2012年11月22日星期四

[壹週刊]黃金機會　《最佳男主角》招財　黎芷珊發威賺多五十萬

黎芷珊近日人氣和荷包都大有進賬，而且是今年台慶「最佳主持人」大熱，攞獎十拿九穩。

探熱針

黃金機會　《最佳男主角》招財　黎芷珊發威賺多五十萬

2012年11月22日

聖誕農曆新年都是娛樂圈藝人搵銀黃金期，外快收入隨時多過電視台全年人工，主持訪談節目《最佳男主角》帶挈人氣暴升的黎芷珊，往年假期騷拍烏蠅，今時今日身價急升至五萬，還大把客爭住用，單是十二月聖誕檔，已十幾個騷揸手，快賺五十萬。

騷價升四倍

黎芷珊碌盡人情咭，搵埋舊情人做《最佳男主角》嘉賓，贏盡收視。雖然主持騷錢雞碎咁多，但節目帶挈人氣暴升，三級跳升呢做台慶司儀，更重要是有機會搵街外錢，荷包腫脹。

「個節目未播完，已經好多客要搵芷珊做 job，騷價仲升咗四倍都唔止，依家淨計到十二月，起碼接咗十幾個騷，成五十幾萬落袋，非常和味！」知情人透露。黎芷珊現時的接騷價由四萬到五萬不等，仍然大把人爭住用。

由主持兒童節目開始，黎芷珊在娛樂圈渾渾噩噩廿幾年，終於發威，背後要多得細她十二年的前度男友張達倫；早前接受訪問時，自爆是前度鼓勵她主動爭取做個人節目，張達倫更忽然現身，搞到黎芷珊感動爆喊。

放大圖片

騷價四級跳的黎芷珊，截至十二月已接下十幾個大小活動，豬籠入水。

放大圖片

黎芷珊以往跟著一班娛樂記者行家一起跑新聞，現在卻搖身一變成為追訪對象。

台慶攞硬獎

「《最佳男主角》呢個節目其實早喺兩年幾、三年前已經度好，當時只係諗放喺收費台做，後來因為人事變動擺埋一邊，今年年頭餘詠珊先攞番出嚟。」餘詠珊是無綫收費電視娛樂新聞台的開台功臣之一，而黎芷珊則從開台做到現在，兩人交情非淺。

搏到有運行！已經籌備下一 round《最佳女主角》的黎芷珊，是今年台慶「最佳主持人」和「最佳綜藝節目」兩獎大熱。「呢兩個獎唔使公投，齋計高層同幕後票，芷珊已經數夠票，攞硬『最佳主持人』大獎。」一名無綫幕後人說。

放大圖片