2012年9月3日星期一

張名雅黃心穎朱千雪專訪張名雅：一人一票朱千雪會贏

張名雅黃心穎朱千雪專訪張名雅：一人一票朱千雪會贏

今年香港小姐大玩噱頭一人一票選港姐，可惜決賽夜冧server被全城狂插淪市民笑柄，令40周年港姐競選留下汙點。冠軍張名雅、亞軍黃心穎、季軍朱千雪坦言以為當晚司儀公布冧server是講笑。根據網民反應及坊間意見，認為若由市民投票，朱千雪會奪得後冠。張名雅亦承認如果一人一票，朱千雪很大機會贏。

黃心穎（左起）、張名雅及朱千雪沒有因是非而影響友誼，反而令她們更團結。

張=張名雅黃= 黃心穎朱= 朱千雪

黃：近來都睇到報道因為冧Server事件質疑我哋三甲名次。

朱千雪（右起）、張名雅及黃心穎認為賽果已定，無必要重選。

「民意冠軍」朱千雪認為張名雅奪冠是實至名歸。

張：其實TVB一人一票選港姐係好創新，公司係有心去嘗試，可惜最後失敗咗，只可以講冇辦法，惟有接受專業評判揀出嚟嘅冠亞季軍。其實每年港姐冠軍都有人唔鍾意，自己有時都會唔開心，但係最驚係千雪同心穎介意唔開心！不過之後同佢哋傾過，知佢哋冇唔開心，咁先放心。講真，投票真係好難講，都有可能係千雪攞冠軍，或者係心穎都唔定。

張名雅（中）得知兩女沒有為名次感到不開心，喜極而泣。

黃心穎坦言以為司儀宣布冧server是講笑。

黃：其實唔能夠一人一票係有啲遺憾，因為永遠都留低一個問號，但係都係一種遺憾美，希望下年可以做到一人一票。我聽到外間質疑我攞亞軍，但係自己唔會咁諗，因為覺得自己決賽表現幾好，工作人員評語都讚我。依家唔會再諗邊個係冠軍、亞軍、季軍，因為諗嚟都冇用，三個女仔各有長處，張名雅攞冠軍係佢應該得到嘅。

唔會瞓唔著

朱：雖然選出嚟係有冠亞季軍分別，但係我覺得我哋冠亞季軍好似三位一體，所以由頭到尾都冇好差嘅感覺，所以唔會話覺得唔公平同唔開心。自己入到三甲已經冇遺憾，自己做到最好，個電腦系統又唔係我哋整嘅，所以冇遺憾。

張：其實歷屆好多港姐三甲都有人會質疑，因為每個人都有自己嘅心水。當選之後自己微博一晚多咗五千fans，所以真係各有所好，自己都冇因為報道困擾瞓唔著。

朱：哈哈，我哋三個一定唔會瞓唔著，食得瞓得。

無必要重選

張：大家點睇重選？

黃：都見facebook有人發起投票，大家都好關心今年嘅港姐，但係我覺得唔使重選。

朱：唔使重選，港姐呢個旅程去到8月26日已經結束，結果係張名雅攞冠軍。雖然好多人話我有機會攞冠軍，但係唔需要去諗一啲如果，有市民同fans認同，自己當贏咗。

張：有咗結果，都冇必要再去提，每年港姐都有人鍾意唔鍾意係正常反應，有人網上投票話千雪係冠軍，或者心穎冠軍，都未必代表到全部人嘅意見。

黃：冇錯，就算嗰晚千雪攞冠軍，都可能一樣有人講。

朱：我覺得可能啲人係嬲系統唔work，唔係覺得張名雅唔值得攞。

團結抗批評

張：其實嗰晚志偉、叻哥宣布冧server，由評判決定三甲，我以為係講笑，你哋呢？

黃：我都以為佢哋講笑，你知佢哋一向好幽默，冇諗過會有呢啲嘢發生，當時贏咗湯洛雯入三甲係全晚最開心嘅一刻，所以都未諗得切其他嘢。

朱：我都以為係講笑。

張：入到三甲都未開心完，嗰一刻仲發緊夢，之後先知道咁大件事，觀眾回響咁大。

朱：如果我哋三個互選唔知邊個輸贏呢？

黃：我會揀名雅，事實上佢參選以嚟表現都好穩定，我同千雪只係當晚表現好，所以覺得賽果合理。

朱：如果自己投票一定投自己，但係名雅當晚表現係好好，攞冠軍係實至名歸。

張：其實當晚唔知自己表現係點，之後睇番錄影帶覺得表現係比平時好，可以話超水準。自己平時其實幾騰雞，答問題係有啲驚，但嗰晚表現係幾淡定。不過，坦白講如果一人一票去選，千雪係好大機會贏，因為千雪畀人感覺親切，有時鍾意就係鍾意，冇得解釋。

朱：其實有今次經歷，我哋三個嘅感情都深厚咗。

黃：絕對係！因為好多嘢只係我哋三個一齊經歷過，出面嘅人唔會知。外人會覺得個個女仔一定想攞冠軍，其實唔係，有呢個結果已經好開心！

朱：有咗結果，依家唔會再諗係咪我可以攞冠軍。入到三甲喺後台一刻好難忘，見到大家嘅眼神都好滿足，有名次已足夠。傳媒、社會話要重選嘅聲音，反而令到大家更團結，希望大家向前看。

與偶像合作

張：我哋已經入咗行，大家有乜目標？

黃：自己對娛樂圈有興趣，可以嘅話乜都想試。

朱：我嘅目標係……

黃：你係想見林峯！

朱：冇錯，哈哈。自己一路都冇目標，選美係希望可以搵到自己嘅目標，好想試嚇拍劇同做司儀。自己鍾意寫嘢，好想同人分享自己嘅睇法，有機會想出書做作家。

黃：我都鍾意林峯，名雅就鍾意陳展鵬。

張：我鍾意睇佢做戲，可能我鍾意四眼同正經啲嘅男仔。

黃：我係因為聽林峯喺《天涯俠醫》唱嘅主題曲《心呼吸》開始鍾意佢，但係第日如果有機會合作都驚怕醜不停NG。

後記：友誼第一

今年港姐三甲充滿爭議，負面新聞浪接浪，不過造就了張名雅、黃心穎和朱千雪的友情歲月。張名雅坦言最擔心是黃心穎和朱千雪因報道而不開心，朱千雪有感而發：「佢問過我哋有冇唔開心，其實冠軍佢已經攞咗，佢可以唔理我哋感受，真係好多謝佢。」張名雅聞言即忍不住哭泣，朱千雪和黃心穎亦感動得眼濕濕。誰說選美只有是非而沒友誼？

攝：沈健程

服裝：Sinequanone　髮型：HAiR@Derek Cheung

場地：Three on Canton（港威酒店）

出爐港姐各有賣點，朱千雪（左起）可愛、黃心穎聰明、張名雅高貴，滿足不同要求。