大封面
13/11零花費海洋公園行禮 盈盈樂樂搵熊貓證婚
2012年10月12日
錢嘉樂與湯盈盈低調拍拖 5年，下月終奉子拉埋天窗。據知二人已鐵定 11月 15日於洲際酒店豪花百萬筵開 50圍大宴親朋。
盈盈樂樂圈中好友成籮，婚宴絕對唔慳得，不過本刊收到消息，兩人註冊行禮，將會移師海洋公園熊貓館簽紙完婚，更會破天荒由與兩人暱稱相同的海洋公園大熊貓「盈盈」、「樂樂」做見證。這筆約 18萬的費用，將由海洋公園全數贊助，慳到錢兼夾有新意，錢嘉樂真係人逢喜事荷包爽。
有國寶見證好有意義！（真實對白）
本周三(10日)，錢嘉樂出席《寒戰》首映時爽快承認 11月 13日，會在海洋公園與湯盈盈簽紙結婚，不過聲明唔係純粹為錢：「我本身唔想太商業，亦唔想做咩代言人，如果要我俾錢都冇所謂。」
錢嘉樂曾說自己有擺酒恐懼症，唔想擺酒似做騷，若結婚必定會在外地小島舉行。但自今年 6月盈盈懷上錢種後，令向來大男人的錢嘉樂改變初衷，「原來結婚唔係兩個人嘅事，而係兩家人加埋一大堆親友同長輩嘅事，擺酒其實係必然。」
Toby做搞手
盈盈樂樂的婚禮籌備將會由搞開婚禮統籌公司的好姊妹 Toby（梁靖琪）全權負責，搵婚紗禮服、禮餅贊助、酒席安排、影婚紗相等，都是 Toby拍心口不收分毫搞掂。據知， Toby更為一對新人傾掂了一個別開生面、永世難忘的註冊儀式。
盈、樂二人將會在婚宴前兩天，即下月 13日上午，假海洋公園熊貓館舉行註冊儀式，並由寓意二人一雙一對的國寶大熊貓「盈盈」、「樂樂」同場見證。其實海洋公園近年一直效法死對頭迪士尼搞婚禮，但出動園內的兩隻國寶，則是首次為湯盈盈和錢嘉樂二人破例。
海洋公園公關向來與 Toby稔熟，當初公園得知盈樂二人結婚消息，即主動找 Toby幫忙穿針引線，在 Toby落力勁 sell後，盈樂都覺得合心意而答應。據知情者透露：「九月初，佢哋（盈盈樂樂）已去過海洋公園開過一次會，最搞笑係，開會時竟然有人提出話叫一對新人坐完越礦飛車就註冊，佢冇做功課，唔知湯盈盈有咗 BB，我哋見到錢嘉樂聽完眼都凸埋！面燶燶爆咗一句：『唔係嘛！』不過盈盈就好小鳥依人咁冇出過聲，最後由 Toby打圓場。」
據知註冊當天早上，兩人會先在摩天輪影一輯婚照，然後才在熊貓館進行簽紙儀式，見證人便是雙方家長及「盈盈」、「樂樂」兩隻國寶熊貓。之後眾人便移師大熊貓餐廳，有 cocktail及自助午餐招呼親友，由於座位有限，這天只招待一百位至親及兄弟姊妹團。註冊加 cocktail埋單要十八萬左右，全部費用由海洋公園贊助，真係幫嘉樂仔慳唔少。
周二（ 9日），本刊致電海洋公園查詢有關盈樂熊貓館註冊一事，公關以「客人資料保密」為由拒絕回應，但卻未有否認。
慳逾 40萬
圈中人辦喜事向來都喜獲各大機構贊助，盈盈、樂樂亦不例外，除有海洋公園贊助註冊外，還有婚紗、影婚照、禮餅等等全部都唔使自己錢，慳得一蚊得一蚊。
共慳： 41.8萬
洲際使百萬
雖然慳咁多，但要在註冊兩日後（ 15/11）在洲際豪擺至少 50圍，計嚇條數要成百萬，難怪嘉樂仔咁努力搵錢。
盈盈怨樂樂太忙
近日已懷四個多月身孕的盈盈已全面停工安胎，反而工作狂錢嘉樂還未停下來陪妻待產，至今仍為新片《寒戰》密鑼緊鼓宣傳，加上年底又要投入拍攝與劉德華合作的另一套大片，現正著手籌備拍攝事宜，根本無暇停下來。婚期將至，籌備婚禮統統交曬俾腹大便便的盈盈及好姊妹 Toby，令平時順得人的盈盈也變得躁底和忟憎。
盈盈身邊人透露，「盈盈不嬲都好 nice，但大肚婆易忟憎、易攰，所以呢排都有啲脾氣。加上嘉樂仔一做嘢就瞓曬身，成日唔聽電話，其實盈盈因為咁成日搵 Toby同 Margaret（鍾麗淇）訴苦。」
嘉樂仔唔陪產檢
上周六（ 6日），湯盈盈和 Toby到尖沙嘴參加好友囡囡的百日宴。現場所見，湯盈盈全晚木無表情，即使有 Toby開解，仍一副滿懷心事樣。記者上前問到籌備婚禮等事時，她都黑面拒絕回應。
湯盈盈心情差，全因前一日（ 5日）錢嘉樂甩底冇陪佢做產檢所致。知情人透露：「盈盈一直搵開尹鎮偉做產檢，尹醫生喺行內數一數二，產檢預約成日 full。上個禮拜五，嘉樂仔應承咗會陪盈盈做產檢，點知突然話要返電影公司度橋，搞到盈盈要臨時取消個 booking。」
洲際豪擺婚宴
雖然嘉樂仔工作狂冷落嬌妻，不過搏命做無非想搵多個錢可以令盈盈嫁得豪。據知錢嘉樂在洲際酒店所擺的婚宴，除了要豪花百萬，亦邀請到成龍及洪金寶等大哥出席婚宴。
周三（ 10日）錢嘉樂出席《寒戰》首映禮，對於在海洋公園行禮，他笑著承認：「咦！你哋咁快知！其實好多嘢係 Toby同盈盈負責搞，流程細節我都唔清楚，不過可以有國寶見證我哋結婚係好有意義。（咁 15號婚宴點安排？）噚日我同三哥、志偉試咗菜，志偉教我如果唔想得失 TVB嘅人，就索性全部唔請，之後再補請食飯。」對於忙籌備新戲冷落盈盈，他說：「因為我拍親都係動作場面，所以要傾得好仔細，唔想有危險，我諗盈盈都會明嘅。」
.[忽然1周]13/11零花費海洋公園行禮 盈盈樂樂搵熊貓證婚
http://hk8news-e.blogspot.com/2012/10/11311.html
