探熱針
劇價 50萬新高 鄭嘉穎換磚頭孝敬阿媽
2012年11月22日一班無綫花旦小生為視帝視後爭崩頭，鄭嘉穎卻隔岸觀火，搵錢行先。有獎無獎等閒事，錢銀最實際，鄭嘉穎已是 TVB第一吸金王；近日他再以新高價 50萬一集，接拍內地劇《葉問 II》，並以 1200萬高價接了一個內地廣告，賺到笑！搵得到，嘉穎不似過去將積蓄投資股票市場，改為儲磚頭，早前豪擲二千多萬，買入柏景灣兩個單位，分別送給媽咪及細妹，相當顧家。
創新高
入行二十二年，鄭嘉穎經歷多次事業高低潮，但真正爆紅，是去年接拍了內地劇《步步驚心》，一劇打通內地市場，加上擸埋無綫雙料視帝，事業爬上高峰，一年密接六個內地劇，賺超過半億，變成賺錢金蛋，成為 TVB藝人的奇跡。
最近嘉穎更以破頂價，每集五十萬接拍內地劇《葉問 II》，三十集袋走一千五百萬。「《葉問》啱啱先拍完，套劇都仲未播，但投資方已經一早傾定嘉穎再合作拍《葉問 II》，為咗搶到佢嘅檔期，對方仲開到五十萬一集俾佢，比上次拍《葉問》時三十五萬一集，加幅近五成，個價咁高，同喺 TVB拍劇一萬一集，根本無得比。」嘉穎身邊人說。
印銀紙一樣，但嘉穎為拍《葉問》搞到周身傷，早前還被武指打爆眼，要立即返港入院縫針，付出代價也不少。
「嘉穎無武功底，但佢知道套劇有好多武打場面，一早已經好落力操 fit啲，一得閒就打網球、遊水練氣，不過集集打，都好吃力！嚟緊《葉問 II》要再拍多三個月，賺嘅都係辛苦錢。」
《葉問》已經煞科，但嘉穎依然無得抖，事緣他一口氣接了九個內地活動，並以一千二百萬接了一個內地廣告。
「之前拍《葉問》啲檔期就唔到，推咗好多 job，所以要趁空檔還債，所以呢排佢都係上海北京咁飛，連十九號無綫台慶，都係特登飛返嚟一日，完全無得休息！」
搞公司
居安思危，鄭嘉穎一直有計劃將辛苦錢換成磚頭，孝順的他家人優先，今年八月，以一千零八十萬，購入柏景灣千呎單位，據土地註冊處資料顯示，上述單位以鄭母個人名義的凱輝公司持有。
「呢個係嘉穎十幾年來嘅心願，依家搵到錢，佢第一時間叫阿媽睇樓，揀啱心水就買，嘉穎媽咪一直住喺大角咀區，識落唔少街坊，所以揀番附近嘅柏景灣，方便約啲舊街坊飲茶，另外嘉穎仲買多一層送俾細妹！」
除了做孝順仔，嘉穎還有另一個多年心願，亦快將達到，明年他將會成立自己的製作公司。
「幾年前佢已經成日話要開自己嘅製作公司，但嗰時佢根本無本錢，嘉穎好明白做幕前做唔到一世，所以會好好把握嚟緊呢幾年黃金時間，儲多啲錢，鋪好後路。」知情者說。
印銀紙
拍完《步步驚心》後，鄭嘉穎在內地火速走紅，身價暴升，更帶挈他成為無綫最吸金小生，由去年十月至今，鄭嘉穎中港共接拍了八部劇集，年賺超過 7,000萬。
.[壹週刊]劇價 50萬新高 鄭嘉穎換磚頭孝敬阿媽
http://hk8news-e.blogspot.com/2012/11/50_22.html
