令觀眾感到失望，子珊說：「其實係拍咗一分鐘，原先剪咗另一個版本，但導演唔想令女性觀眾不安，只係想交代咗件事就算，唔想成為焦點所在，結果變得一秒輪姦鏡頭。
「競」敵篇
楊 怡：我都睇好楊怡，佢演齡多過我，獲唔同年齡層支持，而且民初裝造型好靚。
米 雪：演技不用置疑，而且夠深入民心。
鍾嘉欣：乖乖女形象獲觀眾支持。
胡杏兒：《怒火街頭2》角色好受歡迎，有機會冧莊。
因為對視後上心，所以子珊的壓力愈來愈大。 
緋聞Non-Stop，但當事人卻大呻全部爛桃花，認真把鬼。
.毒后帶挈 視后大熱 徐子珊壓力爆煲
http://hk8news-e.blogspot.com/2012/11/blog-post_293.html
