鄭少秋振夫綱：為妻平反

入行40多年的鄭少秋，雖年屆65，但外形風流倜儻，加上所主演的多套古裝劇均以「大俠」姿態出現，器宇軒昂，迷倒萬千少女！惟「大俠秋」在結婚13年的老婆官晶華面前，卻十足「小男人」因而被指是「老婆奴」，秋官在本報一連五日訪問中振臂高呼他如何「振夫綱」，並為老婆平反以及其過契身世和當了明星還要匿埋在山寨廠做男工等苦況。

老婆篇：家有賢妻要尊重

人人話我怕老婆，其實我唔係怕，而係尊重！外間有人覺得我口花花，真係好慘……點解唔可以話呢啲係風趣？幽默感係好喎……但傳媒寫到我呢種行為好負面囉。不過，我老婆（官晶華）唔係靠我嘅風趣氹番嚟，所謂「緣分」，夾到嘅就嚟o架啦！

80年代初我過咗台灣發展，我同晶華因合作拍劇而認識，之後我哋結婚，生咗兩個女詠恩同詠曦，不過，一頭家原來好多嘢顧，呢個重擔交咗畀老婆做，除咗照顧兩個女，屋企所有嘢都係佢一手照顧、作主，連投資都係老婆搞，乜都靠佢，所以外間話我老婆惡，實情佢係好老婆。

鄭少秋回首前塵，說及幾段婚姻，不承認是怕老婆的老婆奴！

鄭少秋(左)、官晶華(右)



鄭少秋的香帥造型，迷倒萬千少女。



鄭少秋：「我信秋官effect嘅話，發到唔清唔楚啦。」

擔起曬成頭家

有時老婆都會發嚇脾氣，因為佢顧太多嘢啦，步驟亂就會忟憎，但我係老公喎……我會同佢講：「我始終係老公，我要『振夫綱』！要畀面老公！」所以唔可以話我怕老婆，應該係尊敬，佢話曬擔起成頭家，錫老婆係男人應該做嘅。以前搵錢我就畀曬阿媽，依家搵錢畀曬老婆，我嘅性格就係咁，人生得三樣嘢：工作、學嘢同娛樂—即係睇電視啦！

沈殿霞(左)、鄭少秋(右)



欣宜加入娛樂圈後，歌唱成就被指已超越父親。



欣宜與Mark Ryan分手，秋官大嘆可惜。

我最唔好就係只顧埋頭工作，自己喺學識上有不足，組織力唔夠好，所以每有工作我都做好多事前準備嚟充實，有關角色上，我就更加專心鑽研，到咗星期日，我又會同老婆講畀我抖嚇，咁佢又要打理埋個女嘅起居飲食、約會；甚至平日去銀行……包括經濟上嘅分布、投資……雖然有會計師搞，但都要將啲單據組合，睇曬有關信件，都係靠老婆處理。

鄭少秋早年與官晶華及兩個女兒詠恩（右二）及詠曦合攝。



肥姐沈殿霞與欣宜（右二）及官晶華所生的兩個女兒往欣賞秋官演舞台劇。



秋官女兒鄭詠恩在慈善時裝展中任model。



細女鄭詠曦被秋官形容為似足他—咁矇查查！

被亂寫唔開心

我係一個成熟嘅男人，冇乜要求，而我又掛住睇電視唔理，外間先會錯誤建立佢係「惡妻」形象！令到佢都好唔開心，被誤會係人都唔鍾意，為免愈描愈黑，平日佢都好低調。出街有「狗仔隊」跟，我雖然冇所謂，但佢畀啲唔負責嘅傳媒亂寫，先會板起塊面啫！好似今次訪問，老婆知係正經嘢，工作嘛……佢會幫我安排檔期，同傳媒配合，好合作o架。

丁蟹篇：信效應發過豬頭

1992年，無綫一套以股市起跌刻畫人性的劇集《大時代》熱播，當中鄭少秋飾演的「丁蟹」一角，造就了「丁蟹效應」達廿年之久。這段期間只要有秋官的劇集出現，港股便會波動大跌。秋官對這個現象都摸不著頭腦，而其妻官晶華專責處理投資，因不敢盡信而未有入市下注，反而只集中投資實力股及樓宇買賣。

