娛聞樂
扮鬼反被嚇 細膽 DaDa喊爆
2012年10月12日
𡃁模界阿姐 DaDa陳靜，日前孖住有「翻版朱茵」之稱的另一 𡃁模羅彩玲（ Vivian），為一個網站的哈囉喂特備節目《索女玩盡末日萬聖節》任靚鬼嘉賓，一心嚇嚇班宅男。
點知當日衰鬼導演私下安排臨記扮鬼匿埋化妝間，熄燈突襲 DaDa。一早話怕鬼的 DaDa當場被嚇得花容失色， 𠵱嘩鬼叫合十祈禱，仲攬實助手喪喊。我見猶憐，有冇靚仔呵番呀？
由 𡃁模搖身一變成三千萬電影票房女星的 DaDa，憑著三級笑片《低俗喜劇》「爆炸糖」一角成功突圍，雖然拍戲資歷淺，但她卻入圍台灣金馬獎「最佳女配角」，為 𡃁模界爭光。
平日樣靚身材正的 DaDa就見得多，日前她卻反傳統，扮恐怖艷鬼為網站的哈囉喂特備節目任嘉賓。拍攝當日 DaDa準時早上十點便到葵湧的錄影廠化妝，其間她分別換了兩個爛頸兼七孔流血的喪屍 look，之後便埋位拍嚇鬼造型照。
不過好戲在後頭，拍完硬照才到戲肉，導演預先安排兩名臨記嬸嬸在化妝間暗角匿埋，工作人員呃 DaDa獨自在化妝間等做訪問。
嗌救命祈禱
在房內呆等十分鐘的 DaDa，原本一直玩手中電話，此時第一名老臨嬸嬸攞住三支香衝入房在 DaDa身邊拜四角，並唸唸有詞：「衰仔，你哋玩夠未呀？」然後便走番出房。此時懵然不知的 DaDa仍未有反應。
老臨嬸嬸走後，繼續在化妝間呆坐的 DaDa望住四堵牆發呆，突然房內變得漆黑一片，裝扮猶如紙紮公仔的另一臨記在 DaDa身後彈出，並拿著紅色遮追著她狂嗌狂叫，嚇得 DaDa花容失色大叫救命，並急步衝出門口，做出祈禱動作，再攬實助手喊爆求救，喊到妝都溶曬，整蠱行動十分成功。
事後 DaDa飲了杯熱茶，才稍稍定過神接受訪問說：「真係冇諗過會玩得咁大，我一心諗住嚟嚇人，點知俾人嚇番，真係無話可說。依家諗番其實好多破綻，但嗰時嚟得太快，諗唔切。依家諗諗嚇其實我經理人知唔知呢件事呢？我開始好懷疑……點解我成日俾人整蠱？下次一定要做整蠱人嗰個！」下次搵個壯男傍實，乜鬼都埋唔到你身啦！
爆出半桶金
DaDa憑三級片《低俗喜劇》的「爆炸糖」升呢，成為今屆台灣金馬獎「最佳女配角」唯一的提名香港代表。突然人氣急升，商場騷價由 3萬變 6萬，內衣騷價由 4萬變 8萬，一個 double，「爆炸糖」絕對鹹得有價值。
Peach John內衣騷（ 9月） 騷價$8萬
化妝品牌活動（ 9月） 騷價$6萬
德國啤酒節開幕活動（ 10月） 騷價$6萬
驚慄片（接洽中） 片酬$30萬
共$50萬
Vivian發老脾
DaDa嚇破膽，相反另一女角 Vivian，由於玩慣鬼屋，對突襲女鬼完全零反應，更大聲喝罵女鬼，比 DaDa大膽得多。
.[忽然1周]扮鬼反被嚇 細膽 DaDa喊爆
http://hk8news-e.blogspot.com/2012/10/1-dada.html