入稟賠五千萬

如果我略為信呢個外國翻譯為「秋官effect」 的「丁蟹效應」 ，我都可能發達！我買期指都發到好似隻腳腫到鞋都著唔入啦！其實我都統計過，我嘅出現，有80%係應驗嘅，但嗰段時間出街見到啲普羅大眾股民就慘啦……佢哋冇鬧我，但會同我呻囉。當年亞視播台灣劇《香帥傳奇》，有人因為股市輸錢，入稟要我賠五千萬……嘩，嚇死我咩！

早前無綫播《心戰》，「丁蟹效應」影響港股又冇以前咁犀利喎，有少少偏差，以往跌幾百點，今次跌廿幾點，查實自己喺「秋官effect」上並冇得益，既然係咁……好！我下決心，下次一定要試。但我同老婆買嘅都係實力股，好似滙豐咁，買咗好耐，外間又以為我買好多樓作投資，查實衫鈕個「鈕」就有！

欣宜篇：父女關係有改進

與沈殿霞所出的欣宜，起初因秋官未有在其身邊照顧，一盡為父之責，即使及後補償，秋官對欣宜始終有份愧疚，猶幸欣宜入行後將父母遺傳的歌、演細胞發揮淋漓盡致，特別是歌藝了得受到不少前輩讚賞，欣宜總算吐氣揚眉。

分享經驗減壓

欣宜真係好多人讚，DJ、Auntie都讚佢唱得叻過我呀！其實，欣宜入咗行後，彼此關係反而幾好，佢做訪問時都有講話好仰慕我、當我偶像！我哋雖然接觸唔多，但接觸時佢好嗲好錫我，不過欣宜實在太忙，我約佢見面食飯，佢成日都fullybook，生日想畀利是佢，有時都係透過佢助手畀佢。我哋兩父女乜都講，佢有感情問題，好似早前同Mark Ryan分手，佢都第一時間同我講，始終都可惜，咁多年感情……但我尊重佢決定，依家外間又傳另一個男友，話同個韓模Jin拍拖喎，但佢同我講唔係o架！

除咗感情問題，欣宜處理其他事EQ係幾好，初時入行承受好多抨擊，佢對我講話好困擾，我咪將經驗同佢分享，話千祈唔好畀壓力自己，影響自身安全，有咩碰撞就唔抵，好似戴安娜王妃就係最好例子，我成日提佢，千祈唔好為避追訪而出意外。

女兒篇：三段姻緣四個女

先後有三段婚姻的秋官，與髮妻盧慧茹育有一女鄭安儀，離婚後於1985年再與沈殿霞結婚並育有鄭欣宜，但婚姻只維持了三年，1989年他與台灣女藝人官晶華結婚，誕下兩女，分別名為詠恩和詠曦。秋官因與這兩名女兒共同生活，故對她們了解尤為深入，笑指詠曦性格似他「矇查查」。

唔係呷醋外父

細女（詠曦）好似我咁矇查查，佢雖然中學畢業，但出街落雨都要提佢帶遮，又要提帶外套……我覺得依家啲女仔好似唔鍾意著衫（外套）咁！至於大女（詠恩）就有自己生活，做嚇model，都有拍拖，但佢冇報告我哋知o架！不過，我都唔係呷醋外父，係我老婆緊張啲，而我就主張女大女世界。

但兩個女同老婆一樣，見有記者影相就忟憎，佢哋成日同我講：「唔好影、唔好提、要低調、記者問乜都唔好講。」但我又衰，我係無事不可對人言嘅，不過，佢有佢哋嘅權利，我要尊重嘅。近年好多星二代入行，但冇搵我呢兩個女，佢阿媽都係呢行，知道幾咁辛苦，所以兩個女對呢行都冇興趣。

口述：鄭少秋

攝影：劉志源

服裝：BOSS Black

場地：Bella Vita

.鄭少秋振夫綱：為妻平反
http://hk8news-d.blogspot.com/2012/09/blog-post_1451.html